1, 2. (a) Nĩkĩ Aana weethĩawa ate mũtanu yĩla mekwĩyũmbanĩsya kyalo kya kũthi Silo? (b) Ngewa ya Aana yĩtũmanyĩsya kyaũ?

 AANA aĩ mũka wa Elikana, na kĩla mwaka Elikana nĩwatwaa andũ make makamũthaithe Yeova ĩeemanĩ ya kũmbanĩa yĩla yaĩ Silo. Ĩvinda yĩu yavika, no nginya Aana ethĩwe akwatanaa mũno ayĩyũmbanĩsya kyalo kĩu atatĩte ũndũ ũtonya ndakatinde aisũanĩa mathĩna make. Yeova endaa mavinda ta asu methĩwe me ma kũtanĩthya. (Soma Kũtũngĩlĩlwa Kwa Mĩao 16:15.) Vate nzika, kuma wana wake, Aana nĩwatanĩaa mavinda asu mũno. Ĩndĩ myakanĩ ya mĩtũkĩ, maũndũ maĩ manambĩĩa kũmũalyũkĩla.

² Aana nĩwaathimĩtwe na mũũme wamwendete mũno. Ĩndĩ o na vailye ũu, Elikana aĩ na kĩveti kĩngĩ. Kyeetawa Venina, na nĩkyatw’ĩte vyũ kũnyamasya Aana. Venina nĩwatũmĩaa mavinda asu ma kũthi Silo kũmũũmĩsya Aana ĩ ya mũno. Eekaa ũu ata? Na kũmũĩkĩĩa Yeova kwamũtetheeisye Aana ata mavindanĩ asu mataĩ laisi? Ethĩwa nũkomanaa na maũndũ matumaa wĩthĩwa ũte mũtanu, ngelekany’o ya Aana no ĩkwĩkĩe vinya mũno.

3, 4. Nĩ maũndũ meva elĩ manene mathĩnasya Aana, na nĩkĩ maũndũ asu elĩ mataĩ laisi?

³ Mbivilia nĩwetaa maũndũ elĩ manene ala mathĩnasya Aana. Aĩ na ũtonyi mũnini wa kũmina thĩna wa mbee, ĩndĩ wa kelĩ vaiĩ ũndũ waĩ atonya kwĩka akaũmina. Ũndũ wa mbee, atwaanĩw’e na kĩveti kĩngĩ, na mwĩue wake nĩwamũmenete. Naw’o ũndũ wa kelĩ nĩ kana aĩ ngũngũ. Ũsu nĩ ũndũ ũte laisi kwa mũndũ mũka o na wĩva ũla wendaa kwĩthĩwa na syana. O na ĩngĩ, kwosana na syĩthĩo sya ĩvinda ya Aana, ũsu waĩ ũndũ wa kũmakya mũno. Kĩla mũsyĩ nĩweethĩawa wĩkwatĩtye kwĩthĩwa na syana nĩ kana ũendeesye ĩsyĩtwa yaw’o. Mũndũ mũka ate na syana ndanengawe ndaĩa na nĩwavũthĩtw’e mũno.

⁴ Aana nũtonya kwĩthĩwa oomĩanĩisye na ũndũ ũsu nesa ta keka Venina ndamũthĩnasya. Mũtwaano wa aka matwaanĩw’e ndwaĩ laisi. Kaingĩ, mĩtwaanonĩ ta ĩsu nĩkweethĩawa na masindano, ĩteta, o na kwĩw’anĩa woo. Ũndũ ũsu waĩ kĩvathũkany’o vyũ na mũtwaano ũla Ngai  wambĩĩisye mũũndanĩ wa Eteni. (Mwa. 2:24) Mbivilia nĩleanĩte vyũ na mũtwaano wa aka aingĩ, na nĩtũmĩĩte ngelekany’o ya mũsyĩ wa Elikana kwonany’a ũndũ mĩtwaano ya mũthemba ũsu yĩthĩawa ĩilye.

5. Nĩkĩ Venina wendaa Aana athĩne, na eekaa ata nĩ kana amwĩw’ĩthye woo?

⁵ Elikana endete Aana kwĩ mwĩue. Mavuku ala maeleasya ĩũlũ wa Ayuti, monanĩtye kana Elikana ambie kũtwaa Aana na ĩtina esa kũtwaa Venina. Ĩndĩ o na ethĩwa vailye ata, Venina amwĩw’ĩaa Aana kĩwĩu kingĩ mũno, na nĩwamanthaa nzĩa syonthe ila ũtonya amwĩw’ĩthye woo. Nzĩa ĩla nene Venina watũmĩaa nĩ kũmũthekeea nũndũ aĩ ngũngũ. Venina nĩwaendeeie kwĩthĩwa na syana mbingĩ, na kĩu kyatuma ambĩĩa kwĩyonaa e wa vata mũno. Vandũ va Venina kwĩw’ĩa Aana tei na aimũkiakisya nũndũ ndatonya kũsyaa, atwie kũtũmĩa ũndũ ũsu kũmũũmĩsya. Mbivilia yaĩtye kana Venina aĩ nthũ yake yamũthĩnasya mũno nĩ kana “ĩtumae eew’a woo.” (1 Sam. 1:6) Venina eekaa ũu na ngũlũ. Kĩeleelo kyake kyaĩ kwĩw’ĩthya Aana woo, na nĩweekie ũu.

6, 7. (a) O na kau Elikana nĩwatatie mũno kũkiakisya mũka wake, nĩ kyaũ kĩtonya kwĩthĩwa kyatumie Aana atamũtavya maũndũ onthe? (b) We Yeova nĩwamũmenete Aana nĩkwĩthĩwa aĩ ngũngũ? Elesya. (Sisya maelesyo ma kwongeleela.)

⁶ Veonekana Venina nĩwendete mũno kũthĩny’a Aana kĩla mwaka ĩvinda ya kũthi Silo. Elikana nĩwaanĩasya Venina vamwe na “ana make na eĩtu make onthe” ilungu sya kũthi kũmumĩsya Yeova ta nthembo. Ĩndĩ Aana, ũla wendetwe mũno, aaĩawa kũndũ kwĩlĩ. Venina nĩwakwatawa nĩ kĩwĩu kingĩ na ayambĩĩa kũlilikany’a Aana kana aĩ ngũngũ, na kĩu kĩituma Aana aĩa mũno nginya o na akaemwa nĩ lĩu. Vai ũndũ Elikana waĩ eka akamina thĩna wa Aana, ĩndĩ yĩla wamanyie kana mũka wake, ũla wamwendete mũno, nũkwĩw’a aithĩnĩka nginya akaemwa nĩ kũya, nĩwatatie kũmũkiakisya. Amũkũlilye atĩĩ: “Aana, nĩkĩ ũkũĩa? na nĩkĩ ũteũya? na nĩkĩ ngoo yaku yĩ na woo? nyie ndi mũseo kwaku kũvĩtũka ana ĩkũmi?”—1 Sam. 1:4-8.

⁷ O na kau tũyĩsĩ ũndũ Elikana wathĩnĩkĩie kĩmena kya Venina, nĩwamanyie kana thĩna wa Aana waumanĩte na kwĩthĩwa e ngũngũ. Na vate nzika, Aana nĩwatanie mũno aĩkĩĩthw’a kana nĩwendetwe. * Ĩndĩ Elikana ndaaneenea kĩmena kya Venina. O na vai vandũ  Mbivilia yonanĩtye kana Aana nĩwamũtavisye ĩũlũ wa ũndũ ũsu. Nĩvatonyeka Aana akethĩwa asũanĩaa kana avuany’a ũndũ ũsu eĩka kũthũkĩĩsya maũndũ. Vo ve ũndũ Elikana waĩ atonya kwĩka akalũnga maũndũ? Yo nĩvatonyeka kwĩka ũu kũkethĩwa kwesaa kũtuma kĩmena kya Venina kyongelekeela, na syana syake vamwe na athũkũmi make mayambĩĩa kũatĩĩa ngelekany’o ĩsu yake nthũku? Kwĩka ũu kwesaa o kũtuma Aana ew’a e mũmene vyũ nthĩnĩ wa mũsyĩ wake.

8. Yĩla wamenwa kana weekwa ũndũ ũtaĩle, nĩkĩ ne ũndũ wa kũkiakisya kũlilikana kana Yeova nĩ Ngai ũsilaa katĩ?

⁸ Elikana ethĩwe nĩwamanyie kana ndaamanya maũndũ onthe ala Venina weekaa Aana, Yeova Ngai nĩweene. Ndeto yake nĩyonanĩtye kana nĩweene maũndũ onthe. Kwoou ngewa ĩno yĩ na ũkany’o mũito kwa onthe ala matanĩaa, o na ethĩwa no tũmaũndũ tũkwoneka twĩ tũnini, ĩndĩ tũkwonany’a mũndũ e na kĩwĩu kana kĩmena. Na ĩngĩ, nĩ ũndũ wa kũkiakisya kwa onthe ala mathĩnaw’a mana na mendete mũuo ta Aana, kũmanya kana Ngai ũla ũsilaa katĩ nĩwene maũndũ onthe na akamalũnga ĩvindanĩ yĩla yaĩle na kwa nzĩa ĩla yaĩle. (Soma Kũtũngĩlĩlwa Kwa Mĩao 32:4.) Nĩvatonyeka Aana akethĩwa eesĩ kĩu nũndũ, nĩwamũkũlilye Yeova amũtetheesye.

9. Kũmanya kana Aana nĩwaendie Silo o esĩ kĩla Venina ũkwĩka kwĩtũmanyĩsya kyaũ?

⁹ Yĩla mũthenya wa kũthi Silo wavikie, andũ ma mũsyĩ wa Elikana nĩmaamũkie kwakya tene nĩ kana meyũmbany’e. Kĩla ũmwe, o na kũvika syana, maendeee kwĩvanga kwondũ wa kyalo kĩu. Elikana na mũsyĩ wake mekalaa ndũanĩ ya Lama, na kuma kwoo kũthi Silo, vaĩ mũendo wa maili mbee wa 20 (kĩlomita 32) makĩlanĩlye nthĩ yĩ iĩma ya Evalaimu. Kyalo kĩu kyakuaa mũthenya ũmwe kana ĩlĩ mũndũ aendete na maaũ. Aana nĩweesĩ nesa ki ũndũ Venina ũkwĩka. Ĩndĩ o na vailye ũu, Aana ndaatiwa mũsyĩ. Kwoou nĩweekĩĩie athũkũmi ma Ngai ngelekany’o nzeo mũno ũmũnthĩ. Ti ũndũ wa ũĩ kwĩtĩkĩlya mavĩtyo ma andũ angĩ matume tũeka kwĩka maũndũ ma ũthaithi. Tũkeka ũu, twĩthĩwa tũikosa moathimo ala matonya kũtwĩkĩa vinya tũmĩĩsye yĩla tũũthĩnw’a.

10, 11. (a) Nĩkĩ Aana waendie ĩkalũnĩ mamina kũya oou? (b) Aana amũtulũĩle Ĩthe wake wa ĩtunĩ ngoo yake ata?

¹⁰ Ĩtina wa mũsyĩ wa Elikana kũthi kyalo kya mũthenya mũima mesĩle nzĩanĩ syĩlingĩlĩte iĩmanĩ, nĩmavikie Silo. Ndũa ĩsu yathyũlũlũkĩtwe nĩ iĩma. Nĩvatonyeka me nzĩanĩ Aana akethĩwa asũanĩaa kĩla ũkwĩsa kũtavya Yeova mboyanĩ. Mavika, nĩmekalile nthĩ onthe nĩ kana maye. Mamina kũya oou, Aana nĩwookĩlile athi ĩkalũnĩ nĩ kana aneene na Yeova. Mũthembi mũnene, ũla weetawa Eli ekalĩte vakuvĩ na mũomo wa ĩkalũ. Ĩndĩ Aana ndaamwona nũndũ akwetye kũsũanĩa ĩũlũ wa Ngai wake. Aana e vau nthĩnĩ ĩkalũnĩ eew’aa e mwĩanĩe vyũ  ate na nzika kana nũkwĩthukĩĩw’a. O na ethĩwa vayaĩ mũndũ waĩ atonya kũelewa thĩna ũla waĩ naw’o, Ĩthe wake wa ĩtunĩ ndaĩ alea kũelewa. Woo mwingĩ ũla waĩ ngoonĩ yake nĩwatumie ambĩĩa kũĩa.

¹¹ Aana nĩwambĩĩie kũneena na Yeova mboyanĩ, o na kau saa isu mwĩĩ wake nĩwathĩlĩaa nĩ kĩĩo kĩla waĩ nakyo. Ilomo syake nĩsyanyaunyasya aendeee kũneena ngoonĩ ndeto ila wamũtavasya Yeova aimũelesya woo ũla weew’ĩte. Aana nĩwavoyie kwa ĩvinda yĩasa aimũtulũĩla Ĩthe wake kyonthe kĩla kyaĩ ngoonĩ yake. Na ve ũndũ ũngĩ wamũtavisye Ngai eka o kũmũelesya wendi wake wa kwĩthĩwa na syana. O na kau nĩwendaa mũno Ngai amũathime, nĩwalilikene kana o nake nĩwaĩle kũmũnenga kyonthe kĩla ũtonya. Na kwoou eevĩta, asya kana ethĩwa Yeova akamũnenga kana kavĩsĩ, akakanengane kamũthũkũme.—1 Sam. 1:9-11.

12. O tondũ ngelekany’o ya Aana yonanĩtye, twaĩle kũlilikanaa kyaũ yĩla tũũvoya?

¹² Aana nĩwatiĩe athũkũmi ma Ngai ngelekany’o nzeo ĩkonetye mboya. Yeova nũthoketye andũ make mamũvoye na maimũtulũĩla kĩla kĩ ngoonĩ mateũmũvitha kĩndũ, o tondũ kana kekaa kwa mũsyai wako kamũĩkĩĩe na ũkendete. (Soma Savuli 62:8; 1 Athesalonika 5:17.) Mũtũmwa Vetelo nĩwaveveeiwe kũandĩka ndeto ii itonya kũtwĩkĩa vinya tũimũvoya Yeova: “Mũimwiĩa kwĩmakĩa kwenyu kw’onthe, nũndũ nũmũthĩnĩkĩaa.”—1 Vet. 5:7.

13, 14. (a) Nĩ kyaũ Eli wailĩĩile Aana, na nĩkĩ? (b) Ũsũngĩo ũla Aana wanengie Eli wĩonany’a ata kana aĩ na mũĩkĩĩo mũlũmu?

¹³ Andũ mayĩsa kũelewa na kwĩthĩwa na tei ta Yeova. Yĩla Aana wavoyaa aendeee kũĩa, nĩwatelemilw’e nĩ wasya wa mũndũ. Waĩ wasya wa Mũthembi Mũnene Eli, ũla wamũsyaĩĩsye aendeee kũvoya. Amũkũlilye atĩĩ: “Wĩĩkala wĩ mũnywi kũvika ĩndĩĩ? veta kũasa naku mbinyu yaku.” Eli nĩwoonete ilomo sya Aana iinyaunyia na aiĩa e na woo mwingĩ. Vandũ va kũmũkũlya nĩ kyaũ kyamũthĩnasya, atĩ Eli eekie kwĩyusũĩĩsya kana aĩ mũmile!—1 Sam. 1:12-14.

¹⁴ Wĩona Aana ta waũmĩie mũno wĩana ata ailĩĩlwa ũndũ ũsu ũte wa w’o nĩ mũndũ wĩ na kĩanda kya kũnengwa ndaĩa? Ĩndĩ o na vailye ũu, nĩwatũtiĩie ngelekany’o nzeo mũno ya mũĩkĩĩo. Aana ndaaĩtĩkĩlya mavĩtyo ma mũndũ ũngĩ mamũtũle ngoo aeke kũmũthaitha Yeova. Nĩwamũsũngĩie Eli e na ndaĩa mbingĩ, na amũelesya kĩla kyamũthĩnasya. Yĩla Eli wamanyie kana nĩwavĩtya, nĩvatonyeka akethĩwa aneenisye Aana na wasya wĩ nthĩ aimũtavya ndeto ii: “Enda na mũuo; na Ngai wa Isilaeli nakũnenge ũndũ ũsu waku wamũvoya.”—1 Sam. 1:15-17.

15, 16. (a) Veethĩiwe ata ĩtina wa Aana kũmũtulũĩla Yeova ngoo yake na kũmũthaitha ĩkalũnĩ? (b) Ngelekany’o ya Aana ĩtonya kũtũtethya ata yĩla twĩ na ũndũ ũũtũthĩny’a ngoonĩ?

¹⁵ Veethĩiwe ata ĩtina wa Aana kũmũtulũĩla Yeova kyonthe kĩla kyaĩ ngoonĩ yake na kũmũthaitha ĩkalũnĩ? Mbivilia ĩendeee kwasya  atĩĩ: “Kwondũ wa ũu kĩveti [kĩu] kyathi, na kyaya; na ũthyũ wakyo ndwaatuka ĩngĩ.” (1 Sam. 1:18) Aana nĩweewie ausya. Eewie ta waaũa mũio ũsu wakuĩte na aũilĩĩla ituonĩ sya Ĩthe wake wa ĩtunĩ, ũla wĩ vinya kwĩ we. (Soma Savuli 55:22.) Vo ve thĩna ũtonya kũmũema Yeova? Aiee, Yeova ndaaemwa, na ndakaemwa o na ĩndĩĩ nĩ kũtetheesya andũ make!

¹⁶ Yĩla tũitavĩwe nĩ maũndũ, kana twĩmakĩĩte, nũseo tũkaatĩĩa ngelekany’o ya Aana kwa kũneena na Yeova mboyanĩ tũteũmũvitha kĩndũ, nũndũ Mbivilia yaasya kana “we [nĩ] ũla wĩw’aa mboya.” (Sav. 65:2) Tweeka ũu, o naitũ tũkew’aa kwĩmakĩa kwitũ kwathela na tũyusũwa nĩ “mũuo wa Ngai ũla ũvĩtũkĩte ũmanyi w’onthe.”—Avi. 4:6, 7.

17, 18. (a) Elikana akwatie mbau wĩvĩto wa Aana ata? (b) Nĩ kyaũ Venina ũtaĩ atonya kwĩka Aana ĩngĩ?

¹⁷ Ũnĩ wake kwakya, Aana nĩwasyokie ĩkalũnĩ e na mũũme wake Elikana. Nĩvatonyeka akethĩwa atavisye mũũme kĩla wamũvoyete Yeova na wĩvĩto ũla weevĩtĩte, nũndũ kwosana na Mĩao ya Mose mũũme aĩ na ũkũmũ wa kũleana na wĩvĩto wa mũka ethĩwa ekie ũu vate lũũsa wake. (Mot. 30:10-15) Ĩndĩ mũndũũme ũsu waĩ mũĩkĩĩku ndaatata kwĩka ũu. Vandũ va ũu, kwonany’a kana nĩweetĩkĩlanile na mũka, nĩmamũthaithĩie Yeova vau ĩkalũnĩ me vamwe matanamba kwĩnũka.

¹⁸ We Venina esie kũmanya ĩndĩĩ kana maũndũ ala weekaa Aana yu maiũmũthatya? Mbivilia ndĩwetete, ĩndĩ yaĩtye kana ‘ũthyũ wake ndwaatuka ĩngĩ,’ kwonany’a kana Aana nĩwasyokeiwe nĩ ũtanu wake na aeka kũmakw’a nĩ mathĩna make kuma vau na kũendeea. O na kau tũimanya nesa Venina amanyie ũu ĩndĩĩ, veonekana vayaavĩta ĩvinda yĩasa atamanyĩte kana maũndũ ala weekaa Aana nĩmaekete kũmũthatya. O na kuma vau Mbivilia ndĩwetete ĩsyĩtwa yake ĩngĩ.

19. Aana aathimiwe ata, na oonanisye ata kana nĩwamũtũngĩaa mũvea ũla wamũnengete ũathimo ũsu?

¹⁹ O ũndũ myei yaendeeie kũvĩta, now’o ũtanu wa Aana waendeeie kwongeleka na aendeea kwĩthĩwa na mũuo wa kĩlĩko. Nĩwesie kũitava! Ĩndĩ ndaatana akolwa nĩ vala ũathimo ũsu waumĩte. Na kĩtumi nũndũ yĩla wesie kũsyaa kavĩsĩ aketie Samueli, na ũalyũlo wa ĩsyĩtwa yĩu nĩ “Ĩsyĩtwa ya Ngai.” Veonekana aketie ũu nĩkwĩthĩwa yĩla waĩ thĩnanĩ eekaĩlile ĩsyĩtwa ya Ngai. Mwaka ũsu, Elikana na andũ ala angĩ ma mũsyĩ maithi Silo, Aana ndaathi. Ekalile mũsyĩ aiea mwana wake, na amũeie nginya yĩla wamũaĩĩisye ĩtina wa myaka ĩtatũ. Mũthenya wa kũtwaa mwana ũsu wamwendete ĩkalũnĩ nĩwesie kũvika, na ĩndĩ Aana eenenga vinya eanĩsye kĩla weevĩtĩte. Ĩndĩ vayaĩ laisi!

20. Aana na Elikana meanĩisye ata wĩvĩto ũla meevĩtĩte kwa Yeova?

²⁰ Ndwaĩ ũndũ wĩ laisi Aana kũtiana na mwana wake. Vate nzika, Aana nĩweesĩ kana Samueli nũkũsũvĩwa nesa e kũu Silo. Noĩthwa  eesĩ kana no asũvĩwe nĩ aka amwe ala mathũkũmaa ĩkalũnĩ. Ĩndĩ o na vailye ũu, mwana ũsu aĩ o mũnini, na vai mũndũ mũka ũtenda kwĩkala na mwana wake. O vamwe na maũndũ asu onthe, Aana na Elikana nĩmatwaie kavĩsĩ kau ĩkalũnĩ kwa ngenda mateũlasimĩthw’a nĩ mũndũ. Nĩmaumisye nthembo nyũmbanĩ ya Ngai, na ĩndĩ mamũnengane Samueli kũla kwĩ Eli, na mamũlilikany’a ĩũlũ wa wĩvĩto ũla Aana weevĩtĩte myaka yĩana ũna mĩvĩtu.

21. Mboya ĩla Aana waumisye yonanĩtye ata kana aĩ na mũĩkĩĩo mũlũmu? (O na ĩngĩ, sisya ĩsandũkũ yĩ na kyongo, “ Mboya Ilĩ sya Mwanya.”)

²¹ Ĩtina wa ũu, Aana nĩwaumisye mboya nzeo mũno, ĩla Ngai woonie yaĩle kũandĩkwa Ndetonĩ yake mbeveee. Ũisoma ndeto sya mboya ĩsu nthĩnĩ wa 1 Samueli 2:1-10, nũkwona kana Aana aĩ na mũĩkĩĩo mũlũmu mũno. Mboyanĩ ĩsu nũmũkathĩte Yeova nũndũ wa kũtũmĩa vinya wake nesa. Nũeleetye kana nũtũmĩaa vinya wake kũtũnga ala me mĩyimbyo, kũathima ala meũthĩnw’a, o na kũaa kana kũthayũũkya. O na nũmũkumĩtye Ĩthe wake nũndũ wa ũtheu wake ũte maela, ũsili wake wa katĩ, na ũĩkĩĩku wake. Aana ndaĩ na nzika aineena ndeto ii: “Kũti ĩvia o na yĩva ta Ngai waitũ.” Yeova nĩ wa kwĩkwatw’a vyũ na ndavĩndũkaa, na onthe ala mathĩnaw’a na makekwa maũndũ mathũku no mamwĩkaĩle amatetheesye.

22, 23. (a) Nĩkĩ tũte na nzika kana Samueli aiana nĩweesĩ nĩwendetwe nĩ asyai make? (b) Yeova aendeeie kũathima Aana ata?

²² Waĩ ũathimo mũnene kwa Samueli kwĩthĩwa na inyia ũmwendete Yeova na wĩ na mũĩkĩĩo mũlũmu. O na kau aendeee kwĩana nĩweew’aa aikosa inyia, nĩweesĩ kana nũmũlilikanaa. Kĩla mwaka, Aana nĩwaendaa Silo, na aitwaĩa Samueli kakoti kate moko kala weethĩawa amũtumĩĩte nĩ kana akekĩae aithũkũma vau ĩkalũnĩ. Nthanga yonthe ĩla yaĩ kakotinĩ kau yoonanasya ũndũ Aana  wendete mwana ũsu na ũndũ wendaa kũmũsũvĩa. (Soma 1 Samueli 2:19.) Kwatata kũkũna visa Aana ayĩkĩa mwana wake kakoti kau na aikatambũũkangya, na ĩndĩ aisisya Samueli na metho ma tei aimũtavya tũteto tũseo twa kũmwĩkĩa vinya. Kwa w’o, Samueli nĩwaathimĩtwe na inyia mũseo, nake nĩweethĩiwe e ũathimo mũnene kwa asyai make na kwa Isilaeli yonthe.

²³ O nake Aana ndaaũla. Yeova nĩwamũnengie ũtonyi wa kũsyaa, na asyaĩa Elikana syana ingĩ itano. (1 Sam. 2:21) O na vailye ũu, nĩvatonyeka ũndũ ũla watanĩthisye Aana vyũ ũkethĩwa waĩ ngwatanĩo ndũmu ĩla waendeeie kwĩthĩwa nayo vamwe na Ĩthe wake, Yeova. O naku no wĩthĩwe na ngwatanĩo ndũmu na Yeova waendeea kũatĩĩa ngelekany’o nzeo ya Aana.