Meko ma Atũmwa 1:1-26
1 Ũvoo ũla nakũandĩkĩie mbee, Theovilo, waĩ ĩũlũ wa maũndũ onthe ala Yesũ wambĩlĩĩilye kwĩka na kũmanyĩsya
2 nginya mũthenya ũla wambatiw’e ĩũlũ, ĩtina wa kũmeaĩa kwĩsĩla veva mũtheu atũmwa make ala wanyuvĩte.
3 Ĩtina wa kũthĩnw’a, nĩwamaumĩlĩĩile mavinda maingĩ kwa nzĩa ikũĩkĩĩthya nesa vyũ kana aĩ thayũ. Na kwa ĩvinda ya mĩthenya 40 nĩmamwonaa, na nĩwaneenaa ĩũlũ wa Ũsumbĩ wa Ngai.
4 Na ombanĩte namo nĩwameaĩe atĩĩ: “Mũikaume Yelusaleme, ĩndĩ endeeai kweteela kĩla Asa wathanie, kĩla nyie namũtavisye;
5 nĩkwĩthĩwa Yoana avatisaa na kĩw’ũ, ĩndĩ inyw’ĩ mũkavatiswa na veva mũtheu ĩtina wa mĩthenya mĩnini.”
6 Na mombanĩte ĩngĩ, mamũkũlya: “Mwĩaĩi, wĩtũngĩa Isilaeli ũsumbĩ ĩvindanĩ yĩĩ?”
7 Nake amea: “Ti ĩũlũ wenyu kũmanya saa kana mavinda ala Asa ũtw’ĩte.*
8 Ĩndĩ mũkakwata vinya yĩla veva mũtheu wĩũka ĩũlũ wenyu, na mũkeethĩwa mwĩ ngũsĩ syakwa Yelusaleme, Yutia yonthe, na Samalia, na kũvika itulu sya nthĩ.”
9 Ĩtina wa kũweta maũndũ asu, o maendeee na kũsyaĩĩsya, ookĩlw’a ĩũlũ na ĩtu yamũvw’ĩka na maeka kũmwona.
10 Na maendeee kũsyaĩĩsya yayayanĩ, o mĩtũkĩ aũme elĩ mekĩe ngũa nzaũ maũngama vakuvĩ namo,
11 na mamea: “Aũme ma Kalilii, nĩkĩ mũũngamĩte mũsyaĩtye yayayanĩ? Yesũ ũsu wooswa kuma vala mũĩ na ambatw’a ĩtunĩ akasyoka oou mwoona aithi ĩtunĩ.”
12 Na ĩndĩ masyoka Yelusaleme kuma Kĩĩmanĩ kya Mĩthata kĩla kĩ vakuvĩ na Yelusaleme, ũasa wa kĩlomita o kĩmwe.*
13 Na yĩla mavikie, mambata nyũmbanĩ ya ĩũlũ vala mekalaa. Ala maĩ vo nĩ: Vetelo, Yoana, Yakovo, Endelea, Vilivu, Thoma, Valitholomayo, Mathayo, Yakovo mwana wa Alivaio, Simoni ũla wĩtawa mũndũ wĩ kĩthito, na Yutasi mwana wa Yakovo.
14 Na onthe nĩmavoyaa na kĩthing’ĩĩsyo me na kĩeleelo kĩmwe, na maĩ vamwe na Meli inyia wa Yesũ na ana-a-inyia make, o vamwe na aka angĩ.
15 Na ĩvindanĩ yĩu Vetelo aũngama katĩ wa ana-a-asa (onthe ala maĩ vo maĩ ta andũ 120), na asya:
16 “Ana-a-asa, waĩ ũndũ wa vata ĩandĩko yĩanĩe yĩla veva mũtheu waneenie kwa nzĩa ya wathani kwĩsĩla Ndaviti ĩũlũ wa Yutasi, ũla watongoeisye ala mamũkwatie Yesũ.
17 Nũndũ nĩwatalĩtwe katĩ witũ, na nĩwakwatĩte kĩanda ũthũkũminĩ ũũ.
18 (Na mũndũ ũsu nĩwathooie kĩtheka na ĩtuvi yĩte ya ũlũngalu, na nĩwavalũkile na mũtwe, na aatũkanĩla katĩ na maa make onthe metĩka.
19 Na ũndũ ũsu wamanyĩka nĩ ekali onthe ma Yelusaleme, na nũndũ wa ũu kĩtheka kĩu kyeetwa kwa kĩthyomo kyoo Akelitama, ũalyũlo wayo nĩ, “Kĩtheka kya Nthakame.”)
20 Nũndũ ĩvukunĩ ya Savuli nĩkũandĩkĩtwe, ‘Eka wĩkalo wake wĩthĩwe ũte mũtũe, na vaikethĩwe mũndũ nthĩnĩ waw’o’ na, ‘Wĩa wake wa ũsyaĩĩsya nĩwoswe nĩ mũndũ ũngĩ.’
21 Kwondũ wa ũu, ve vata wa ũmwe katĩ wa ala maendanasya naitũ ĩvinda yonthe yĩla Mwĩaĩi Yesũ waendeee na wĩa wake katĩ witũ,
22 kuma ĩvinda yĩla wavatisiwe nĩ Yoana nginya mũthenya ũla woosiwe kuma kwitũ, ethĩwe ngũsĩ vamwe naitũ ĩũlũ wa kũthayũũka kwake.”
23 Kwoou maũngamya aũme elĩ, Yosevu ũla weetawa Valisava na nowe weetawa Yusito, vamwe na Mathia.
24 Na ĩndĩ mavoya, makyasya: “Ame Yeova! We ũla wĩsĩ ngoo sya onthe, twony’e nĩ wĩva katĩ wa aũme aa elĩ ũla ũnyuvĩte
25 ose ũthũkũmi na ũtũme ũla Yutasi watiie na athi maũndũnĩ make mwene.”
26 Kwoou makũna kula na yamũvalũkĩla Mathia, na atalwa vamwe na ala atũmwa 11.
Maelesyo ma kwongeleela
^ Ndeto kwa ndeto, “ala Asa wiĩte ũkũmũnĩ wake mwene.”
^ Ndeto kwa ndeto, “mũendo wa mũthenya wa Savato.” Ũasa ũla Mũyuti weetĩkĩlĩtw’e kũthi mũthenya wa Savato.
