Ejipiti Lɩʋ 15:1-27
15 Alɩwaatʋ ndʋ tɩ-taa lɛ, Moyizi nɛ Izrayɛɛlɩ mba petee hendu tʋnɛ Yehowa:+
«Menteɣ hendu Yehowa mbʋ pʋyɔɔ yɔ ɛ-samtʋ paɣlaa siŋŋ.+
Ɛpɛɖɩ kpaŋnʋ nɛ ɛ-yɔɔ caɣyʋ teŋgu taa.+
2 Mon-ɖoŋ nɛ mo-hoɖe lɛ Yah,* mbʋ pʋyɔɔ yɔ, ɛpɩsɩ ma-ñʋʋ yaɖʋ.+
Ɛnʋ lɛ mɛ-Ɛsɔ, nɛ mankaɣ-ɩ sam;+ man-caa tɛ Ɛsɔ,+ nɛ mankaɣ-ɩ ɖɛyʋʋ.+
3 Yehowa kɛ you laɖʋ ɖoŋ tʋ.+ Ɛ-hɩɖɛ lɛ Yehowa.+
4 Farawɔɔ you kɛɛkɛɛnaa nɛ ɛ-sɔɔjanaa, ɛlɔ-wɛ teŋgu taa,+Nɛ e-you laɖaa kpɩzɩmwaa, ɛmɩyɩsɩ-wɛ Teŋgu Kɩsɛɛmʋʋ taa.+
5 Lɩm hola sɔsɔna huuzi pɔ-yɔɔ; petibi ɖooo lɩm cukaŋ taa ɛzɩ pɩyɛ yɔ.+
6 Oo Yehowa, ñe-nesi kɩbanzɩ wɛ ɖoŋ pɩdɩɩfɛyɩ;+Oo Yehowa, ñe-nesi kɩbanzɩ pɩzɩɣ nɛ sɩpʋʋtɩ koyindu.
7 Ña-paɣlɩka sɔsɔɔ taa ŋpɩzɩɣ nɛ ŋtuzi mba pakʋyʋʋ se pakaɖɩnɩ-ŋ yɔ nɛ ŋpɛɖɩ;+Ŋtiyiɣ ña-pana wena amʋ miŋ yɔ, añakɩ-wɛ ɛzɩ kesi yɔ.
8 Ñɔ-mɔɔŋ tɛɛ helim yeba nɛ lɩm kpeɣli;Pɩsɩŋ ɖiɣ ɖiɣ nɛ piiyeki lɩm hola se aɖɛɛ;Lɩm hola sɔsɔna ki teŋgu hɛkʋ taa.
9 Koyindu yɔɔdaa se: “Mankaɣ-wɛ ɖɔɔnʋʋ! Mankaɣ-wɛ hiɣu!
Mankaɣ tayʋʋ mbʋ mamʋ pɔ-cɔlɔ yɔ, pɩkɔɔ nɛ pɩsɩɩnɩ alɩwaatʋ ndʋ mahaɣaa* yɔ!
Mankaɣ kpɛʋ ma-laɣɖɛ! Me-nesi kaɣ-wɛ luzuu mɛn-tɛɛ!”+
10 Ŋhosi helim nɛ ñɔ-mɔɔŋ tɛɛ, teŋgu huuzi pɔ-yɔɔ;+Pasʋ lɩm tɛɛ ɛzɩ ñɩɣyʋʋ ŋgʋ payaɣ se pʋlɔŋ yɔ kitikuu lɩm sɔsɔm tɛɛ yɔ.
11 Awɛ ɛzɩ ña yɔ ɛsɔnaa taa, Oo Yehowa?+
Awɛ ɛzɩ ña yɔ, ña weyi ñe-kele kele wɛtʋ kpaɖɩ pɩtɩŋa yɔ?+
Ña weyi pɩwɛɛ se pese-ŋ sɔɔndʋ nɛ pete-ŋ samtʋ hendu yɔ, ña weyi ŋlakɩ piti lakasɩ yɔ.+
12 Ŋsezi ñe-nesi kɩbanzɩ, nɛ tɛtʋ libi-wɛ.+
13 Ñɔ-sɔɔlɩm siɣsiɣ ñɩmbʋ taa ŋɖiyi ña-samaɣ ŋga ŋyabɩ ka-ñʋʋ yɔ;+Ño-ɖoŋ taa ŋkaɣ-kɛ ɖiyuu nɛ ŋwoni-kɛ ña-ɖɩjaɣyɛ kiɖeɖeye taa.
14 Ajɛɛ kaɣ tɔm ndʋ nɩʋ;+ akaɣ seluu;Sɔɔndʋ sɔsɔtʋ* kaɣ kpaʋ Filistii mba.
15 Alɩwaatʋ ndʋ tɩ-taa lɛ, sɔɔndʋ kaɣ kpaʋ Edom ñʋndɩnaa* siŋŋ,Nɛ Mowaabʋ awiya ɖoŋ tɩnaa* kaɣ seluu.+
Kanaŋ mba kpeekpe laŋa kaɣ wɛɛkʋʋ.+
16 Sɔɔndʋ nɛ seluu kaɣ pɔ-yɔɔ tibu.+
Ña-nɩŋgbɛɛŋa ɖoŋ yɔɔ lɛ, pakaɣ wɛʋ po-lone taa ɖiɣ ɖiɣ ɛzɩ pɩyɛ yɔPɩkɔɔ nɛ pɩsɩɩnɩ alɩwaatʋ ndʋ ña-samaɣ ɖɛɣ yɔ, Oo Yehowa,Pɩkɔɔ nɛ pɩsɩɩnɩ alɩwaatʋ ndʋ samaɣ ŋga ŋlɩzaa yɔ+ kɛɖɛɣ yɔ.+
17 Ŋkaɣ-wɛ kɔnʋʋ nɛ ŋkam-wɛ ña-pʋʋ yɔɔ,+Lone nɖɩ ŋlɩzaa nɛ ŋñɔɔzɩ se ŋcakɩ ɖɩ-taa yɔ, Oo Yehowa,Kooka kiɖeɖeɣa ŋga ñe-nesi laba yɔ, Oo Yehowa.
18 Yehowa kaɣ kewiyitu tɔɔʋ tam.+
19 Alɩwaatʋ ndʋ Farawɔɔ kpaŋnaŋ nɛ e-you kɛɛkɛɛnaa nɛ ɛ-sɔɔjanaa mba pacakɩ kpaŋnaŋ yɔɔ yɔ petibi teŋgu taa yɔ,+Yehowa pɩsɩnɩ teŋgu taa lɩm pɔ-yɔɔ,+Ɛlɛ Izrayɛɛlɩ samaɣ ɖɔm teŋgu hɛkʋ taa ɖenɖe pɩwɩlaa yɔ nɛ kɛtɛzɩ.»+
20 Ðɩnɛ ɛlɛ Aarɔɔnɩ kɔɔ Miriyam weyi ɛkɛ nayʋ yɔ, ɛkpaɣ nesi tɛɛ suye* e-nesi taa, nɛ halaa tɩŋa kpaɣ nesi tɛɛ soo nɛ patɩŋ ɛ-wayɩ nɛ papaɣ.
21 Miriyam teɣaɣ hendu nɛ ɛcɔʋ hendu ndʋ abalaa teɣaɣ yɔ tɩ-nɔɔ taa se:
«Itee hendu Yehowa mbʋ pʋyɔɔ yɔ ɛ-samtʋ paɣlaa siŋŋ.+
Ɛpɛɖɩ kpaŋnʋ nɛ ɛ-yɔɔ caɣyʋ teŋgu taa.»+
22 Pʋwayɩ lɛ Moyizi ɖiyi Izrayɛɛlɩ mba nɛ pakʋyɩnɩ Teŋgu Kɩsɛɛmʋʋ cɔlɔ nɛ pɛɖɛɛ Suuri kañɩmbusuu taa. Pɔɖɔ kɩyakɩŋ 3 kañɩmbusuu taa, ɛlɛ patɩna lɩm.
23 Nɛ pɔkɔɔ patalɩ Maraa,*+ ɛlɛ pataapɩzɩɣ se pɔñɔɔ Maraa lɩm, mbʋ pʋyɔɔ yɔ pɩɩwɛ ñaŋ. Pʋyɔɔ ɛya peeɖe se Maraa.
24 Peeɖe samaɣ paɣzɩ midinuu Moyizi+ nɛ kɔtɔŋ se: «Ɛbɛ ɖɩkaɣ ñɔʋ yɔ?»
25 Moyizi ma kubuka nɛ Yehowa cɔlɔ kiŋ,+ nɛ Yehowa wɩlɩ-ɩ tɩʋ nakʋyʋ. Ɛpɛɖɩ-kʋ lɩm taa lɛ, lɩm pɩsɩ leleŋ ñɩmbʋ.
Lone nɖɩ ɖɩ-taa Ɛsɔ ɖʋ-wɛ paɣtʋ nɛ mbʋ pɩ-yɔɔ pɩwɛɛ se patɩŋna nɛ pahʋʋ tɔm yɔ, nɛ ɛtakɩ-wɛ peeɖe.+
26 Ɛyɔɔdaa se: «Ye ŋwelisiɣ Yehowa ñɛ-Ɛsɔ nɔɔ camɩyɛ nɛ ŋlakɩ mbʋ pɩtʋʋzɩ ɛ-ɛsɩndaa yɔ nɛ ŋɖɔŋ ɛ-paɣtʋ yɔɔ nɛ ŋñɔʋnɩ mbʋ payɩ ɛɖʋwa yɔ kpam yɔ,+ maakaɣ ñɔ-yɔɔ kɔnʋʋ kʋdɔmɩŋ weyi mɔnkɔnɩ Ejipiti mba yɔɔ yɔ ɩ-taa nakʋyʋ,+ mbʋ pʋyɔɔ yɔ ma Yehowa lɛ, malakɩ nɛ ŋwɛɛ alaafɩya camɩyɛ.»+
27 Pʋwayɩ lɛ pɔkɔɔ patalɩ Elim, ɖenɖe lɩm hila 12 nɛ paŋ 70 kaawɛɛ yɔ. Nɛ pacaɣ peeɖe lɩm cɔlɔ.
Pɩ-tɛɛ tɔm
^ Hɩɖɛ «Yehowa» potobiyaa nɛ pɩkɛ «Yah.»
^ Yaa «man-kalɩzaɣ haɣaa.»
^ Piye piye, «Lʋlʋʋ wɩzasɩ.»
^ Yaa «cɛɛkɩwaa.» Cejewe ñʋndɩnaa payaɣaɣ mbʋ.
^ Yaa «awiya kañatʋ tɩnaa.»
^ Pɩkɛ suye cikpeɖe nɖɩ pɔɖɔkʋʋ nesi tɛɛ nɛ pamakɩ yɔ.
^ Pʋ-tɔbʋʋ se «Ñaŋ.»
