LISON 10
Modi ki bu pode sabe kal ki é relijion verdaderu?
1. Ten sô un relijion verdaderu?
‘Nhos toma kuidadu ku falsus proféta.’ – MATEUS 7:15.
Jizus inxina se sigidoris sô un relijion: kel verdaderu. Relijion verdaderu é sima un strada ki ta leba-nu pa vida. Jizus fla: ‘Kes algen ki ta atxa-l é poku.’ (Mateus 7:14 ) Deus ta seta sô relijion ki ta sigi se Palavra, ki é verdadi. Tudu kes adorador verdaderu sta unidu na un sô fé. — Lé João 4:23, 24; 14:6; Efésios 4:4, 5.
Odja vídiu Deus ta seta tudu tipu di relijion?
2. Kuzê ki Jizus fla di falsus kriston?
‘Es ta fla na meiu di tudu algen ma es konxe Deus, má es ta nega-l pa kuzas ki es ta faze.’ — TITO 1:16.
Jizus aviza ma kes falsu proféta ta stragaba relijion verdaderu. Pa fóra, es ta parse ma es é adorador verdaderu. Ses relijion ta fla ma es é kriston. Má, nu ta konsigi odja ma es é ka kriston verdaderu. Modi? Pamodi é sô na relijion verdaderu ki nu ta atxa kristons di verdadi. Tudu algen ta da kónta ma es ten bon manera di ser i ma es ta faze kuzas dretu. — Lé Mateus 7:13-23.
3. Modi ki bu pode sabe ken ki é kristons verdaderu?
Odja sinku manera:
-
Kristons verdaderu ta ruspeta Bíblia pamodi el é Palavra di Deus. Es ta faze di tudu pa vive sima Bíblia ta fla. Nton, relijion verdaderu é ka sima kes relijion ki ta sigi ideias di ómi. (Mateus 15:7-9 ) Kristons verdaderu ka ta prega un kuza pa dipôs es faze otu. — Lé João 17:17; 2 Timóteo 3:16, 17.
-
Ken ki ta sigi Jizus di verdadi ta da valor pa nómi di Deus, ki é Jeová. Jizus da nómi di Deus valor kantu el inxina pesoas kal ki é nómi di Deus. El djuda pesoas konxe Deus i el inxina-s ora pa nómi di Deus ser santifikadu. (Mateus 6:9 ) Na undi ki bu ta mora ki relijion ki ta inxina kal ki é nómi di Deus? — Lé João 17:26; Romanos 10:13, 14.
-
Kristons verdaderu ta prega Reinu di Deus. Jeová manda Jizus pa prega ‘notísias sábi di Reinu’. Speransa pa tudu algen é sô Reinu di Deus. Ti dia ki Jizus móre el pâpia di Reinu. (Lúkas 4:43; 8:1; 23:42, 43, BPK ) El fla ma se sigidoris ta pregaba Reinu. Si un algen ben bu kaza i el pâpia ku bo di Reinu di Deus, bu ta fla ma el é di ki relijion? — Lé Mateus 24:14.
-
Ken ki ta sigi Jizus ka ta faze párti di es mundu mau. Bu ta konxe-s pamodi es ka ta mete na pulítika, na grévi nen na manifestason. (João 17:16; 18:36 ) Tanbê es ka ta faze kuzas mariadu di es mundu. — Lé Tiago 4:4.
-
Kristons verdaderu é konxedu pa amor ki es ten pa kunpanheru. Na Palavra di Deus, es prende ruspeta algen di tudu rasa. Txeu bês relijion falsu ta da géra di mundu grandi apoiu, má kristons di verdadi ka ta faze si. (Miqueias 4:1-3 ) Kristons verdaderu, di korason, es ta uza ses ténpu i kuzas ki es ten pa djuda otus i pa da-s koraji. — Lé João 13:34, 35; 1 João 4:20.
4. Bu ta konsigi sabe kal ki é relijion verdaderu?
Ki relijion ki ta inxina sô kel ki sta na Bíblia, ki ta da nómi di Deus valor, ki ta prega ma é sô Reinu di Deus ki é speransa pa tudu algen? Ki grupu ki ta mostra amor i ki ka ta mete na géra? Kuzê ki bu ta atxa? — Lé 1 João 3:10-12.
