ФІымрэ Іеймрэ. Библием дзыхь хуэпщІ хъунущ
Унафэ гуэр къыщытщтэм деж фІымрэ Іеймрэ теухуауэ дэ езым диІэ еплъыкІэр абы лъабжьэ худощІ е нэгъуэщІхэм я еплъыкІэм тету унафэ къыдощтэ. Ауэ апхуэдэ бгъэдыхьэкІэм сыт щыгъуи фІым ухуишэу пхужыІэнукъым. Апхуэдэу къыщІэхъум и щхьэусыгъуэр Библием къыдгурегъаІуэ икІи, псом нэхъапэращи, ди гъащІэр нэгъэсауэ насыпыфІэ зыщІыну чэнджэщ гурыІуэгъуэхэр абы итщ.
ДЭ ДЭІЭПЫКЪУЭГЪУ ДЫХУЭНЫКЪУЭЩ
Псори къэзыгъэщІа Алыхь Иеговэ a и Псалъэ БиблиемкІэ къыдгурегъаІуэ цІыхухэр я акъыл закъуэкІэ зэрымыпсэуфынур икІи дэ абы и дэІэпыкъуэгъум дызэрыхуэныкъуэр (Иеремия 10:23). Аращ Алыхьым Библиер къыщІыдитар — ар къыддоІэпыкъу сытыр фІыми, сытыр Іейми зэхэдгъэкІыну. Иеговэ цІыхухэр фІыуэ елъагъу икІи зэран къытхуэхъуну унафэхэм дыщихъумэну хуейщ (Второзаконие 5:29; 1 Иуан 4:8). Иджыри гъащІэ къыдэзыта ди Адэм и Іущагъымрэ и щІэныгъэмрэ гъунэ иІэкъыми, чэнджэщ нэхъыфІ дыдэр къыдэзытыфынур аращ (Псалом 100:3; 104:24). Апхуэдэу щытми, Алыхьым цІыхухэр хигъэзыхькъым и хабзэхэм тету псэуну.
Иеговэ япэ цІыхуитІым, Іэдэмрэ Хьэуарэ, насыпыфІэу щытын щхьэкІэ зыхуэныкъуэу хъуар яритат (ЩІэдзапІэ 1:28, 29; 2:8, 15). Иджыри Алыхьым япэ цІыхуитІым ящІэ хъунымрэ мыхъунымрэ теухуауэ унафэ яритауэ щытащ икІи а унафэхэр бгъэзэщІэну гугъутэкъым. Ауэ абыхэм тетынрэ темытынрэ езыхэм унафэ ящІыжыну хуитыныгъи яритат (ЩІэдзапІэ 2:9, 16, 17). Ди жагъуэ зэрыхъунщи, Іэдэмрэ Хьэуарэ Алыхьым и хабзэм темыту, езыхэр зэрыхуейм хуэдэу псэуну мурад ящІащ (ЩІэдзапІэ 3:6). Сыт-тІэ абы ахэр зыхуишар? ФІымрэ Іеймрэ езыхэм зэхагъэкІыу хъуа иужь, абыхэм я гъащІэр нэхъыфІ хъуа? Хьэуэ, хъуакъым. Абы лъандэрэ цІыхухэм я гъащІэр къызэрекІуэкІам къегъэлъагъуэ Алыхьым и хабзэхэр ІэщІыб зыщІхэм мамырыгъэрэ насып нэгъэсарэ зэрамыІэфынур (Экклезиаст 8:9).
ЦІыхур къызыхэкІа лъэпкъым икІи зыщІапІыкІа культурэм емылъытауэ, Іущагъ зыхэлъ унафэхэр къищтэну Библиер къыдэІэпыкъуфынущ (2 Тимофей 3:16, 17; « Псоми хуэгъэза тхылъ» жыхуиІэ рамкэм еплъ).
Библием «Тхьэм и псалъэкІэ» ущІеджэ хъунур къащІэ (1 Фессалоникэ 2:13). jw.org сайтым ит «Хэт Библиер къызыбгъэдэкІыр?» жыхуиІэ видеом еплъ.
АЛЫХЬЫМ И ЕПЛЪЫКІЭР КЪЭТЩІЭНУ БИБЛИЕР КЪЫЗЭРЫДДЭІЭПЫКЪУР
Иеговэ цІыхухэм зэрыхущытым теухуауэ Библием куэд итщ. Абы дыщеджэкІэ дэ къэтщІэфынущ Алыхьым и еплъыкІэкІэ сытыр фІыми, сытыр Іейми, абы нэмыщІ сыт зэран къытхуэхъунуми, сыт сэбэп къытхуэхъунуми дэ къыдгурыІуэнущ (Псалом 19:7, 11). А тхылъым ит Іущагъ зыхэлъ чэнджэщхэр сыт хуэдэ зэманми хуокІуэ икІи унафэ пэж къэтщтэну къыддоІэпыкъу.
Псалъэм папщІэ, Притчи 13:20 итым дегупсысынщ: «Іущхэм ныбжьэгъу хуэхъур Іущ хъунущ, акъылыншэм гъусэ хуэхъур бэлыхь хэхуэнущ». Мы чэнджэщыр пасэрей зэманми щхьэпэу щытащ, ди зэманми ар фІы дыдэу хуокІуэ. Библием гъащІэм къыщыпхуэсэбэпын апхуэдэ чэнджэщ куэд итщ. (« Библием ит Іущагъыр сыт хуэдэ зэманми хуокІуэ» жыхуиІэ рамкэм еплъ.)
Уэ мыпхуэдэу уегупсысынкІэ хъунущ: «Пэж дыдэу Библиер сэри къыздэІэпыкъуфыну?» жыпІэу. Библием цІыху куэдым я гъащІэр фІыкІэ ихъуэжащ. Абыхэм я щапхъэхэр къыкІэлъыкІуэ статьям къыщыхьащ.
a Тхыгъэ ЛъапІэм зэритымкІэ, Алыхь закъуэм и цІэр Иеговэщ (Псалом 83:18).
