Romanus 10:1-21
10 Irmons, na verdadi kuzê ki N krê di korason i ki N ta inplora* Deus é pa nha povu ser salvu.
2 Pamodi ami é tistimunha ma es ten zelu pa Deus, má ka di akordu ku konhisimentu izatu.
3 Dja ki es ka konxe justisa di Deus, es ta sigi ses própi régra, pamodi es ka ta obidese kel ki Deus ta fla ma é justu.
4 Pamodi Kristu é fin di Lei, asi pa tudu kel ki mostra fé na el txomadu di justu.
5 Pamodi Muizés skrebe sobri justisa ki ta ben através di Lei: “Kel ómi ki ta faze kes kuza li ta vive através di es.”
6 Má sobri kel justisa ki ta ben di mostra fé, Palavra di Deus ta fla: “Ka bu fla na bu korason: ‘Ken ki ta subi séu?’ kel-li krê fla pa poi Kristu ta dixi,
7 ô: ‘Ken ki ta dixi ti abismu?’ kel-li krê fla pa resusita* Kristu.”
8 Má kuzê ki Skrituras ta fla? “Palavra sta pértu di bo na bu própi bóka i na bu própi korason”, kel-li krê fla “kel palavra” di fé, ki nu sta ta prega.
9 Pamodi si bu fla pa tudu algen ku bu bóka ma Jizus é Sinhor, i ku bu korason bu mostra fé ma Deus resusita-l,* bu ta ser salvu.
10 Pamodi ku korason un algen ta mostra fé pa el pode ser justu, má ku bóka el ta pâpia ku otus algen sobri se fé pa el pode ser salvu.
11 Pamodi ten un párti di Skrituras ki ta fla: “Ningen ki poi fé na el, ka ta fika diziludidu.”
12 Pamodi ka ten diferénsa entri judeu i gregu. Kel mésmu Sinhor sta riba di nos tudu, el é riku* pa tudu kes ki ta invoka-l.
13 Pamodi “tudu kel ki invoka nómi di Jeová* ta ser salvu.”
14 Má, modi ki es ta invoka-l si es ka poi fé na el? Modi ki es ta poi fé na el si es ka obi ta papiadu di el? Modi ki es ta obi si ningen ka prega?
15 Má, modi ki es ta prega si es ka mandadu? Sima sta skrebedu: “Fórti bunitu é pé di kes algen ki ta prega kes notísia sábi di kuzas dretu!”
16 Má é ka tudu algen ki seta kes notísia sábi. Pamodi Izaías fla: “Jeová,* kenha ki poi fé na kes kuza ki nu fla?”*
17 Fé ta sigi kel palavra ki el obi. I kel palavra ta obidu, óras ki algen pâpia sobri Kristu.
18 Má N ta pergunta: es fika sen obi? Pamodi na verdadi, “ses son obidu na tudu lugar di téra i ses mensajen txiga na kes lugar más lonji di téra.”
19 N ta torna pergunta: Israel ka intende? Primeru, Muizés fla: “N ta ben uza un povu ki é ka un nason pa pô-s ta xinti siumis. N ta ben uza un nason ki ka ten juís pa N pô-s ta xinti raiba.”
20 Má Izaías fla ku koraji: “Kes ki ka staba ta djobe-m, atxa-m, i kes ki ka staba ta pergunta pa mi, bira ta konxe-m.”
21 Má el ta fla sobri Israel: “Dia interu N stende nha mô pa un povu ki ka ta obi i ki é temozu.”*
Nótas di rodapé
^ Ô: “suplika”.
^ Na gregu ta fla: “pa subi na meiu di mortus”.
^ Na gregu ta fla: “labanta-l di mórti”.
^ Ô: “el ta da txeu benson”.
^ Na gregu ta fla: “na kel kuza ki obidu di nos”.
^ Ô: “rebéldi”.
