Óras ki bu ta krê konxe un algen, primeru kuza ki talvês bu ta pergunta-l é: “Modi ki bu txoma?”. Si bu fazeba Deus kel pergunta li, modi ki el ta respondeba?

‘Ami é Jeová. Kel-li é nha nómi’. — Isaías 42:8.

Nómi di Deus é inportanti pa el própi. Ningen ka da Deus nómi. É el própi ki skodje se nómi. Jeová fla: “Kel-li é nha nómi pa tudu ténpu, i é si ki N debe lenbradu di el di jerason pa jerason.” (Ézudu 3:15) Na Bíblia nómi di Deus ta parse más txeu di ki kalker otu titlu ki el ten, sima Tudu-Poderozu, Pai, Sinhor, ô Deus, i el ta parse más txeu di ki kalker otu nómi, sima Abraon, Muizés, Davidi ô Jizus. Tanbê, Jeová krê pa se nómi ser konxedu. Bíblia ta fla: ‘Pa pesoas sabe ma bo, ki txoma Jeová, sô bo é kel Más Grandi riba téra interu.’ — Salmo 83:18.

Nómi di Deus é inportanti pa Jizus. Na kel orason ki é konxedu pa Pai-Nosso, Jizus inxina se sigidoris pa pidi Deus: “Pa bu nómi ser santifikadu.” (Mateus 6:9) Tanbê, Jizus ora pa Deus: “Nha Pai, da bu nómi glória.” (Juan 12:28) Da nómi di Deus glória éra kel kuza más inportanti na vida di Jizus i pur isu, el pode flaba na orason: “N pô-s ta konxe bu nómi i N ta kontinua ta pô-l konxedu”. — Juan 17:26.

Nómi di Deus é inportanti pa kes algen ki konxe-l. Povu di Deus na pasadu sabia ma nómi di Deus  éra txeu inportanti pa es resebeba proteson i salvason. Bíblia ta fla: ‘Nómi di Jeová é un tori fórti. Justu ta kóre pa déntu di el i el ta resebe proteson.’ (Provérbios 18:10) Tanbê el ta fla: ‘Tudu kel ki invoka nómi di Jeová ta ser salvu’. (Joel 2:32) Tanbê Bíblia ta fla ma nómi di Deus ta djudaba mostra ken ki ta sirbi-l. Bíblia ta fla: ‘Pamodi tudu povu ta ben anda, kada un na nómi di se deus, má nos nu ta ben anda na nómi di Jeová, nos Deus, pa tudu ténpu.’ — Miqueias 4:5; Atus 15:14.

Un nómi ki sô Deus ki ten. Txeu studiozu ta fla ma nómi Jeová siginifika “El ta poi ta bira”. Própi Jeová djuda-nu intende siginifikadu di se nómi kantu el fla Muizés kes palavra li: “N Ta Bira Kel Ki N Disidi Bira.” (Ézudu 3:14) Nton, nómi di Deus ta inxina-nu ma el é más di ki sô un Kriador ki faze tudu kuza. Se nómi ta mostra se kapasidadi di poi se kabésa ô se kriason ta bira kel ki meste pa kunpri se vontadi. Enbóra kes titlu ki Deus ten ta mostra se puzison, autoridadi ô puder ki el ten, é sô se nómi Jeová ki ta mostra tudu kel ki el é i ki el ta pode bira.

Un nómi ki ta mostra ma Deus krê pa nu ser se amigu. Siginifikadu di nómi di Deus ta mostra ma el ta inporta ku se kriason i kel-li ta inklui kada un di nos. Pamodi Deus poi se nómi ta ser konxedu, kel-li ta mostra ma el krê pa nu konxe-l. Na verdadi, Deus fla-nu se nómi mésmu antis di nu pergunta-l. Kel-li ta mostra ma Deus ka krê pa nu odja-l sima un algen ki sta lonji i ki nu ka ta pode txiga na el. Má el krê pa nu odja-l sima un algen ki ta izisti mê i ki nu pode bira se amigu. — Salmo 73:28.

Óras ki nu ta uza nómi di Deus nu ta mostra ma nu krê ser se amigu. Imajina ma bu krê bira amigu di un algen i bu ta fla-l bu nómi. Modi ki bu ta xinti si kel algen ka ta krê uza bu nómi? Talvês, ku ténpu bu pode fika ku dúvida si kel algen krê ser bu amigu mê. Mésmu kuza ta kontise ku Deus. Jeová fla tudu algen se nómi i el krê pa nu uza-l. Óras ki nu ta uza se nómi nu ta mostra Jeová ma nu krê ser se amigu. I ti óras ki un algen ‘ta pensa na se nómi’, Jeová ta da kónta! — Malaquias 3:16.

Prende nómi di Deus é kel pasu más inportanti pa bu konxe-l. Má é ka sô kel-la ki nu debe faze. Nu meste konxe kel Algen ki ten kel nómi. Nu meste sabe modi ki kel algen é.