1 Vetelo 3:1-22
3 O ta ũu, inyw’ĩ iveti, ĩnyivĩsyei aũme menyu, nĩ kana ethĩwa ve amwe mate ewi ma ĩla ndeto, matonye kũkusw’a nĩ mwĩkalĩle wa iveti syoo vate ndeto,
2 nĩkwĩthĩwa nĩmeyoneete mwĩkalĩle wenyu mũtheu o vamwe na ndaĩa nene.
3 Kwĩyanakavya kwenyu kũikethĩwe kũla kwonekaa ũtheinĩ ta kũsuka nzw’ĩĩ na kwĩkĩa syĩndũ sya kwĩyanakavya sya thaavu kana ngũa nzeo,
4 ĩndĩ nĩkwĩthĩwe kwa mũndũ wa nthĩnĩ ũla ũtonekaa, ĩĩ, kwĩyanakavya kũla kũtanangĩkaa kwa veva wa wĩnyivyo na ũuu, ũla nĩ wa vata mũno methonĩ ma Ngai.
5 Nũndũ ũu nĩw’o aka atheu ma tene ala mamwĩkwatĩtye Ngai meeyanakavasya na kwĩnyivĩsya aũme moo,
6 o tondũ Sala wamwĩw’aa Avalaamu na kũmwĩta mwĩaĩi. Nenyu nĩmũtw’ĩkĩte syana syake, ethĩwa nĩmũkũendeea kwĩka ũla ũseo mũteũkĩa.
7 O ta ũu, inyw’ĩ aũme endeeai kwĩkala na iveti syenyu kwosana na ũmanyi. Inengei ndaĩa ta mũio ũte na vinya mũno, nũndũ mwĩ atiĩwa vamwe nasyo ma thayũ ũla wumanaa na ũseo mwingĩ wa Ngai, nĩ kana mboya syenyu iikasiĩĩwe.
8 Na mũthya, inyw’onthe ĩthĩwai na kĩsũanĩo kĩmwe, ĩw’anĩai tei, na mũyĩthĩwa na wendo wa ana-a-asa, o vamwe na ĩnee na wĩnyivyo.
9 Mũikaĩvanĩsye ũthũku kwa ũthũku kana kwĩyĩumĩa mwaumwa. Vandũ va ũu, maathimei ala meũmwĩka ũu, nĩkwĩthĩwa mweetĩiwe ũndũ ũsu, nĩ kana mwĩthĩwe mũtonya kũkwata ũathimo.
10 Nũndũ “mũndũ o na wĩva ũla ũkwenda thayũ na kwona mĩthenya mĩseo, no nginya asũvĩe ũĩmĩ wake kumana na ũthũku na aisũvĩa ilomo syake iikaneene ũvũngũ.
11 Nĩevathane na ũla ũthũku na ayĩka ũla ũseo; namanthe mũuo na kũũatĩĩa.
12 Nĩkwĩthĩwa metho ma Yeova masiasya ala alũngalu, na matũ make nĩmethukĩĩasya mboya syoo sya kĩthing’ĩĩsyo, ĩndĩ Yeova ndendeeaw’a nĩ ala mekaa maũndũ mathũku.”
13 Nũũ ũla wĩmwĩka ũndũ mũthũku mweethĩwa na kĩthito kwondũ wa ũla ũseo?
14 Ĩndĩ o na ethĩwa mũkathĩnw’a kwondũ wa ũlũngalu, mwĩ na ũtanu. O na vailye ũu, mũikakĩe kĩla makĩaa,* o na mũikathĩnĩke.
15 Mwĩtĩkĩlei Klĩsto ethĩwe Mwĩaĩi ngoonĩ syenyu, na mavinda onthe mũyĩthĩwa mwĩyũmbanĩtye kwĩtetea mbee wa mũndũ o na wĩva ũkwenda kũmanya kĩtumi kya kwĩthĩwa na wĩkwatyo ũla mwĩ naw’o, ĩndĩ mũyĩka ũu mwĩ na ũuu na ndaĩa nene.
16 Ĩthĩwai na wasya mũseo wa ngoo, nĩ kana o na mwaneenewa naĩ kwa nzĩa o na yĩva, ala meũmũneenea naĩ mekĩĩthw’e nthoni nũndũ wa mwĩkalĩle wenyu mũseo nĩkwĩthĩwa mwĩ aatĩĩi ma Klĩsto.
17 Nũndũ nĩ kavaa kũthĩnw’a nũndũ wa kwĩka maũndũ maseo, ethĩwa nĩ kwenda kwa Ngai ũu wĩthĩwe, kwĩ kũthĩnw’a nũndũ wa kwĩka maũndũ mathũku.
18 Nĩkwĩthĩwa Klĩsto akwie ĩvinda o yĩmwe nĩ kana avete naĩ, atakakw’a ĩngĩ, mũndũ mũlũngalu kwondũ wa andũ mate alũngalu, nĩ kana amwĩw’anĩthye na Ngai. Ooaiwe nthĩnĩ wa mwĩĩ ĩndĩ athayũũkw’a nthĩnĩ wa veva.
19 Na e nthĩnĩ wa veva nĩwaendie na atavya maveva ala me kyovonĩ ũvoo wa ũsilĩlo,
20 ala vau mbeenĩ meethĩiwe mate ewi yĩla Ngai weeteele na wũmĩĩsyo ĩvindanĩ ya Noa, ĩvinda yĩla ngalawa yaendeee kwakwa, na nthĩnĩ wayo andũ anini, namo nĩ andũ nyanya, nĩmatangĩĩiwe kumana na kĩla kĩw’ũ kingĩ.
21 Ũvatiso, ũla ũvw’anene na ũndũ ũsu, o naw’o yu nũũmũtangĩĩa (ti kwa kũveta kĩko kya mwĩĩ, ĩndĩ nĩ kũmwĩsũva Ngai amũnenge wasya mũseo wa ngoo), kwĩsĩla ũthayũũkyo wa Yesũ Klĩsto.
22 E kw’okonĩ kwa aũme kwa Ngai nũndũ nĩwaendie ĩtunĩ, na alaĩka na mokũmũ na monene nĩmaiiwe ungu wake.
Maelesyo ma kwongeleela
^ Kana nĩvatonyeka, “mũikakĩe motĩsyo moo.”
