▪ Yesu wɩlɩ ɛyaa se peyele nɛ laŋhɛzɩyɛ wɛɛ pa nɛ lalaa pɛ-hɛkʋ taa. Ɛlɛ kɩyakʋ nakʋyʋ, eheyi ɛ-apostoloowaa se: “Ɩtaamaɣzɩ se laŋhɛzɩyɛ mɔnkɔnɩ tɛtʋ yɔɔ; pɩtɩkɛ laŋhɛzɩyɛ mɔnkɔnaa, ɛlɛ laɣɖɛ. Mbʋ pʋyɔɔ yɔ mɔnkɔm se mantayɩ, ɛyʋ nɛ ɛ-caa pɛ-hɛkʋ taa, pɛlɛ nɛ e-ɖoo, wolu nɛ ɛ-waŋ pɛ-hɛkʋ taa.” (Mat. 10:34, 35) Suwe Yesu ñɩnaɣ yɔɔdʋʋ?

Yesu taasɔɔlɩ se ɛtayɩ hɔŋ taa mba hɛkʋ taa, ɛlɛ ɛɛnawa se ɛ-wɩlɩtʋ kaɣ yebu nɛ hɔŋ nɩɩyɩ taa tayɩ. Pʋyɔɔ lɛ, mba pɔsɔɔlaa se papɩsɩ Krɩstʋ tɔmkpɛlɩkɩyaa nɛ paha pa-tɩ nɛ pamɩyɩsɩ-wɛ lɩm yɔ, pɩpɔzʋʋ se patɩlɩ se nabʋyʋ taa, pɔ-hɔŋ taa mba taa ɩɩkaɣ labʋ leleŋ nɛ lɩmaɣzɩyɛ nɖɩ pakpaɣaa yɔ. Nabʋyʋ taa, nɔɔyʋ tɛŋga yaa ɛ-hɔʋ taa mba lalaa pɩzɩɣ nɛ pakaɖɩɣnɩ-ɩ nɛ pɩwɛɛ-ɩ kaɖɛ se ewolo pɩ-yɔɔ nɛ ɛñɔɔnɩ Krɩstʋ wɩlɩtʋ.

Bibl seɣtiɣ Krɩstʋ mba se ‘pa nɛ ɛyaa tɩŋa pɛwɛɛ laŋhɛzɩyɛ taa.” (Roma 12:18) Ɛlɛ Yesu wɩlɩtʋ pɩzɩɣ nɛ tɩwɛɛ ɛzɩ laɣɖɛ yɔ hɔŋ nɩɩyɩ taa. Pɩlakɩ mbʋ, alɩwaatʋ ndʋ hɔʋ taa tʋ nɔɔyʋ mʋʋ Krɩstʋ wɩlɩtʋ ɛlɛ lalaa ñekiziɣ-tʋ yaa pakaɖɩɣnɩ-tʋ yɔ. Ye pɩlabɩ mbʋ yɔ, hɔʋ taa ñɩma mba, papɩsɩɣ weyi ɛwɛɛ nɛ ɛkpɛlɩkɩɣ toovenim yɔ ‘e-koyindinaa.’—Mat. 10:36.

Krɩstʋ tɔmkpɛlɩkɩyaa mba pɛwɛ hɔŋ weyi ɩ-taa mba fɛyɩ Ɛsɔ sɛtʋ ɛgbɛyɛ kʋɖʋmɖɩyɛ taa yɔ, nabʋyʋ taa pakatɩɣ wɛtʋ ndɩ ndɩ, nɛ wɛtʋ ndʋ tɩtakɩɣ sɔɔlɩm mbʋ pɛwɛnɩ Yehowa nɛ Yesu yɔɔ yɔ. Kɩɖaʋ nakʋyʋ yɔ. Hɔʋ taa ñɩma mba paasɛɣ Yehowa yɔ, papɩzɩɣ nɛ pañɩɣ pɔ-yɔɔ se pala Ɛsɔ sɛtʋ kazandʋ natʋyʋ. Alɩwaatʋ ndʋ pɩtakɩɣ-wɛ yɔ, anɩ pakaɣ sɔɔlʋʋ se pɔ-tɔm ɛkɛdɩna? Yesu yɔɔdaa se: “Weyi ɛsɔɔlʋʋ ɛ-caa yaa e-ɖoo nɛ pɩkɩlɩ-m yɔ, ɛtɩmʋnɩ-m.” (Mat. 10:37) Toovenim taa lɛ, Yesu taañɩnɩɣ yɔɔdʋʋ se pɩsa nɛ ɛ-tɔmkpɛlɩkɩyaa tɔm kɛdɩnɩ-ɩ lɛ pɩwɛɛ se sɔɔlɩm mbʋ pɛwɛnɩ pa-lʋlɩyaa yɔɔ yɔ pɩpasɩ. Ɛlɛ ɛñɩkaɣ niye ɛzɩma pasɩɩ paa mbʋ lɛ pi-lone taa yɔ pɩ-yɔɔ. Ye hɔʋ taa ñɩma mba paasɛɣ Yehowa yɔ pakaɖɩɣnɩ pana wena ɖɩñakɩ se ɖɩsɛɛ Yehowa yɔ, ɖiwoki pɩ-yɔɔ nɛ ɖɩsɔɔlʋʋ-wɛ, ɛlɛ ɖɩnawa se sɔɔlɩm mbʋ ɖɩwɛnɩ Ɛsɔ yɔɔ yɔ, mbʋ pɩwɛɛ se ɖɩsɩɩ kajalaɣ ɖeɖe.

Pɩtʋʋ fɛyɩ se ye hɔʋ taa mba ɩkaɖɩɣnɩ-ɖʋ yɔ pɩpɩzɩɣ piyele nɛ ɖɩnɩɣ siziŋ siŋŋ. Ɛlɛ pɩwɛɛ se Krɩstʋ tɔmkpɛlɩkɩyaa ɩtɔzɩ ɛ-tɔm tʋnɛ tɩ-yɔɔ: “Weyi etitisi nɛ ɛkpaɣ ɛ-nazɩm sizika nɛ ɛtɩŋ ma-wayɩ yɔ, ɛtɩmʋnɩ-m.” (Mat. 10:38) Pʋ-tɔbʋʋ lɛ se Krɩstʋ mba kpakɩɣ ɛzɩma pɔ-hɔʋ taa mba kaɖɩɣnɩ-wɛ yɔ se pɩkɛ kʋñɔmɩŋ weyi Krɩstʋ tɔmkpɛlɩkɩyaa tisiɣ faaa se pɔtɔɔ yɔ ɩ-hɔɔlʋʋ nakʋyʋ. Alɩwaatʋ kʋɖʋmtʋ ndʋ tɩ-taa lɛ, pataɣ liu se pɔ-ɖɔnɛ kɩbanɖɛ kaɣ seɣtuu pɔ-hɔʋ taa ñɩma mba paasɛɣ Yehowa yɔ nɛ pɛlɛɣzɩ pa-maɣzɩm nɛ pɔsɔɔlɩ se pɛkpɛlɩ Bibl taa tɔm.—1 Pɩy. 3:1, 2.