Kenga tundyambangila mwaa mu lishomo lipitile, hadinava shinu didini uti dimpuwangidya Nnungu. Pavedoni, wetu tunkuulula kulipudya kwa Namalunda wetu kwa inamuna impuwangidya nae. “Inamuna shani yakulipudya [au idini] shani” impuwangidya Nnungu? (Tiyagu 1:27, inota) Lola nyamani shipundisha Ibibiliya.

1. Nyamani shivaikidile shive lipata lya kulipudya kwetu?

Ibibiliya ni lipata lya kulipudya kwetu. Yesu anímwaulila Nnungu: “Lilove lyako ni umwiu.” (Nshuwau 17:17) Didini dinji hadinatanana umwiu upatikana mu lilove lipumuliligwe namu Nnungu, Ibibiliya. Vanavo vatumbyanga namene mapundisho la vanu na diyadi. Kanji Yeova hanapuwanga na munu “hakatanana malamulo ake.” (Shomya Malukushi 7:9.) Kwa malove lanji, wetu tunkuulula kupuwangidya ntima wake, ikava kenga kulipudya kwetu kunkwalakela mu Ibibiliya na tunkwodedya midimu vyake.

2. Ituvaikidile tulipudye dashi kumwe Yeova?

Kenga Namalunda wetu, Yeova ni avaikidile tulipudye kwake nae bai. (Maono 4:11) Ashi manaake ituvaikidile tunnagwaledye na tulipudye kwake nae bai, kwabila kutumila lishinamu, ing’ope, au shimanyikilo shoeshoe.—Shomya Ishaiya 42:8.

Kulipudya kwetu kuvaikidile kuve “kwanashwe na kwakukubalika” kumwe Yeova. (Valoma 12:1) Ashi manaake ituvaikidile twigwilile malamulo ake. Kwampano, avalá vannagwaledya Yeova ivavaikidile vaodedye malamulo ake kwaupande wa shitamu. Na vanavo vananyema vitendo vyakujowa, kenga kumuta olya kutumila mitela vyakwambalwisha au kutumila mwakunyata ugwalwa. a

3. Mwaa shani ituvaikidile tulipudye kumwe Yeova pamo na vanung’unumunu vetu?

Mikutano vyetu vya kula ishumana vinkutupa litala lya ‘kuntumbyanga Yeova . . . pashipinga.’ (Dimu 111:1, 2) Inamuna imo ni kwakwimba dimu tuntumbyanga Nnungu. (Shomya Dimu 104:33.) Yeova ankutumanyia wetu pakulota tupagwe pa mikutano kwamwaa nae ankutunagwaledya na ankumanya kenga vyanavo vindatupwashela kupuwanga ngwengwe na shingumi. Patukadyana na vavetu, tunapana ntima shii kula munu na muje.

 LAMBELA KUMANYA VYOE

4. Hatunatumile mashinamu patulipudya

5. Kulipudya kumwe Yeova tu bai ni kulota kukupwashela wako kwambwalegwa mudiyadi dyakushang’apa

 6. Wetu tunalipudya kwake Nnungu ku mikutano vya pashipinga

Wetu tunantumbyanga Yeova na kupana ntima shii kula munu na muje patwimba na patujang’ula vyakudya ku mikutano vya pashipinga. Shomya Dimu 22:22, na badae mwambangile mwaa vyakudya vya mwina:

• Wako undapuwanga ukaigwa vajang’ula vyakudya ku mikutano?

• Wako indikunagwela ulipanganiyenge pakulota ujang’ule vyakudya ku mikutano?

7. Yeova andapuwanga tukavamanyia vavetu vyatulipundisha

Dinkupagwa dinamuna dyoe dyakuvaulila vanu vanji umwiu wamu Ibibiliya. Shomya Dimu 9:1 na 34:1, na badae mwambangile mwaa vyakudya vya mwina:

• Shinu shani shaulipundishidye mu Ibibiliya shaulota kummanyia munu?

 KWAUNGWIPI

Wetu tunampuwangidya Namalunda wetu patulipudya ngwengwe kwake nae, patuka ku mikutano vya pashipinga, na tukavamanyia vanu vanji vinu vyatulipundisha.

Tukumbukilange

• Tulota kumanya dashi mwakulipudidya kumwe Yeova kulingana na malotelo ake?

• Mwaa shani ituvaikidile tulipudye kumwe Yeova bai?

• Mwaa shani tunalipudya na vanu vanji valota kumpuwangidya Nnungu?