Ða-alɩwaatʋ tʋnɛ tɩ-taa, Yehowa Aseɣɖe Tɩnaa mʋʋ fezuu taa tɔɔnaɣ pɩtɩŋnɩ intɛrnɛɛtɩ yɔɔ. Ɛlɛ kedeŋa hɔɔlɩŋ sakɩyɛ taa lɛ, pɩwɛ kaɖɛ ɖo-koobiya se powolo intɛrnɛɛtɩ yɔɔ. Koobiya lalaa wɛ lona wena a-taa intɛrnɛɛtɩ ɛɛlakɩ tʋmɩyɛ camɩyɛ, pɛcɛkɩ laatriki miŋ ɖoŋ ɖoŋ yaa intɛrnɛɛtɩ fɛyɩ yɔ.

 Paa mbʋ yɔ ɖo-koobiya halaa nɛ abalaa sakɩyɛ pɩzɩɣ nɛ pakpaɣ takayɩsɩ pɔrtaabɩlɩ yaa taabɩlɛɛtɩ yɔɔ, paa pɛfɛyɩnɩ intɛrnɛɛtɩ yɔ. Ɛbɛ sɩɣnɩ-wɛ nɛ palakɩ mbʋ?

 Aɖakaɣ ŋga payaɣ se JW BOX yɔ. Kɛkɛ aɖakaɣ cikpelaɣ ŋga pahaɣ agbaa wena awɛ lona wena a-taa intɛrnɛɛtɩ ɛɛlakɩ tʋmɩyɛ camɩyɛ yɔ. Paɖʋ kɔ-yɔɔ wonuu ŋgʋ kɩ-yɔɔ intɛrnɛɛtɩ tɩŋɩɣna yɔ. Ɛgbɛyɛ yabɩ wonuu ŋgʋ kɩyabʋ. Koobiya mba palakɩ tʋmɩyɛ ordinatɛɛrɩwaa yɔɔ yɔ, paɖʋ kɩ-yɔɔ ɖɔɖɔ intɛrnɛɛtɩ yɔɔ ɖʋtʋ natʋyʋ nɛ takayɩsɩ nɛ videowaa mba pɛwɛ jw.org yɔɔ. Pʋcɔ nɛ pala paa aɖakaɣ ŋga lɛ, pɩpɔzʋʋ liidiye CFA waa ɛzɩ 41 697 mbʋ yɔ.

 Koobiya pɩzɩɣ nɛ powolo Kewiyaɣ Kpaaŋ taa, patɩŋnɩ wifi yɔɔ nɛ powolo JW BOX yɔɔ nɛ pakpaɣ takayɩsɩ nɛ videowaa pɛ-tɛ taabɩlɛɛtɩwaa nɛ pɔrtaabɩlɩwaa yɔɔ. Halɩ mba pɛ-tɛ pɔrtaabɩlɩwaa yaa taabɩlɛɛtɩwaa pɩnaa yaa patɩmʋ liidiye sakɩyɛ yɔ, papɩzɩɣ nɛ pakpaɣ wondu JW BOX yɔɔ. Ɛlɛ ye ɛgbɛyɛ naɖɩyɛ ɛfɛyɩnɩ intɛrnɛɛtɩ yɔ, ɛzɩma ɖɩ-taa koobiya pɩzɩɣ nɛ pakpaɣ ɛgbɛyɛ takayɩsɩ kɩfasɩ nzɩ sɩwɛ JW BOX yɔɔ yɔ? Ðoŋ ɖoŋ lɛ, ɛgbɛyɛ piliŋa tiyiɣni agbaa clé USB waa mba pɔ-yɔɔ paɖʋ takayɩsɩ kɩfasɩ nzɩ sɩwɛ jw.org yɔɔ yɔ. Pakpakɩɣ takayɩsɩ nzɩ sɩwɛ clé USB waa yɔɔ yɔ, JW BOX yɔɔ. Pɩpɔzʋʋ liidiye CFA waa ɛzɩ 2 224 mbʋ yɔ pʋcɔ paya clé USB kʋɖʋmʋʋ.

 Ɛzɩma JW BOX sɩɣnɩ ɖo-koobiya? Hɔʋ caja weyi payaɣ se Nathan Adruandra nɛ ɛwɛ Kɔŋgoo Kinsaasaa ɛjaɖɛ taa yɔ, ɛyɔɔdaa se: “Mañaɣ pana tam sakɩyɛ se mankpaɣ filimwaa ‘Hayɩ Yehowa, . . . ña mantaɣ liu’ nɛ Tɔzɩ Lɔɔtɩ halʋ yɔɔ. Ɛlɛ mantɩpɩzɩ nɛ piyeba nɛ pitibi-m yɔɔɔ. Ɛlɛ lɛɛlɛɛyɔ lɛ, manpɩzɩɣ nɛ mankpaɣ videowaa mba mɛn-tɛ pɔrtaabɩlɩ yɔɔ, nɛ ɛzɩma mɛnkɛ lʋlɩyʋ yɔ pʋyɔɔ lɛ, pɩsɩɣnɩ-m se mawɩlɩ tɔm camɩyɛ men-piya.”

 Koobu abalʋ nɔɔyʋ weyi ɛsɩɣnɩ Naajeeriya agbaa naayɛ se alabɩnɩ tʋmɩyɛ JW BOX yɔ ɛyɔɔdaa se: “Koobiya yɔɔdʋʋ se JW BOX kɛ kʋjɔʋ kɩbaŋʋ siŋŋ ŋgʋ Yehowa labɩ-wɛ yɔ. Pa-taa wɛ leleŋ siŋŋ mbʋ pʋyɔɔ yɔ, papɩzɩɣ nɛ pakpakɩɣ Tɔm wɩlʋʋ wondu taa wondu ndɩ ndɩ kɛlɛʋ pɛ-tɛ pɔrtaabɩlɩwaa yaa taabɩlɛɛtɩwaa yɔɔ.”

 Petiyini aɖakasɩ nzɩ sɩcɛzɩ 1 700 yɔ Afrika, Oseyaanii nɛ Amerika haɖɛ kiŋ nɛ palabɩ ɖʋ se pakaɣ tiyinuu aɖakasɩ lɛɛsɩ agbaa lɛɛna pʋwayɩ. Le palɩɣ liidiye yɔɔ nɛ palakɩnɩ tʋmɩyɛ nɖɩ? Haɖɛ nɖɩ ɛyaa ndɩ ndɩ lakɩ ɛjaɖɛ kpeekpe yɔɔ yɔ kɔzɩ kɔzɩ pɩtɩŋnɩ donate.ps8318.com yɔɔ yɔ, nɖɩ palakɩnɩ tʋmɩyɛ nɖɩ. Ðɩsɛɣ-mɩ pɩdɩɩfɛyɩ ɛzɩma ɩlakɩ haɖɛ faaa nɛ ɩɖʋʋ-ɖʋ nesi yɔ pɩ-yɔɔ.