Diskriminason ten kura
Na kes otu artigu nu pâpia di prinsípius di Bíblia ki dja djuda milhons di algen faze txeu kuza pa tra kes ideia mariadu ki es tinha na korason sobri un algen ô un grupu. Má di nos pa nos nu ka ta konsigi kaba ku tudu diskriminason ki ten na mundu. Nton, kel-li krê fla ma diskriminason ka ten kura?
Un govérnu perfetu
Govérnu di ómi ka konsigi kaba ku diskriminason. Má ten algun govérnu ki ta konsigi faze kel-li?
Pa un govérnu konsigi kaba ku diskriminason el meste
-
1. Poi algen ku gana di muda kuzê ki el ta pensa i ki el ta xinti sobri otus algen.
-
2. Kaba ku kes mágua ki txeu algen ten pamodi es sufri diskriminason, i pur isu é más difísil es trata otus algen ku justisa.
-
3. Ten bons governanti ki ka ten ninhun tipu di diskriminason.
-
4. Poi algen di tudu nason ta fika unidu.
Bíblia ta da-nu sertéza ma Deus dja kria es govérnu perfetu. El ta txomadu di ‘Reinu di Deus’. — Lúkas 4:43, BPK.
Odja kuzê ki es govérnu ta ben faze.
1. Inxina kel ki é dretu
‘Pesoas ki ta mora na el [téra] ta [ben] prende justisa.’ — ISAÍAS 26:9.
‘Rezultadu di justisa di verdadi ta ser pas, i frutu di justisa di verdadi ta ser soségu i suguransa ki ka ta kaba.’ — ISAÍAS 32:17.
Kuzê ki kel-li krê fla? Reinu di Deus ta ben inxina algen kuzê ki é dretu. Óras ki un algen prende kuzê ki é dretu i mariadu, kuzê ki é justu i injustu el ta muda se manera di pensa sobri otus algen. Tudu algen ta ben prende ma ama tudu tipu di algen é un kuza dretu.
2. Kaba ku injustisa
Deus ‘ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór. Kuzas di pasadu ka ta ben más.’ — APOCALIPSE 21:4.
Kuzê ki kel-li krê fla? Reinu di Deus ta ben kaba ku tudu dór ki algen ta xinti pamodi injustisa. Kes algen ki tratadu mariadu ka ta ben ten ninhun motivu pa xinti ódiu.
3. Un governanti justu
‘El ka ta ben julga sô pa kel ki ta parse, nen el ka ta ben da reprenson sô pa kel ki el ta obi. El ta ben julga kes ki é koitadu ku justisa, i el ta da reprenson ku justisa pa djuda kes mansu na Téra.’ — ISAÍAS 11:3, 4.
Kuzê ki kel-li krê fla? Jizus Kristu, ki é Rei di Reinu di Deus, ta ben governa Téra interu ku justisa. Jizus ta ben trata tudu nason igual. I tanbê el ta garanti ma tudu algen na Téra ta ben sigi se leis.
4. Union
Reinu di Deus ta inxina algen ‘ten kel mésmu manera di pensa i mésmu amor, sta tudu unidu, tene kel mésmu pensamentu’. — FILIPENSES 2:2.
Kuzê ki kel-li krê fla? Union di kes algen ki ta dexa Reinu di Deus governa-s ka ta ben ser sô na bóka. Es ta ben ‘sta tudu unidu’ pamodi es ta ben ama kunpanheru di verdadi.
