Neanĩie kĩsionĩ kĩtaĩ maendeeo nthĩnĩ wa taoni ya Montreal. Ĩthe wakwa akwie nĩ na myei thanthatũ, na ũu watuma inyia wakwa atiĩwa mawĩa onthe ma mũsyĩ. Twasyaĩtwe twĩ nyanya na ninyie naĩ ĩlumaita.

O nĩendeee na kwĩana, nendete maũndũ ta kũtũmĩa ndawa sya kũmila, kũtha kalata, ũng’endu, na kũtindany’a na ing’endilĩ. Nĩ na myaka ĩkũmi, nathũkũmanaa na malwaya na andũ ala makovethasya mbesa nĩ kana metũngĩwa syĩ na ũsyao mũnene. Mavinda maingĩ nĩnakengaa andũ, o na nĩneew’aa mũyo ĩla natũmĩa mawũĩ kũmavena. Naĩ namanyĩie kwĩka ũu.

Ndyĩsa kũtw’ĩka nĩnavikya myaka 14, nĩneemanyĩĩtye nzĩa mbingĩ sya kũkenga andũ. Kwa ngelekany’o, nĩnathooaa saa, mbangili, na mbete syanakavĩtw’e na thaavu, na ndisyĩkĩa katang’a kekwonany’a iseũvĩtw’e na thaavu. Katang’a kaũ keethĩawa konanĩtye kana kĩndũ kĩu kĩseũvĩtw’e na thaavu (14-carat gold). Nĩnatanĩaa mũno kũseũvya mbesa kwa nzĩa yĩ laisi. Ve mũthenya ũmwe naseũvisye ndola 10,000!

Nĩ na myaka 15, nĩnalũngilw’e sukulu ya kũlũnga mwĩkalĩle na weethĩa ndi vandũ nĩkala. Nakomaa ũtee wa nduka taoni, kũndũ kũla andũ mathyũmũaa, kana mĩsyĩ kwa anyanyawa ala manthokya.

Nũndũ wa syĩko syakwa sya ũkengani, mavinda maingĩ nĩnakwatawa nĩ asikalĩ. Nũndũ ndyatesaa syĩndũ sya ũng’ei, ndyaaĩsa kwovwa. Ĩndĩ o na vailyĩ ũu, nĩnaĩvaa koti mũnene nũndũ wa kũkengana nĩ kana nĩkwate mbesa, kũthoosya syĩndũ sya makendo, o na kũthoosya syĩndũ nde na laĩsenzi. Nde na wia nĩnoosanasya mbesa sya andũ ala makovethasya nĩ kana metũngĩwa mbesa syĩ na ũsyao mũnene. Wĩa ũsu waĩ ũtonya kũtuma nũawa laisi, na mavinda angĩ nĩnakuaa ĩvuti. O na mavinda angĩ nĩnathũkũmanaa na ikundi sya ing’endilĩ.

Noonie Mbivilia ya mbee nĩ na myaka 17. Ĩvinda yĩu nekalanasya na mwĩĩtu twaĩ ndũũ na ambĩĩa kwĩmanyĩsya Mbivilia  na Ngũsĩ sya Yeova. Ĩndĩ nũndũ nĩnaleanaa na myolooto ya Mbivilia nĩnatianie na mwĩĩtu ũsu na nathi kwĩkalany’a na mũndũ mũka ũngĩ naĩ ndũũ nake.

Maũndũ maalyũkile ĩla o nake mũndũ mũka ũsu wa kelĩ wambĩĩie kwĩmanyĩsya Mbivilia na Ngũsĩ! Nĩnatanie mũno ĩla weekie moalyũku, ambĩĩa kwĩthĩwa e mũuu na e na wũmĩĩsyo. Nĩneetĩkĩlile ĩla nathokiw’e ũthaithinĩ, Nyũmbanĩ ya Ũsumbĩ ya Ngũsĩ sya Yeova. Navika, nĩnathokiw’e nĩ andũ maĩ atheu na maĩ aseo. Ũndũ ũsu waĩ kĩvathũkany’o vyũ na maũndũ ala namanyĩĩte. Kuma nĩ kana kanini ndyoonaa andũ ma mũsyĩ me vata nakwa, o na neew’aa andũ matambendete. Wendo ũla nooniw’e nĩ Ngũsĩ sya Yeova nĩw’o natwĩe nĩmanthaa. Na kwoou, ĩla meeyumisye kwĩmanyĩsya Mbivilia nakwa neetĩkĩlile vate kwananga ĩvinda.

Nĩvatonyeka maũndũ ala neemanyĩasya Mbivilianĩ makethĩwa nomo matangĩĩie thayũ wakwa. Ĩvinda yĩmwe nĩ na aũme angĩ elĩ tweekaa mũvango wa kũthi kũya nĩ kana nĩĩve ĩkoani ya ndola 50,000 ila nataĩtwe kyũthinĩ. Nĩw’aa mũyo nũndũ nĩnaumie mũvangonĩ ũsu! Ĩndĩ aũme asu nĩmaendie kũya. Mayũya, ũmwe woo nĩwakwatiwe nĩ asikalĩ, na ũla ũngĩ ooawa.

O ũndũ naendeeie kwĩmanyĩsya Mbivilia, now’o noonie maũndũ maingĩ ala naaĩle kũeka. Kwa ngelekany’o, nĩneemanyĩisye ũndũ Mbivilia yaĩtye ĩvukunĩ ya 1 Akolintho 6:10: “Ing’ei, o na ala me na ĩtomo, o na anywi, o na aumani, o na avutani, maikatiĩwa ũsumbĩ wa Ngai.” Ĩla nasomie mũsoa ũsu na nalilikana ũndũ maũndũ ala neekĩte mathũkĩte, ũndũ ũsu nĩwatumie nĩĩa. Vau nĩvo namanyie kana nĩnaaĩlĩte kũalyũka vyũ. (Alomi 12:2) Naĩ ngũlũ mũno, naĩ mũng’endu, na naĩ namanyĩie kũkengana.

O na vailyĩ ũu, nĩneemanyĩisye kuma Mbivilianĩ kana Yeova e tei na nũekeaa. (Isaia 1:18) Nĩnamũvoyie na kĩthito na namwĩsũva andetheesye nĩalyũle mwĩkalĩle wakwa wa tene. Na kwa ũtethyo wake, nĩnaendeeie kwĩka moalyũku. Twoosie ĩtambya ĩnene ĩla twaandĩkĩthisye mũtwaano nĩ na mũndũ mũka ũla twaĩ ndũũ.

Ĩvinda yĩu naĩ na myaka 24, na naĩ na kĩveti na syana itatũ. Yaĩ no nginya nĩmanthe wĩa mũseo wa kũthũkũma, o na kau ndyaĩ mũsomu mũno. Ĩngĩ nĩnamũvoyie Yeova na kĩthito, na nathi kũmantha wĩa. Nĩnatavasya ene wĩa kana nĩneeyumĩtye kũalyũka, na kũtethya wĩa nde na ũlũsani. O na mavinda angĩ nĩnamaeleasya kana nĩneemanyĩasya Mbivilia, na nĩnendaa kwĩthĩwa nĩ mũndũ mũseo. O na ũu wĩ o vo, aingĩ moo nĩmaleaa kũnandĩka. Ĩndĩ ĩtina wa kũelesya mũnene ũmwe ũndũ mwĩkalĩle wakwa wailyĩ, ambĩie atĩĩ: “Ndyĩsĩ nĩkĩ, ĩndĩ nĩona naĩle kũkũandĩka.” Ũndũ ũsu wandĩkĩĩthisye nesa kana Yeova nĩwasũngĩie mboya yakwa. Ĩtina wa ĩvinda, nyie na kĩveti kyakwa nĩtwavatisiwe na twatw’ĩka Ngũsĩ sya Yeova.

Ũmũnthĩ nĩ thayũ nũndũ wa kũatĩĩa myolooto ya Mbivilia, na kwĩkala mwĩkalĩle wa Kĩklĩsto. Nĩ na kĩveti na syana syĩ na ũtanu. O na nĩ na wasya mũtheu wa ngoo nũndũ nĩnĩsĩ nesa kana Yeova nĩwandekeie.

Kwa myaka 14 mĩvĩtu, nĩnĩthĩĩtwe ũthũkũminĩ wa ĩvinda yonthe nditetheesya andũ memanyĩsye Mbivilia, na ĩvinda ĩvĩtu yĩte yĩasa, o nakyo kĩveti kyakwa nĩkyambĩĩie ũthũkũmi wa ĩvinda yonthe. Na ũndũ ũla ũndanĩthasya nĩ kana kwa ĩvinda ya myaka 30 mĩvĩtu, nĩnĩtetheesye andũ 22 tũthũkũmaa ĩmwe makethĩwa me athũkũmi ma Yeova. Na wĩsĩ kĩ, yu nĩnĩendaa ndukanĩ nene sya viasala nĩ na kĩtumi kĩseo, ĩndĩ ti kũvena andũ o tondũ neekaa tene. Mavinda maingĩ ĩla nathi vo nĩndavasya andũ ĩũlũ wa mũĩkĩĩo wakwa. Nendaa kũmatavya ũvoo wa vata mũno, naw’o nĩ wĩkwatyo wa kwĩkala nthĩ nzaũ, ĩla ĩtakethĩwa na ũvenani.—Savuli 37:10, 11.