13
Timotheo Nĩwendete Kũtetheesya Andũ
Timotheo aĩ mwanake wendete kũtetheesya andũ. Nĩwaendie kũndũ kwingĩ akatetheesye andũ. Ũu watumie ethĩwa e na ũtanu mwingĩ mũno. Nũkwenda kũmanya ĩũlũ wake?—
Inyia wa Timotheo na ũsũe nĩmamũnyĩisye ĩũlũ wa Yeova
Timotheo eanĩie ndũanĩ yeetawa Lisitela. Ĩla waĩ kana, ũsũe wake Loisi na inyia wake Eunike, nĩmambĩĩie kũmũmanyĩsya ĩũlũ wa Yeova. Ĩla weanie, nĩwendaa kũtetheesya andũ mamũmanye Yeova.
Timotheo e o mwanake, Vaulo nĩwamũkũlilye athi vamwe nake makatavany’e isionĩ ingĩ. Timotheo nĩweetĩkĩlile kũthi na Vaulo. Eetĩkĩlile kũthi nũndũ nĩwendaa kũtetheesya andũ.
Timotheo na Vaulo nĩmaendie ndũanĩ ya Thesalonika ĩla yaĩ vandũ veetawa Masetonia. Nĩ kana mavike kũu, maaĩlĩte kũthi na maaũ savalĩ ndaasa mũno, na ĩndĩ mayosa ĩsiwa. Ĩla mavikie kũu, nĩmatetheeisye andũ aingĩ mũno mamũmanye Yeova. Ĩndĩ andũ amwe nĩmeewie woo na menda kũmaũmĩsya. Ũu nĩwatumie Vaulo na Timotheo mauma ndũanĩ ĩsu, na mathi kũtavany’a kũndũ kũngĩ.
Timotheo aĩ na ũtanu mwingĩ mũno
Ĩtina wa myei mĩnini, Vaulo nĩwamũkũlilye Timotheo asyoke ĩngĩ ndũanĩ ya Thesalonika nĩ kana akasisye ũndũ ana-a-asa maendee. Yaĩ no nginya Timotheo ethĩwe ate na wia nĩ kana asyoke ndũanĩ ĩsu yaĩ na andũ athũku! Ĩndĩ nĩwasyokie ndũanĩ ĩsu nũndũ nĩwathĩnĩkĩaa ana-a-asa ma kũu. Nĩwaeteie Vaulo ũvoo mũseo kuma kũu Thesalonika. Amwĩie kana ana-a-asa ma kũu maendee nesa vyũ!
Timotheo nĩwathũkũmie na Vaulo myaka mingĩ mũno. Ĩvinda yĩmwe Vaulo nĩwaandĩkie kana Timotheo nĩwe waaĩlĩte vyũ kũtũmwa kũtetheesya ana-a-asa ikundinĩ. Timotheo nĩwe waaĩlĩte nũndũ nĩwamwendete Yeova na akamenda andũ.
Nĩwendete andũ na nĩwendaa kũmatetheesya mamũmanye Yeova?— Ethĩwa wĩ mũndũ wendete andũ na nĩwendaa kũmatetheesya, ũu ũkatuma wĩthĩwa na ũtanu mwingĩ mũno o ta Timotheo!
