Kɩbam nɛ kɩdɛkɛdɩm: Ña pɩwɛɛ se ŋlɩzɩ
Wezuu kɩbaŋʋ caɣʋ paɣtʋ ndʋ tɩ-yɔɔ ɖɩlɩzɩɣ se ɖɩɖɔŋ yɔ, tɩkaɣ yebu nɛ ɖihiɣ koboyaɣ yaa ɖiihikiɣ. Yehowa sɩm mbʋ. Pʋyɔɔ ɛsɔɔlaa se ɖɩɖɔ ɛ-paɣtʋ yɔɔ.
Yehowa sɔɔlaa se ɖihiɣ laŋhɛzɩyɛ nɛ koboyaɣ ɖe-wezuu caɣʋ taa.
«Ma Yehowa, mɛkɛnɩ ñɛ-Ɛsɔ, Weyi ɛwɩlɩɣ-ŋ tɔm se pɩwazɩ ña-maɣmaɣ yɔ, Weyi eɖiyiɣ-ŋ nʋmɔʋ ŋgʋ kɩ-taa pɩwɛɛ se ŋɖɔ yɔ. Ye ŋŋtisaɣ nɛ ŋwelisiɣ man-paɣtʋ! Ðɩnɛ ɛlɛ ña-laŋhɛzɩyɛ kaapɩsɩ ɛzɩ pɔɔ yɔ nɛ ñe-siɣsiɣ wɛtʋ pɩsɩ ɛzɩ teŋgu taa lɩm hola yɔ.»—Izaayii 48:17, 18.
Ɛsɔ kɛnɩ ɖa-Lɩzɩyʋ, pʋyɔɔ lɛ ɛsɩm ɛzɩma pɩwɛɛ se ɖɩcaɣ wezuu nɛ piɖeni-ɖʋ yɔ. Eseɣtiɣ-ɖʋ se ɖɩɖɔ ɛ-lɔŋ tasʋʋ yɔɔ mbʋ pʋyɔɔ yɔ, piyeki nɛ piɖeni-ɖʋ. Ye ɖɩɖɔŋ Ɛsɔ paɣtʋ yɔɔ yɔ, pɩɩkaɣ pɔzʋʋ se ɖɩnɩɣzɩ se mbʋ ɖɩlɩzɩɣ se ɖɩlakɩ yɔ pɩkaɣ lʋlʋʋ pee kɩbana yaa pɩɩlʋlʋʋ. Paa ɛzɩmtaa lɛ, mbʋ ɖɩkaɣ lɩzʋʋ se ɖɩlakɩ yɔ pɩkɛɣ kɩbam nɛ ɖɩkaɣ hiɣu laŋhɛzɩyɛ nɛ koboyaɣ.
Yehowa ɛɛpɔzʋʋ-ɖʋ se ɖɩla mbʋ ɖɩɩpɩzɩɣ yɔ.
«Paɣtʋ tʋnɛ, ndʋ manɖʋʋ-ŋ sɔnɔ yɔ, tɩtɩkɩlɩ-ŋ kaɖɛ, nɛ tɩfɛyɩ ɖɔɖɔ ɖooo poliŋ taa.»—Wayɩ Wayɩ Paɣtʋ 30:11.
Pɩsa nɛ ɖɩɖɔ paɣtʋ ndʋ Ɛsɔ ɖʋ wezuu kɩbaŋʋ caɣʋ nʋmɔʋ taa yɔ tɩ-yɔɔ lɛ, pɩpɩzɩɣ nɛ pɩpɔzɩ se ɖɩlɛɣzɩ ɖa-maɣzɩm nɛ ɖa-lakasɩ. Ɛlɛ Yehowa ɛɛpɔzʋʋ-ɖʋ se ɖɩla mbʋ ɖɩɩpɩzɩɣ labʋ yɔ. Toovenim taa lɛ ɛnʋ kɛnɩ ɖa-Lɩzɩyʋ, pʋyɔɔ lɛ ɛsɩm mbʋ ɖɩpɩzɩɣ nɛ ɖɩla yɔ. Ðɩkɔŋ nɛ ɖɩtɩlɩ Yehowa camɩyɛ lɛ, ɖɩkaɣ ɖiɣzinuu se «ɛ-paɣtʋ fɛyɩ yuŋ.»—1 Yohanɛɛsɩ 5:3.
Yehowa labɩ tamaɣ se ɛsɩɣnɩ mba palɩzɩɣ se pɔɖɔŋ ɛ-paɣtʋ yɔɔ yɔ.
«Ma, ñɛ-Ɛsɔ Yehowa, mɔnɖɔkʋʋ ña-nɩwaŋ nesi, meheyiɣni-ŋ se: “Sɔɔndʋ ɛtaakpa-ŋ. Mankaɣ-ŋ sɩnʋʋ.”»—Izaayii 41:13.
Ðɩpɩzɩɣ nɛ ɖɩɖɔ paɣtʋ ndʋ Ɛsɔ ɖʋ wezuu kɩbaŋʋ caɣʋ nʋmɔʋ taa yɔ tɩ-yɔɔ mbʋ pʋyɔɔ yɔ, ɛkaɣ-ɖʋ sɩnʋʋ. Ɛpɩzɩɣ nɛ ɛtɩŋnɩ ɛ-Tɔm Bibl yɔɔ nɛ ɛsɩnɩ-ɖʋ; tɩkpazɩɣ-ɖʋ ɖoŋ nɛ tɩhaɣ-ɖʋ lidaʋ.
Ɛjaɖɛ kpeekpe yɔɔ, ɛyaa miiliyɔɔwaa sakɩyɛ ɖiɣzinaa se Bibl paɣtʋ yɔɔ ɖɔm ñɔɔzɩ pe-wezuu caɣʋ. Pɩɩwɛɣ ɖeu se ŋkpɛlɩkɩ nɛ ŋtɩlɩ lɔŋ kɩbaŋ weyi Bibl tasɩɣ yɔ ɩ-yɔɔ tɔm nɛ pɩkɩlɩ? Ŋpɩzɩɣ nɛ ŋpaɣzɩnɩ kpɛlɩkʋʋ hatʋ cabɩ takayaɣ Nɩɩ wezuu leleŋ tam!; ŋpɩzɩɣ nɛ ŋkpaɣ-kɛ falaa jw.org yɔɔ. Ka-taa tɔm ñʋŋ yɔ:
-
Ɛzɩma Bibl pɩzɩɣ nɛ kɩsɩnɩ-ŋ?
-
Bibl haɣ-ɖʋ cee wayɩ lidaʋ kɩbaŋʋ
-
Ŋpɩzɩɣ nɛ ŋtaa Bibl taa tɔm liu na?
Ŋwɛɣ nɛ ŋtazɩɣ Ɛsɔ tɔm Bibl taa lɛ, ŋkaɣ ɖiɣzinuu se tɩ-alɩwaatʋ tɩɖɛɛ; «tɩmʋnaa se ɛyʋ ɛtaa-tʋ liu paa ɛzɩmtaa, lɛɛlɛɛyɔ nɛ tam tam.» (Keɣa 111:8) Wezuu kɩbaŋʋ caɣʋ paɣtʋ ndʋ tɩwɛ Bibl taa yɔ, tɩ-yɔɔ ɖɔm kpaɖɩnɩ ɖeu. Paa mbʋ yɔ, Ɛsɔ ɛɛkaɣ ñɩɣʋ ɖɔ-yɔɔ se ɖɩɖɔ tɩ-yɔɔ. (Wayɩ Wayɩ Paɣtʋ 30:19, 20; Yozuwee 24:15) Ða-taa paa weyi pɩwɛɛ se ɛlɩzɩ se ɛɖɔŋ tɩ-yɔɔ yaa ɛɛɖɔŋ.
