Yohanɛɛsɩ takayaɣ kajalaɣ ñɩŋga 2:1-29
2 Men-piya cikpesi, mamaɣ-mɩ tɔm tʋnɛ se pɩsa nɛ ɩtaala kɩwɛɛkɩm. Ɛlɛ, ye nɔɔyʋ ɛlabɩ kɩwɛɛkɩm nabʋyʋ yɔ, ɖɩwɛnɩ sɩnɩyʋ* nɔɔyʋ Caa cɔlɔ, Yesu Krɩstʋ,+ weyi ɛkɛ siɣsiɣ tʋ yɔ.+
2 Nɛ ɛkɛ ceɣu kɩlaʋ*+ ɖa-kɩwɛɛkɩm yɔɔ,+ paa mbʋ yɔ pɩtɩkɛ ɖa-ñɩmbʋ ɖeke yɔɔ ɛlɛ ɛjaɖɛ kpeekpe ñɩmbʋ yɔɔ ɖɔɖɔ.+
3 Nɛ pʋnɛ ɖɩnaɣna se ɖɩkpɛlɩkaa nɛ ɖɩtɩlɩ-ɩ: ye ɖiwoki pɩ-yɔɔ nɛ ɖɩɖɔŋ ɛ-paɣtʋ yɔɔ yɔ.
4 Weyi ɛtɔŋ se: «Mɛnkpɛlɩkaa nɛ mantɩlɩ-ɩ,» ɛlɛ ɛɛɖɔŋ ɛ-paɣtʋ yɔɔ yɔ ɛkɛ cɛtɩyʋ, nɛ toovenim fɛyɩ ɛyʋ ɛnʋ ɛ-taa.
5 Ɛlɛ weyi ɛɖɔŋ ɛ-tɔm yɔɔ yɔ, toovenim taa lɛ Ɛsɔ sɔɔlɩm talɩ pilim ɛyʋ ɛnʋ ɛ-taa.+ Mbʋ ɖɩtɩlɩɣna se ɖa nɛ ɩ ɖɩwɛ nɔɔ kʋɖʋmaɣ.+
6 Weyi ɛtɔŋ se ɛ nɛ ɩ pɛwɛ nɔɔ kʋɖʋmaɣ tam yɔ, pɩkɛnɩ-ɩ kɩjɛyʋʋ se ewolo pɩ-yɔɔ nɛ ɛɖɔ ɛzɩ ɛlɛ ɖɔɖɔ ɛɛɖɔm yɔ.+
7 Man-kʋsɔɔlaa, pɩtɩkɛ paɣtʋ kɩfatʋ natʋyʋ manɖʋʋ-mɩ, ɛlɛ paɣtʋ kɩbɩndʋ ndʋ paaɖʋ-mɩ kpaɣnɩ ɖooo kiɖe tɛɛ yɔ.+ Paɣtʋ kɩbɩndʋ ndʋ, ndʋ lɛ tɔm ndʋ ɩnɩwa yɔ.
8 Pɩtasɩ lɛ, manɖʋʋ-mɩ paɣtʋ kɩfatʋ natʋyʋ, ndʋ tɩkɛ toovenim ɛ-hɔɔlʋʋ taa nɛ mɩ-hɔɔlʋʋ taa yɔ, mbʋ pʋyɔɔ yɔ cɩkpɛndʋʋ ɖiɣni ɖɛʋ nɛ ñalɩmɩyɛ toovenim ñɩnɖɛ tɛm paɣzʋʋ ñandʋʋ.+
9 Weyi ɛtɔŋ se ɛwɛ ñalɩmɩyɛ taa ɛlɛ ɛpaɖɩɣ+ e-koobu yɔ, ɛkpɛndɩ ɛwɛ cɩkpɛndʋʋ taa.+
10 Weyi ɛsɔɔlɩ e-koobu yɔ ɛwɛɣ ñalɩmɩyɛ taa tam,+ nɛ mbʋ pituuluu yɔ, pɩfɛyɩ ɛ-taa.
11 Ɛlɛ weyi ɛpaɖɩɣ e-koobu yɔ, ɛwɛ cɩkpɛndʋʋ taa nɛ eɖiɣni ɖɔm cɩkpɛndʋʋ taa,+ nɛ ɛɛsɩŋ ɖenɖe eɖiɣni wobu yɔ,+ mbʋ pʋyɔɔ yɔ cɩkpɛndʋʋ yʋlʋsɩ ɛ-ɛsa.
12 Piya cikpesi, mamaɣ-mɩ tɔm mbʋ pʋyɔɔ yɔ pekpeɣ-mɩ mɩ-kɩwɛɛkɩm ɛ-hɩɖɛ yɔɔ.+
13 Caanaa, mamaɣ-mɩ tɔm mbʋ pʋyɔɔ yɔ ɩkpɛlɩkaa nɛ ɩtɩlɩ weyi ɛɛwɛ kpaɣnɩ ɖooo kiɖe tɛɛ yɔ. Evebiya, mamaɣ-mɩ tɔm mbʋ pʋyɔɔ yɔ ɩwabɩ kañatʋ tʋ.+ Piya cikpesi, mamaɣ-mɩ tɔm mbʋ pʋyɔɔ yɔ ɩkpɛlɩkaa nɛ ɩtɩlɩ Caa.+
14 Caanaa, mamaɣ-mɩ tɔm mbʋ pʋyɔɔ yɔ ɩkpɛlɩkaa nɛ ɩtɩlɩ weyi ɛɛwɛ kpaɣnɩ ɖooo kiɖe tɛɛ yɔ. Evebiya, mamaɣ-mɩ tɔm mbʋ pʋyɔɔ yɔ ɩwɛ ɖoŋ,+ Ɛsɔ tɔm wɛ mɩ-taa tam,+ pɩtasɩ lɛ ɩwabɩ kañatʋ tʋ.+
15 Ɩtaasɔɔlɩ ɛjaɖɛ yaa wondu ndʋ tɩwɛ ɛjaɖɛ yɔɔ yɔ.+ Ye nɔɔyʋ ɛsɔɔlɩ ɛjaɖɛ yɔ, Caa sɔɔlɩm fɛyɩ ɛ-taa;+
16 mbʋ pʋyɔɔ yɔ mbʋ payɩ pɩwɛ ɛjaɖɛ yɔɔ yɔ—tomnaɣ sɔɔlɩm+ nɛ ɛsa kɔɖɛyɩ+ nɛ mbʋ ɛyʋ wɛnɩ e-wezuu caɣʋ taa yɔ pɩ-wɩlʋʋ*—pɩtɩlɩɩnɩ Caa cɔlɔ, ɛlɛ pɩlɩnɩ ɛjaɖɛ cɔlɔ.
17 Pɩtasɩ lɛ, ɛjaɖɛ ɖiɣni ɖɛʋ nɛ ɖɩ-sɔɔlɩm ɖɔɖɔ,+ ɛlɛ weyi ɛlakɩ Ɛsɔ sɔɔlɩm yɔ, ɛwɛɣ tam tam.+
18 Piya cikpesi, kɛdɛzaɣ ñɩɣyʋʋ kɔyɔ, nɛ ɛzɩ ɩɩnɩʋ se Krɩstʋ koyindu ɖiɣni kɔm yɔ,+ halɩ lɛɛlɛɛyɔ Krɩstʋ koyindinaa sakɩyɛ lɩwa;+ nɛ mbʋ yebina nɛ ɖɩtɩlɩ se kɛdɛzaɣ ñɩɣyʋʋ kɔyɔ.
19 Palɩnɩ ɖɛ-hɛkʋ taa, ɛlɛ pataakɛ ɖa-ñɩma;*+ mbʋ pʋyɔɔ yɔ ye paakɛ ɖa-ñɩma yɔ, paacaɣ ɖɔ-cɔlɔ. Ɛlɛ palɩwa se pɩsa nɛ pɩwɩlɩ se pɩtɩkɛ pa-tɩŋa paakɛnɩ ɖa-ñɩma.+
20 Kiɖeɖeu tanɩ-mɩ num,+ nɛ mɩ-tɩŋa payɩ ɩwɛnɩ sɩmtʋ.
21 Pɩtɩkɛ se ɩɩsɩŋ toovenim yɔɔ mamaɣ-mɩ tɔm,+ ɛlɛ mamaɣ-mɩ mbʋ pʋyɔɔ yɔ ɩsɩm-pʋ, nɛ mbʋ pʋyɔɔ yɔ cɛtɩm nabʋyʋ ɛɛlɩɣnɩ toovenim taa.+
22 Akɛ cɛtɩyʋ, ye pɩtɩkɛ weyi ekiziɣ se Yesu tɩkɛ Krɩstʋ yɔ?+ Weyi ekiziɣ Caa nɛ Pɩyalʋ yɔ, ɛnʋ kɛnɩ Krɩstʋ koyindu.+
23 Weyi ekiziɣ Pɩyalʋ yɔ ɛfɛyɩnɩ Caa ɖɔɖɔ.+ Ɛlɛ weyi ɛyɔɔdʋʋ se etisiɣ Pɩyalʋ yɔɔ yɔ,+ ɛwɛnɩ Caa ɖɔɖɔ.+
24 Piyele nɛ mɩ yɔ, tɔm ndʋ ɩnɩ kpaɣnɩ ɖooo kiɖe tɛɛ yɔ, pɩwɛɛ se tɩwɛɛ mɩ-taa tam.+ Ye tɔm ndʋ ɩnɩ kpaɣnɩ ɖooo kiɖe tɛɛ yɔ tɩwɛ mɩ-taa kɔyɔ, mɩ nɛ Pɩyalʋ ɩkaɣ wɛʋ nɔɔ kʋɖʋmaɣ, nɛ mɩ nɛ Caa ɖɔɖɔ ɩwɛɛ nɔɔ kʋɖʋmaɣ.
25 Pɩtasɩ lɛ, tamaɣ ŋga ɛlabɩ-ɖʋ yɔ, ŋga yɔ wezuu maatɛŋ.+
26 Mamaɣ-mɩ tɔm tʋnɛ mba pañɩnɩɣ se pepeɣzi-mɩ yɔ pɔ-yɔɔ.
27 Piyele nɛ mɩ lɛ, num mbʋ ɛta-mɩ yɔ,+ pɩwɛ mɩ-taa tam, nɛ ɩfɛyɩ kɛdɛɖaɣ taa se nɔɔyʋ ɛwɛɛ nɛ ɛwɩlɩɣ-mɩ tɔm; ɛlɛ num mbʋ ɛta-mɩ yɔ mbʋ ɖiɣnini-mɩ wɩlʋʋ pɩtɩŋa payɩ+ nɛ pɩkɛ toovenim nɛ pɩtɩkɛ cɛtɩm. Ɛzɩ pɩwɩlʋʋ-mɩ yɔ, mɩ nɛ ɩ ɩwɛɛ nɔɔ kʋɖʋmaɣ tam.+
28 Ye mbʋ, men-piya cikpesi, lɛɛlɛɛyɔ lɛ, mɩ nɛ ɩ ɩwɛɛ nɔɔ kʋɖʋmaɣ tam; nɛ alɩwaatʋ ndʋ palɩzɩɣ-ɩ nɛ pawɩlɩ yɔ, ɖɩpɩzɩ nɛ ɖɩyɔɔdɩ tɔm kaalɛyɩtʋ+ nɛ fɛyɛ ɛtaakpa-ɖʋ nɛ ɖiposini-i ɛ-wɛʋ alɩwaatʋ taa.
29 Ye ɩsɩm mbʋ se ɛwɛ siɣsiɣ yɔ, ɖɩnɛ ɩsɩm ɖɔɖɔ se ɛnʋ lʋlɩnɩ ɛyʋ weyi ɛlakɩ mbʋ pɩwɛ siɣsiɣ yɔ.+
Pɩ-tɛɛ tɔm
^ Yaa «ɖɔ-yɔɔ lʋɖʋ.»
^ Yaa «ɛkɛ kɩwɛɛkɩm yɔɔ huuzuu kɩlaʋ.»
^ Yaa «mbʋ ɛyʋ wɛna yɔ pɩ-yɔɔ kʋndʋʋ.»
^ Yaa «ɛlɛ pataawɛɛ ɛzɩ ɖa yɔ.»
