Sugundu livru di Samuel 24:1-25
24 Jeová fika txeu xatiadu otu bês ku Israel pamodi algen poi Davidi ta* aji kóntra povu, kantu el fla: “Bai, faze resensiamentu di Israel i di Judá.”
2 Nton, rei Davidi fla Joabe, xéfi di trópas ki staba djuntu ku el: “Bai na tudu kes tribu di Israel, di Dan ti Berseba, i konta povu, asi pa N sabe es é kantu.”
3 Má, Joabe fla rei: “Pa Jeová, bu Deus, poi povu ta bira 100 bês más txeu i pa odju di sinhor rei odja kel-li. Má pamodi ki sinhor rei krê faze un kuza di kel-li?”
4 Má, rei nega obi ku Joabe i ku kes xéfi di trópa. Nton, Joabe i kes xéfi di trópa sai di dianti di rei i es ba konta povu di Israel.
5 Es trabesa Jurdon, i es arma kanpamentu na Aroer, pa ladu direita* di sidadi ki ta fika na meiu di vali. Es bai na direson di téra di kes gadita i dipôs es bai pa Jazer.
6 Dipôs, es bai pa Jiliade i pa téra di Tatin-Odsi. Di la, es bai pa Dan-Jan i pa Sidon.
7 Dipôs, es bai pa sidadi di proteson na Tiru i pa tudu kes sidadi di kes eveu i di kes kananeu. Nton, es txiga na Berseba, ki ta fika na Negebe di Judá.
8 Di kel manera li, es anda pa país interu i es volta pa Jiruzalen dipôs di 9 mês i 20 dia.
9 Nton, Joabe da rei nunbru di kes algen ki kontadu. Israel tinha 800 mil trópa armadu ku spada, i Judá tinha 500 mil ómi.
10 Má dipôs ki Davidi konta povu, se korason* fika ta kondena-l, pur isu el fla Jeová: “N faze un pekadu gravi kantu un faze kel-li. I gósi, pur favor Jeová, púrdua éru di bu sérvu, pamodi N aji sima un algen ki ka ten juís.”
11 Kantu Davidi labanta di palmanhan, proféta Gade, ki éra videnti* di Davidi, resebe kel mensajen li di Jeová:
12 “Bai i bu fla Davidi: ‘É kel-li ki Jeová fla: “N sta da-u três kastigu. Skodje kal di es ki bu krê resebe.”’”
13 Nton, Gade bai na Davidi i el pergunta-l: “Kuzê ki bu ta prifiri? Seti anu di fómi na bu país? Pa bu pasa três mês ta fuji di bus inimigu, timenti es ta pirsigi-u? Ô bu ta prifiri três dia di pésti na bu país? Pensa dretu i fla-m kuzê ki N debe fla kel Algen ki manda-m.”
14 Davidi fla Gade: “Kel-li é duru dimás pa mi. N ta prifiri pa nu kai na mô di Jeová, pamodi se mizerikórdia é grandi, má N ka krê kai na mô di ninhun ómi.”
15 Nton, Jeová manda un pésti pa kastiga Israel, désdi palmanhan ti kel ténpu ki Deus marka, i móre 70 mil algen, désdi Dan ti Berseba.
16 Kantu kel anju labanta mô pa distrui Jiruzalen, Jeová xinti tristi pamodi kel pésti, i el fla kel anju ki staba ta distrui povu: “Dja txiga! Baxa bu mô.” Kel anju di Jeová staba pértu di kel lugar di digudja* di Araúna, kel jebuzeu.
17 Kantu Davidi odja kel anju ki staba ta mata povu, Davidi fla Jeová: “É mi ki peka i é mi ki fadja. Má kuzê ki kes ovelha la faze? Favor, kastiga-m ami i família di nha pai.”
18 Na kel mésmu dia, Gade ba djobe Davidi i el fla-l: “Subi i faze un altar pa Jeová na lugar di digudja di Araúna, kel jebuzeu.”
19 Nton Davidi subi sima Gade fla-l, sima Jeová dja mandaba el.
20 Kantu Araúna odja rei ku se sérvus ta bai na se direson, kel óra, el sai i el inbaxa ku róstu pa txon dianti di rei.
21 Nton, Araúna pergunta-l: “Pamodi ki sinhor rei ben odja se sérvu?” Davidi responde-l: “N ben kunpra bu lugar di digudja pa N faze un altar pa Jeová, asi pa kel pésti para di kastiga povu.”
22 Má Araúna fla Davidi: “Sinhor rei, nho pode fika ku el i nho oferese kuzê ki nho krê.* Toma kes boi li pa nho faze oférta kemadu i tanbê kes tábua di digudja* i kanga di kes boi pa nho faze lenha ku es.
23 N* ta da sinhor rei, tudu kes kuza li.” I Araúna tanbê fla rei: “Pa Jeová, bu Deus, abensua-u.”
24 Má, rei fla Araúna: “Nau, N ten ki kunpra-u el. N ka ta oferese Jeová, nha Deus, sakrifisius kemadu ki ka ta kusta-m nada.” Pur isu, Davidi kunpra kel lugar di digudja i kes boi pa 50 siklu* di prata.
25 Davidi faze un altar pa Jeová la i el oferese sakrifisius kemadu i sakrifísius di pas. Nton, Jeová obi kes pididu di ajuda ki Davidi faze pa país i kel pésti para di kastiga Israel.
Nótas di rodapé
^ Ô: “kantu Davidi podu ideia na kabésa pa”.
^ Ô: “pa sul”.
^ Ô: “konsénsia”.
^ Djobe Disionáriu di Bíblia.
^ Djobe Disionáriu di Bíblia.
^ Ô: “kel ki nho ta atxa ma é dretu”.
^ Tábuas di madera ki vaka ta rastaba pa siparaba simenti di kaska. Djobe Disionáriu di Bíblia.
^ Na ebraiku ta fla: “Araúna ta da”.
