Nnungu mmwiu ni aijá aumbile vinu uti. Nae hatunduvenge na avé mwisho. (Dimu 90:2) Nae ni Lipata lya mitenga vyambone vyatukodya mu Ibibiliya. (1 Timoti 1:11) Nnungu anditupa shingumi, na ivé doni, inkutuvaikila tulipúdye kwake nae bai.—Shomya Maono 4:11.

Nnungu ni Imumu, na pavedoni hapali munu ata jumo ángwene nae. Manaake nae andivilingananga na vyuumbe vipagwite. (Nshuwau 1:18; 4:24) Kanji tunkulula kumanya mavalelo a Nnungu kwa vinu vyaumbile. Kwa mpano, kupagwa kwa vyepo na dinduva vínkulodya shalowa linagwaledyo na limanyilo lyake. Kutumbula kwa shilambo kunkulodya dimongo dyake.—Shomya Valoma 1:20.

Tunkulula kulipundisha kavili mavalelo a Nnungu tushomya Ibibiliya. Kwa mpano, yanavo inkutumanyia vinu vyalota Nnungu na vyakalota. Na yadavo inkutumanyia mwashi Nnungu mwavatananila vanu, na mwashi mwanatandela mu mavalelo akuvilingananga.—Shomya Dimu 103:7-10.

Yesu ate doni: ‘Atata wetu úvele kuwa lina lyako lishualele.’ (Mateu 6:9) Ata ikava kenga Nnungu ankuvanavo mena loe laishima, kanji ankuvanavo lina limo bai. Kwa kula inangodi lina ali linkushamegwa kwa dindila dya kuvilingananga. Mushimakonde tunshema “Yeova”, kanji vanu vanji vanshema “Yahweh.”—Shomya Dimu 83:18.

Mu dibibiliya dyoe lina lya Nnungu halinapatikanashinu. Lina ali lindyumigwa, kuvika Umu au Nnungu. Kanji Ibibiliya wakati pavaandike lina lya Nnungu lishinapatikanika myanda 7.000. Yesu anditadya lina lya Nnungu kumanyika  wakati pashivapundisha vanu vinu vya Nnungu.—Shomya Nshuwau 17:26.

Dá shana mauvilo apagwite nelo ankulodya kenga Yeova hanatulota shinu wetu? Vanu vanji vashi doni: “Nnungu ankutuvyauvyanga pakulota atulinge.” Kanji kwa matangodi ala halanavashinu la umwiu.—Shomya Tiyagu 1:13.

Nnungu animupa munu ulu wa kutandola kwa shinu. Aunona shinu kuva shinu shambone kuvanavo ulu wa kushagula kuntumikila Nnungu? (Yoshuwa 24:15) Kanji vanu voe vankutandola kutenda vinu vyakunyata, ndyomana ankupagwa mauvilo oé namene. Yeova inanyatila wakati paona vanu pavaonegwa.—Shomya Kutunduvanga 6:5, 6.

Yeova ankutulota namene wetu. Nae alota tuvenavo shinamilo shambone. Muwakati wakuvandika, Yeova anamalidya mauvilo na anavamalidya avalá vaidanavo mauvilo. Kanji nae ankuvanavo shabaa ya kuleka mauvilo kwa wakati padiki. Mu lishomo lya 8, tunalipundisha shabaa ayo.—Shomya 2 Patulu 2:9; 3:7, 13.

Yeova ankutulalika tummandike kupitila mu kushwali. Nae ankunjali kula munu pakati petu. (Dimu 65:2; 145:18) Nae ave tayali kutulivaliva makosha letu, na ankwona dimongo dyetu wakati wa tulikanyalidya kuntumbyanga nae. Pamo na kuva tuvakutega, tunkulula kuva mbodi umwe Yeova.—Shomya Dimu 103:12-14; Tiyagu 4:8.

Kwa kuva Nnungu anditupa shingumi, inkutuvaikila tunnagwaledye namene kuliko munu woewoe. (Malukushi 12:30) Muwakati waulodya linagweledyo lyako kwa Nnungu, ulipundisha vyake nae na utandedya vyalota nae, wako undava umbodi wake nae.—Shomya 1 Timoti 2:4; 1 Nshuwau 5:3.