Primeru livru di Samuel 20:1-42
-
Lialdadi di Jonatan pa Davidi (1-42)
20 Nton, Davidi fuji di Naiote, na Ramá, i el ba inkontra ku Jonatan i el pergunta-l: “Kuzê ki N faze? Kal ki é nha krimi? Ki pekadu ki N faze kóntra bu pai pa el krê tra-m nha vida?”
2 Jonatan fla-l: “Bu ka ta móre. Nen ka bu pensa na kel-li! Nha pai ka ta faze ninhun kuza, nen grandi nen pikinoti, sen el pâpia ku mi primeru. Pamodi ki nha pai ta sukundiba kel asuntu li di mi? Kel-li ka ta kontise.”
3 Má, Davidi faze un juramentu i el fla: “Bu pai sabe dretu ma bu gosta di mi i talvês el pensa: ‘É midjór Jonatan ka sabe di kel-li pa el ka sufri.’ N ta jura pa Jeová, kel Deus bibu, i pa bu vida ma N sta kuazi ta móre!”
4 Nton, Jonatan fla Davidi: “N ta faze tudu kel ki bu pidi-m.”
5 Davidi fla Jonatan: “Manhan é fésta di lua nova, i rei ta spera ma N ta ba xinta ku el pa kume. Nton, planu é kel-li: bu debe dexa-m bai i N ta ba sukundi na kanpu ti dipôs di manhan di tardinha.
6 Si bu pai da kónta ma N ka sta, bu ta fla-l: ‘Davidi pidi-m pa N dexa-l bai faxi pa Belen, se sidadi, pamodi se família sta ba oferese un sakrifisiu ki es ta faze tudu anu.’
7 Si el fla: ‘Sta dretu’, kel-li krê fla ma N ka sta kóre prigu. Má si el fika ku raiba, bu pode ten serteza ma el sta disididu na prujudika-m.
8 Mostra-m amor lial, pamodi bu faze un kontratu ku bu sérvu dianti di Jeová. Má si N ten algun kulpa, mata-m abo. Pamodi ki bu debe intrega-m pa bu pai?”
9 Jonatan fla-l: “Ka bu fla un kuza di kel-li! Si N fika ta sabe ma nha pai krê prujudika-u, N ta fla-u.”
10 Nton, Davidi fla Jonatan: “Má ken ki ta aviza-m si bu pai fika xatiadu ku bo?”
11 Jonatan fla Davidi: “Ben, nu bai pa kanpu mi ku bo.” Nton, es bai pa kanpu.
12 Jonatan fla Davidi: “Pa Jeová, kel Deus di Israel, ser tistimunha ma manhan ô dipôs di manhan, más ô ménus pa vólta di kel óra li, N ta pâpia ku nha pai pa N sabe kuzê ki el sta ta pensa. Si N odja ma el ka tene nada kóntra bo, N ta manda fla-u.
13 Má pa Jeová kastiga-m duru, si N fika ta sabe ma nha pai krê faze-u algun kuza mariadu, N ka aviza-u i N ka dexa-u bai na pas. Pa Jeová sta ku bo, sima el staba ku nha pai.
14 I pa bu mostra-m amor lial di Jeová timenti N sta bibu i ti mésmu óras ki N móre.
15 Nunka ka bu dexa di mostra amor lial pa kes algen di nha família, mésmu óras ki Jeová kaba ku tudu inimigu di Davidi na téra.”
16 Nton, Jonatan faze un kontratu ku família di Davidi, i el fla-l: “Pa Jeová kastiga tudu inimigu di Davidi.”
17 Nton, Jonatan poi Davidi ta jura otu bês pa amor ki Davidi tinha pa el, pamodi Jonatan ta amaba el sima el ta amaba se kabésa.
18 Jonatan fla-l: “Manhan é fésta di lua nova, i es ta da kónta ma bu ka sta la pamodi bu lugar ta sta vaziu.
19 Dipôs di manhan, es ta da kónta más inda ma bu ka sta la. Pur isu, volta pa kel lugar ki bu staba sukundidu kel otu dia* i fika pértu di kel pédra li.
20 Nton, N ta da ku flexa três bês pa un ladu di kel pédra li, sima si N sta ta da ku flexa pa panha na algun kuza.
21 Óras ki N manda kel ajudanti, N ta fla-l: ‘Ba panha kes flexa.’ Si N fla kel ajudanti: ‘Kes flexa sta más pa kel ladu li, panha-s’, nton bu pode volta, pamodi N ta jura pa Jeová, kel Deus bibu, ma kel-li krê fla ma sta tudu dretu ku bo i ma bu ka sta kóre prigu más.
22 Má, si N fla kel rapás: ‘Odja! Kes flexa sta más pa frenti’, nton bai bu kaminhu, pamodi Jeová krê pa bu bai.
23 I pa Jeová ser tistimunha pa tudu ténpu di kel promésa ki nu faze, mi ku bo.”
24 Nton, Davidi sukundi na kanpu. Kantu txiga fésta di lua nova, rei xinta na méza pa kume.
25 Rei staba xintadu na se lugar di kustumu, djuntu di paredi. Jonatan staba xintadu frenti di Saul, i Abner staba xintadu na ladu di Saul, má lugar di Davidi staba vaziu.
26 Saul ka fla nada na kel dia, pamodi el pensa: ‘Talvês kontise algun kuza i el ka sta puru. El debe sta inpuru.’
27 Na kel otu dia, dipôs di fésta di lua nova, na sugundu dia, lugar di Davidi kontinua vaziu. Nton, Saul pergunta se fidju Jonatan: “Pamodi ki kel fidju di Jesé ka ben kume nen onti nen oji?”
28 Jonatan responde Saul: “Davidi pidi-m pa N dexa-l bai Belen.
29 El fla-m: ‘Favor dexa-m bai, pamodi nha família sta faze un sakrifisiu na sidadi, i nha irmon manda txoma-m. Pur isu, si bu sta kontenti ku mi, favor dexa-m bai pa N ba odja nhas irmon.’ É pamodi kel-li ki el ka ben kume na méza djuntu ku rei.”
30 Pamodi kel-li Saul fika txeu xatiadu ku Jonatan, i el fla-l: “É bo fidju di mudjer rebéldi! Bu pensa ma N ka sabe ma bu ta prifiri fika di ladu di kel fidju di Jesé? Abo é un vergónha pa bu kabésa i pa bu mai!
31 Timenti kel fidju di Jesé sta bibu na téra, nen bo nen bu reinu ka sta suguru. Nton, manda algen pa ba buska-l, pamodi el ten ki móre.”*
32 Má Jonatan fla Saul, se pai: “Pamodi ki el debe móre? Kuzê ki el faze?”
33 Nton Saul tenta da-l ku lansa pa mata-l i Jonatan odja klaru ma se pai staba disididu na mata Davidi.
34 Kel óra, Jonatan fika xatiadu, el labanta di méza i el ka kume nada na sugundu dia dipôs di fésta di lua nova. El staba txeu tristi pamodi Davidi i pamodi se pai rabaxa-l.
35 Na kel otu dia di palmanhan, Jonatan bai pa kanpu pa el ba inkontra ku Davidi sima dja es konbinaba, i kel rapás ki éra se ajudanti staba djuntu ku el.
36 I el fla se ajudanti: “Favor, kóre i ba panha kes flexa ki N sta da ku el.” Se ajudanti kóre i Jonatan da ku un flexa pa lonji di el.
37 Kantu kel ajudanti txiga na undi ki staba kel flexa ki Jonatan da ku el, Jonatan grita-l: “Kel flexa ka sta más pa frenti?”
38 Jonatan grita pa kel ajudanti: “Faxi! Kóre! Ka bu perde ténpu!” Nton, kel ajudanti panha kes flexa i el volta pa se sinhor.
39 Kel ajudanti ka sabia di nada ki staba ta pasa. Sô Jonatan ku Davidi ki sabia kuzê ki kel-la krê flaba.
40 Dipôs, Jonatan da se ajudanti se arma i el fla-l: “Bai, leba-s pa sidadi.”
41 Kantu kel ajudanti bai, Davidi sai di kel lugar undi ki el staba sukundidu la pértu, pa ladu sul, i el inbaxa três bês ku róstu pa txon. Nton, es da kunpanheru beju i es txora pa kunpanheru, má Davidi txora más txeu.
42 Jonatan fla Davidi: “Bai na pas, pamodi nos dôs nu jura na nómi di Jeová, i nu fla: ‘Pa Jeová ser tistimunha entri mi ku bo i entri nhas disendenti* i bus disendenti pa tudu ténpu.’”
Dipôs, Davidi bai se kaminhu i Jonatan volta pa sidadi.
Nótas di rodapé
^ Na ebraiku ta fla: “na kel dia di trabadju”.
^ Na ebraiku ta fla: “el é un fidju di mórti”.
^ Na ebraiku ta fla: “simenti”.
