Kes primeru 60 minutu di vida di un bebé fóra di bariga di se mai é txeu inportanti. Pamodi? Pamodi kel ligason ki un mai ta kria ku se bebé duránti kes minutu é inportanti pa djuda kel bebé kria i dizenvolve. a

Kuzê ki ta poi un mai ta kuida di se bebé ki kaba di nase ku amor? Un profesóra b di universidadi splika na un revista c ma dipôs ki un mudjer ten fidju, ten un ormona ki ta omenta na se korpu i “ki ta djuda-l dizenvolve kes sentimentu di mai sima el ta ba ta toka, odja i da se fidju mama.” Tanbê, ten un otu ormona ki ta dizenvolve na se korpu i ki ta “djuda-l da se bebé atenson” i midjora kel relason entri el ku se fidju. Pamodi ki kel-li é inportanti?

Kel ligason fórti ki ta izisti entri un mai i se bebé é trabadju di nos Kriador, Jeová, d ki ta ama-nu. Rei Davidi fla ma Deus ‘tra-l di déntu di bariga’ i pô-l ta xinti suguru na brasu di se mai. El ora: ‘Désdi ki N nase N ntregadu na bo pa bu toma kónta di mi; désdi bariga di nha mai, abo é nha Deus.’ — Salmo 22:9, 10.

PENSA NA KEL-LI: Deus kria kel ligason fórti entri un mai ku se bebé pa garanti ma un mai ta kuida di se bebé ku amor i el ta da-l atenson. Nton, nu pode ten sertéza ma Deus tanbê ta preokupa ku kada un di nos, pamodi nos é ‘fidjus di Deus’. — Atos 17:29.

Jizus Kristu, ki konxe Kriador midjór di ki kalker algen, fla: ‘Ka ta bendedu dôs pardal pa un muéda ki ten poku valor? Má, ninhun di es ka ta kai na txon sen nhos Pai da kónta. Ti mésmu kabélu ki nhos ten na kabésa sta tudu kontadu. Pur isu, ka nhos xinti medu; nhos bale más di ki txeu pardal.’ — Mateus 10:29-31.

É poku algen ki ta presta atenson na kada pasu pikinoti ki es ta odja, inda más pa es repara si algun di es kai na txon. Má, nos Pai na Séu ta presta atenson na kada un di es! I pa Deus, anos nu ten mutu más valor di ki un monti pasu. Lison pa nos é klaru: ka bu fika ku dúvida si Deus ta presta atenson na kuzas ki ta kontise ku bo, ‘ka bu xinti medu’, pamodi Deus ta preokupa txeu ku bo!

Bíblia ta garanti-nu

• ‘Odju di Jeová sta na tudu lugar, ta djobe kes algen mau ku kes algen bon.’ — PROVÉRBIOS 15:3.

• ‘Jeová sta ku odju na kes algen justu, i se obidu ta obi ses gritu di ajuda.’ — SALMO 34:15.

• ‘N ta ben xinti grandi alegria na bu amor lial, pamodi bu ta odja nha sufrimentu; bu konxe kel tristéza grandi ki N ta xinti.’ — SALMO 31:7.

Deus ta presta atenson na kada un di nos, el ta ama-nu i el ta preokupa ku nos. Sabe kel-li ta faze diferénsa? Klaru ki sin. Un mudjer di Inglatéra ki txoma Ana, e fla:

“Ka ta da nen pa konta kantu bês ki N xinti ma Jeová ka ta amaba mi i ma el ka ta obiba nhas orason. N ta atxaba ma éra pamodi N ka tinha txeu fé. N ka ta xintiba ma mi éra inportanti pa Deus, pur isu, el staba ta kastiga-m i el ka ta ligaba mi. N ta atxaba ma Deus ka ta preokupaba ku mi.”

Má gósi, Ana ka ten dúvida ma Jeová ta ama-l i ma el ta preokupa ku el. Kuzê ki pô-l ta muda di ideia? El fla: “Poku-poku N kumesa ta muda nha manera di pensa. N ta lenbra di un diskursu ki N obiba ku bazi na Bíblia, dja ten txeu ténpu, sobri sakrifisiu di resgati ki Jizus faze. Kel diskursu mexe txeu ku mi i el djuda-m ten sertéza ma Jeová ta ama-m. I óras ki el ta respondeba nhas orason, txeu bês N ta txoraba pamodi kel-la ta mostraba ma el ta amaba mi di verdadi. Tanbê, studa Bíblia i sisti runion djuda-m prende más sobri Jeová, se kualidadis i kuzê ki el ta xinti pa nos. Gósi N ta odja klaru ma Jeová ta ama-nu i ma el krê kuida di kada un di nos.”

Kes palavra di Ana ta toka nos korason. Má, modi ki bu pode ten sertéza ma Deus ta ntende i ma el ta preokupa ku bus sentimentu? Kel otu artigu ta ben responde kel pergunta li.