Ithyonthe nĩtwendaa kwĩthĩwa na mbesa nĩ kana twĩanĩsye mavata ma andũ ma mũsyĩ. (Nthimo 30:8) Ũsu nĩ ũndũ waĩle nũndũ “mbesa nĩ ũsũvĩo.” (Mũtavanʼya 7:12) Nĩvatonyeka mũndũ na mũka makewʼa ne ũndũ wĩ vinya kũneenea maũndũ ma mbesa, ĩndĩ mayaĩle kwĩtĩkĩla mbesa iete thĩna mũtwaanonĩ woo. (Aeveso 4:32) Andũ ala matwaanĩte maĩle kwĩthĩwa maĩkĩanĩe, na me na ngwatanĩo ĩla meũvanga ũndũ meũtũmĩa mbesa syoo.

ŨNDŨ MBIVILIA YAĨTYE: “Nũũ kwenyu, akyenda kwaka nyũmba yĩ mũnyoolo ũtambaa kwĩkala nthĩ na kũtala mbesa sya kũmyakĩthya, nĩ kana amanye ethĩwa e nasyo sya kũmĩmina?” (Luka 14:28) Nĩ ũndũ wa vata mũno kũvanga mwĩ vamwe ũndũ mũũtũmĩa mbesa syenyu. (Amosi 3:3) Nũseo mũkewʼana kĩla mũkwenda kũũa, na mũisisya kana mwĩ na mbesa sianĩtye. (Nthimo 31:16) Ĩndĩ o na ũu wĩ o vo, ti lasima mũũe kĩndũ, nĩ aĩ nũndũ mwĩ na mbesa. Tatai mũikethĩwe na makoani. Thooai syĩndũ kwĩanana na mbesa ila mwĩ nasyo.—Nthimo 21:5; 22:7.

ŨNDŨ MŨTONYA KWĨKA:

• Ethĩwa mwĩ na mbesa itiele mũthya wa mwei, vangai ũndũ mũkũitũmĩa

• Ethĩwa ngalama syenyu nivĩtũkĩte mbesa ila mwĩ nasyo, ĩkai mĩvango mũolange ngalama syenyu. Kwa ngelekanyʼo, nĩmũtonya kũya mũsyĩ vandũ va kũya mũkaawanĩ

ŨNDŨ MBIVILIA YAĨTYE: “Kwondũ wa ũu, mũkĩveta ũvũngũ, neenai wʼo kĩla mũndũ na ũla ũngĩ: nĩkwĩthĩwa twĩ mamutha ene kwa ene.” (Aeveso 4:25) Ndũkamũvithe ũla ũtwaanĩte nake mbesa ila ũkwataa na ũndũ itũmĩkaa.

Nũseo kĩla ĩvinda ũkasũanĩaa vamwe na ũla ũtwaanĩte nake ũtanamba kwĩka motwi manene makonetye mbesa. (Nthimo 13:10) Kũea ngewa ĩũlũ wa ũndũ mũtonya kũtũmĩa mbesa syenyu nĩkũtonya kũmũtetheesya mũkethĩwa na mũuo mũtwaanonĩ wenyu. Ndwaĩle kwona mbesa ila ũkwataa ta syaku wĩ weka. Ĩndĩ waĩle kũmanya nĩ syenyu inywʼonthe.—1 Timotheo 5:8.

ŨNDŨ MŨTONYA KWĨKA:

• Ĩwʼanai mbesa ila kĩla ũmwe wenyu ũtonya kũtũmĩa maũndũnĩ make ateũkũlya ũla ũngĩ

• Mũiketeele mwĩsae kũea ngewa ya mbesa o ĩla thĩna waumĩla