LISHOMO 15
Yesu ni nyani?
Yesu ni munu jumo wakumanyika namene mu maimyo uti. Ata ikava davo, vanu vanji vankumanya vila lina lyake, voe havanammanya shinu shana nae, na voe vankuvanavo makumbukililo lakuvilingananga kwaupande umwe Yesu. Ibibiliya inkuvalanga nyamani kwaupande wake Yesu?
1. Yesu ni nyani?
Yesu ni njelo wadimongo anama kuwa. Nae aumbigwe namu Yeova Nnungu vikanava kumbigwa vinu uti. Ndyomana nae ankushamegwa “mwana ntandi pakati pa viumbi uti.” (Vakoloshu 1:15) Ibibiliya immalanga Yesu kuva “mwana-jumo tu bai” wake Nnungu mwaa Yesu ni aumbigwe shalowa namu Yeova. (Nshuwau 3:16) Yesu andikola madengo pepipepi na Tatake, Yeova, ampwashela kumba vinu uti. (Shomya Mikong’o 8:30.) Mpaka nelo Yesu ankuka mushu avanavo umbodi wa pepipepi namu Yeova. Nae ankutumikila kenga nkúvalanga wake Nnungu, yaani “Lilove,” kuvamanyia vanu mitenga na midimu Vyake Nnungu.—Nshuwau 1:14.
2. Mwaa shani Yesu andída mushilambo shapai?
Myaka 2.000 vipitile kunyuma, Yeova anditumila imumu yake yanashwe kwamakango pakulota kutumidya shingumi shimwe Yesu kuwa mpaka mu shitumbo sha mwalindembo walina Maliya. Kwa indila ai, Yesu andívalekwa kenga munu. (Shomya Lukashi 1:34, 35) Yeova andíntuma Yesu mushilambo shapai pakulota ave Mashiya wavalivikidíle, au Klistu, na kuvambola vanu. a Vyakulivikila uti vyamu Ibibiliya kwaupande umwe Mashiya vinditandeka, pakulota kuvapwashela vanu kummanya Yesu kenga “Klistu, mwanagwe Nnungu mumi.”—Mateu 16:16.
3. Ambi Yesu avele kwashi?
Baada Yesu akapele kenga munu, Yeova anintakatuwa kenga njelo na andyuujila kuwa. Kwanavo, “Nnungu aninkwedya sheo sha pashanya uti.” (Vapilipo 2:9) Ambi, Yesu avele palyutu lya madalaka makumene—Yeova bai ni wankumpunda nae dimongo.
LAMBELA KUMANYA VYOE
Lambela kummanya shana Yesu mwavalalele na mwaa shani ni shinu shambone kulipundisha kwake nae.
4. Yesu hanava shinu Nnungu Wadimongo-uti
Ibibiliya ivalanga kenga ata Yesu akava njelo wadimongo kuwa, nae amwigwilila Tatake, Yeova Nnungu. Mwaa shani tunkutangola davo? Lola VIDEO pakulota umanye Ibibiliya ipundisha nyamani kwaupande wa kuvilingananga kupagwi- te pakati pamwe Yesu namu Nnungu wadimongo-uti.
Maandiko la mwina lankutupwashela wetu kumanya kuvilingananga kupagwite pakati pamwe Yeova namu Yesu. Shomya kula lyaandiko, na badae mwambangile mwaa vyakudya vya mwina:
Shomya Lukashi 1:30-32.
-
Vanjelo vavalenge dashi umbodi upagwite pakati pamwe Yesu namu Yeova Nnungu, “Wapashanya-uti”?
Shomya Mateu 3:16, 17.
-
Paubatisho umwe Yesu, lidi lyalakadíle kuwa litangwele nyamani?
-
Wako wona kenga lidi alyo mwene avele nyani?
Shomya Nshuwau 14:28.
-
Nang’olo avenavo madalaka loe ni nyani? Tatamunu au mwana?
-
Manaake nyamani Yesu panshema Yeova Tatake?
Shomya Nshuwau 12:49.
-
Da Yesu ashona kenga nae na Tatake ni vanu vakulingana? Wako wonela mwashi?
5. Yesu andílodya kenga nae ni Mashiya
Ibibiliya inkuvanavo vyakulava vyoe vilota kuvapwashela vanu kummanya Mashiya—wakutandalegwa wake Nnungu pakulota avambole vanu. Lola VIDEO pakulota umanye vyakulava vyatandadidye Yesu baada yakwida mushilambo shapai.
Shomya vyakulava avi vivele mu Ibibiliya, na badae mwambangile mwaa vyakudya vya mwina:
Shomya Mikeya 5:2 pakulota umanye kwashi kwavalakwadidye Mashiya. b
-
Da vyakulava vishivalanga kuvalekwa kumwe Yesu vinditandeka?—Mateu 2:1.
Shomya Dimu 34:20 na Shakaliya 12:10 pakulota umanye vyakulava vishivalanga kupela kumwe Mashiya.
-
Vyakulava avi vinditandeka?—Nshuwau 19:33-37.
-
Wako wonela mwashi, da Yesu anditandedya vyakulava avi?
-
Vyakulava avi vinkukupa wakika shani kwaupande umwe Yesu?
6. Tunkupata ipaida kwa kulipundisha kwaupande umwe Yesu
Ibibiliya ivalanga kenga ni shinu shambone kulipundisha kwaupande umwe Yesu na ashilá shalota Nnungu nae atende. Shomya Nshuwau 14:6 na 17:3, na badae mwambangile mwaa shakudya sha mwina:
-
Mwaa shani ni shinu shambone kulipundisha kwaupande umwe Yesu?
Yesu andyungula indila pakulota tuve vambodi vake Nnungu. Nae andipundisha umwiu kwaupande umwe Yeova, na kupitila kwake Yesu, tunkuulula kupata shingumi shíkamalilika.
VANU VANJI VANKUSHIDONI: “Mashaidi va Yeova havanamwamini Yesu.”
-
Ulota kujang’ula dashi?
KWAUNGWIPI
Yesu ni njelo wadimongo. Nae ni Mashiya na Mwanagwe Nnungu.
Tukumbukilange
-
Mwaa shani Yesu ankushamegwa “mwana ntandi pakati pa viumbi uti”?
-
Hakanava kwida mushilambo shapai, Yesu atandile nyamani?
-
Wetu tunkumanya dashi kenga Yesu ni Mashiya?
LIPUNDISHE
Lipundishe vyoe kwaupande wa madengo lamwe Yesu kenga Mashiya.
Manya shana mwaipundishidya Ibibiliya kwaupande umwe Yesu ikava kenga avelé mwanagwe Nnungu kenga mwavavalakela vanu vana.
“Kwa Nini Yesu Anaitwa Mwana wa Mungu?” (Makala iliyo kwenye mtandao)
Manya mwaa shani Utatu halinava shinu lipundisho lyamu Ibibiliya.
Shomya pakulota umanye mwashi mwashukidile ndabadilika shingumi sha nkongwe, baada yakulambela kumanya Ibibiliya ipundisha nyamani kwaupande umwe Yesu.
“Mwanamke Myahudi Anaeleza Sababu Iliyomfanya Achunguze upya Imani Yake” (Amkeni!, Mei 2013)
a Lishomo 26 na 27 tundauka namanya mwaa shani vanu vankulota kwambwalegwa na Yesu ankutwambola dashi.
b Lola Dimbande dikumene 2 pakulota umanye shakulava shivalangenge shana kumilila kumwe Yesu mushilambo shapai.
