ŨTHAYŨŨKYO wa Yesũ ti ũndũ weekĩkie tene ũkethĩa ndũtonya kũtũtethya ũmũnthĩ. Mũtũmwa Vaulo nĩwawetie vata wa ũthayũũkyo wa Yesũ ĩla waandĩkie ũũ: “Klĩsto nĩwathayũkiw’e kuma kwa akw’ũ, ũsyao wa mbee wa ala makomete. Nũndũ nĩkwĩthĩwa kĩkw’ũ nĩkyookie kwondũ wa mũndũ, kũthayũũka kwa akw’ũ nakw’o nĩkwookie kwondũ wa mũndũ. Nũndũ o ũndũ onthe makusaa nthĩnĩ wa Atamu, o ta ũu nthĩnĩ wa Klĩsto onthe makeethĩwa thayũ.”—1 Akolintho 15:20-22.

Yesũ athayũũkiw’e Nisani 16 mwaka wa 33 Ĩ.Y., mũthenya ũla Ayuti mathembeaa Yeova Ngai ũsyao wa mbee wa ngetha yoo ĩkalũnĩ Yelusaleme. Ĩla Vaulo weetie Yesũ ũsyao wa mbee, oonanasya kana ve andũ angĩ makathayũũkw’a.

Ndeto ila iatĩĩe sya Vaulo nĩsyonanĩtye ũndũ kũkethĩwa nũndũ wa ũthayũũkyo wa Yesũ. Aisye: “Nũndũ nĩkwĩthĩwa kĩkw’ũ nĩkyookie kwondũ wa mũndũ, kũthayũũka kwa akw’ũ nakw’o nĩkwookie kwondũ wa mũndũ.” Ithyonthe nĩtũkusaa nũndũ tũi eanĩu na nĩtwakwatie naĩ kuma kwa Atamu. Ĩndĩ, ĩla Yesũ weeyumisye ethĩwe nthembo ya wovosyo, nĩwavingũie nzĩa nĩ kana andũ methayũũkw’a na maithaw’a kuma ũkombonĩ wa naĩ na kĩkw’ũ. Ayĩelesya ũndũ ũsu nesa, Vaulo aandĩkie ũũ nthĩnĩ wa ĩandĩko ya Alomi 6:23: “Ĩtuvi ya naĩ nĩ kĩkw’ũ; ĩndĩ mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.”

Yesũ nĩwaeleisye kĩla tũkakwata nũndũ wa kĩkw’ũ kyake na ũthayũũkyo wake. Yesũ aineena ĩũlũ wake mwene, aisye atĩĩ: “Mũvaka Mwana wa mũndũ okĩlw’e ta ũu: nĩ kana o ũla ũmwĩtĩkĩlaa ethĩwe na thayũ ũtathela. Nũndũ Ngai nĩwendete nthĩ, nĩwanenganie Mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.”—Yoana 3:14-16.

Kwasũanĩa ũyĩkala tene na tene vate woo, thĩna, kana kĩmeto! (Ũvuan’yo 21:3, 4) Ũsu nĩ wĩkwatyo mũseo ta kĩ! Mũsomi ũmwe ayĩelesya ũndũ ũsu aisye atĩĩ: “O na kau mbũa itũlilikanasya ũndũ thayũ ũkuĩvĩte, ũthayũũkyo ũĩkĩĩthasya kana kĩkw’ũ kĩ na ĩvinda ĩkuvĩ.” Vate nzika, ũthayũũkyo wa Yesũ ũkatuma andũ makwata thayũ ũtathela.