Kɩbam nɛ kɩdɛkɛdɩm: Ðɩpɩzɩɣ nɛ ɖɩtaa liu Bibl lɔŋ tasʋʋ
Ye lɩmaɣza wena ɖa-maɣmaɣ yaa lalaa wɛna yɔ a-ɖeke aɖiyiɣni-ɖʋ nɛ ɖɩkpakɩɣ lɩmaɣza wezuu kɩbaŋʋ caɣʋ hɔɔlʋʋ taa yɔ, ɖa-taa ɛɛpɩzɩɣ nɛ pɩtɛ se pɩkaɣ-ɖʋ ɖɔmnʋʋ camɩyɛ. Bibl heyiɣ-ɖʋ mbʋ pʋyɔɔ yɔ, ɛlɛ kɩlakɩ nɛ pɩcɛzɩ mbʋ. Kɩsɩɣnɩ-ɖʋ se ɖɩtɩlɩ kɩbam nɛ kɩdɛkɛdɩm nɛ piyele nɛ ɖihiɣ taa leleŋ.
PƖPƆZƲƲ SE ƐSƆ EÐIYI-ÐƲ
Bibl taa, Ɛsɔ Yehowa a heyiɣ-ɖʋ se ɛtɩla ɛyaa se peɖiyi pa-tɩ ɛlɛ se ɛnʋ eɖiyini-wɛ. (Yereemii 10:23) Pʋyɔɔ eyeba nɛ pama lɔŋ tasʋʋ mbʋ piɖiyiɣ ɛyaa yɔ Bibl taa. Ɛsɔɔlɩ ɛyaa nɛ ɛtɩsɔɔlɩ se ɖɩkpaɣ lɩmaɣza wena apɩzɩɣ nɛ akɔnɩ-ɖʋ kaɖɛ nɛ piyele nɛ wezuu caɣʋ wɛɛ-ɖʋ kaɖɛ yɔ. (Wayɩ Wayɩ Paɣtʋ 5:29; 1 Yohanɛɛsɩ 4:8) Pɩtasɩ lɛ, ɛnʋ kɛnɩ ɖa-Lɩzɩyʋ, nɛ ɛwɛnɩ lɔŋsɩnɖɛ nɛ sɩmtʋ ndʋ pɩpɔzʋʋ se ɛtasɩ-ɖʋ lɔŋ weyi ɩkpaɖɩ ɖeu yɔ wezuu kɩbaŋʋ caɣʋ nʋmɔʋ taa. (Keɣsi 100:3; 104:24) Paa mbʋ yɔ, Ɛsɔ ɛɛkpaɣ ɛyaa nɛ ɖoŋ kpa se palabɩnɩ tʋmɩyɛ ɛ-lɔŋ tasʋʋ.
Yehowa kaaha kajalaɣ abalʋ nɛ halʋ, Aɖam nɛ Ɛva mbʋ payɩ pɩpɔzaɣ-wɛ se pehiɣ taa leleŋ siŋŋ yɔ. (Kiɖe Tɛɛ Tɔm 1:28, 29; 2:8, 15) Ɛɛɖʋ-wɛ ɖɔɖɔ paɣtʋ ndʋ tɩwɛ kɛlɛʋ yɔ nɛ ɛɛɖaŋaa se pɔɖɔ tɩ-yɔɔ. Ɛlɛ ɛɛha-wɛ waɖɛ se pa-maɣmaɣ palɩzɩ se pañaŋ paɣtʋ ndʋ yaa paañaŋ-tʋ. (Kiɖe Tɛɛ Tɔm 2:9, 16, 17) Pɩlabɩ pʋtɔdɩyɛ se Aɖam nɛ Ɛva palɩzaa se paañaŋ Ɛsɔ paɣtʋ ɛlɛ palakɩ mbʋ pa-maɣmaɣ pɔsɔɔlaa yɔ. (Kiɖe Tɛɛ Tɔm 3:6) Ɛbɛ lɩ pɩ-taa? Ye ɛyaa maɣmaɣ ɩlɩzɩɣnɩ mbʋ pɩkɛ kɩbam nɛ kɩdɛkɛdɩm yɔ, piɖeɣni-wɛ nɛ pɩkɩlɩ yaa we? Aayɩ. Mbʋ pɩlabɩ ɛyaa wezuu caɣʋ taa kpaɣnɩ ɖooo caanaʋ taa nɛ pɩtalɩ sɔnɔ yɔ pɩwɩlɩɣ se ye ɛyaa paa ɩfɛyɩnɩ Ɛsɔ paɣtʋ yɔ paahikiɣ laŋhɛzɩyɛ nɛ koboyaɣ siŋŋ.—Eklezɩyasɩtɩ 8:9.
Paa le ɖɩwɛɛ nɛ paa hɔʋ ŋgʋ taa ɖɩlɩnaa yɔ, Bibl tasɩɣ-ɖʋ lɔŋ weyi pɩpɔzʋʋ-ɖʋ yɔ se pɩsa nɛ ɖɩkpaɣ lɩmaɣza kɩbana wezuu caɣʋ taa yɔ. (2 Timootee 3:16, 17; kalɩ ɖɔɖɔ aɖakaɣ « Takayaɣ ŋga paa weyi ɛpɩzɩɣ nɛ ɛwɛɛnɩ-kɛ yɔ.») Na ɛzɩma Bibl lakɩ mbʋ yɔ.
Kpɛlɩkɩ tɔm lɛɛtʋ pɩlɩɩnɩ mbʋ pʋyɔɔ pɩmʋnaa se payaa Bibl se «Ɛsɔ tɔm» yɔ pɩ-yɔɔ.—1 Tesalooniiki mba 2:13. Cɔnɩ video A-cɔlɔ Bibl lɩnaa?; kɩwɛ jw.org yɔɔ.
BIBL HEYIƔ-ÐƲ MBƲ ƐSƆ SƆƆLAA SE ÐƖLA YƆ
Bibl kɛdɩɣ-ɖʋ taabalɩyɛ nɖɩ ɖɩwɛ Yehowa nɛ ɛyaa pɛ-hɛkʋ taa kpaɣnɩ ɖooo kiɖe tɛɛ yɔ ɖɩ-tɔm. Tɔm ndʋ tɩwɛ kɩ-taa yɔ, tɩsɩɣnɩ-ɖʋ se ɖɩtɩlɩ lɩmaɣza wena Ɛsɔ wɛnɩ kɩbam nɛ kɩdɛkɛdɩm yɔɔ yɔ, nɛ mbʋ pɩwazɩɣ ɛyaa nɛ mbʋ pɩkɔŋnɩ-wɛ kaɖɛ yɔ pɩ-yɔɔ tɔm. (Keɣa 19:7, 11) Paɣtʋ kila wena awɛ kɩ-taa yɔ, a-alɩwaatʋ ɛɛɖɛɣ, nɛ asɩɣnɩ-ɖʋ se ɖɩkpaɣ lɩmaɣza kɩbana ɖe-wezuu caɣʋ taa paa evemiye nɖɩ.
Kɩɖaʋ nakʋyʋ yɔ. Patasɩ lɔŋ ɛnɛ Aduwa 13:20 taa: «Weyi ɛ nɛ lɔŋsɩnɖaa pɔɖɔŋ yɔ, ɛkaɣ pɩsʋʋ lɔŋsɩnɖʋ, ɛlɛ weyi ɛ nɛ kɩmɛlɛmɩŋ paɖʋʋ taabalɩyɛ yɔ, pɩkaɣ-ɩ kɔnʋʋ kaɖɛ.» Paɣtʋ kiɖe nɖɩ, ɖɩwɛ wazaɣ ɖa-alɩwaatʋ tʋnɛ tɩ-taa ɖɔɖɔ ɛzɩ ɖɩɩwɛʋ wazaɣ caanaʋ taa mba yɔ. Paɣtʋ kila wena amʋ ñɩm nɛ awɛ wazaɣ mbʋ yɔ aɖɔ Bibl taa.—Kalɩ aɖakaɣ « Bibl taa lɔŋsɩnɖɛ wɛ tam.»
Ɛlɛ pɩtɩla ŋpɔzʋʋ ña-tɩ se: «Ɛbɛ pɩzɩɣ pɩsɩnɩ-m nɛ man-taa tɛ se lɔŋ weyi Bibl tasʋʋ yɔ ɛpɩzɩɣ nɛ ɛwazɩ-m?» Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ yɔɔdʋʋ ɛyaa nabɛyɛ kɩɖaŋ tɔm.
a Ɛsɔ hɩɖɛ maɣmaɣ lɛ Yehowa.—Keɣa 83:18.
