FÓRTI SPERANSA SÁBI! Nos Kriador promete ma nu pode vive pa tudu ténpu li na téra. Má pa txeu algen, é difísil kridita na kel-li. Es ta fla: ‘Tudu algen na mundu ta móre un dia. Mórti ta faze párti di vida.’ Otus ta kridita ma nu pode vive pa tudu ténpu, má é ka li na téra. Es ta atxa ma un algen sô pode vive pa tudu ténpu dipôs ki el móre i el ba séu. Kuzê ki bu ta atxa?

Antis di responde, nu ben odja modi ki Bíblia ta responde kes três pergunta li: Manera ki algen fazedu ta mostra ma nu pode vive pa tudu ténpu? Ki tipu di vida ki Deus sénpri kreba pa nu tinha i modi ki el kreba pa téra sérba? Pamodi ki nu ta móre?

Deus faze txeu tipu di vida na téra, má algen é spesial. Pamodi? Bíblia ta fla ma é sô algen ki Deus faze ‘sima se imaji i ta parse ku’ el. (Génesis 1:26, 27) Kuzê ki kel-li krê fla? Ma algen fazedu ku kapasidadi i kualidadis ki Deus ten, sima amor i justisa.

Tanbê, nu fazedu ku kapasidadi di pensa i rasusina. Nu pode odja kal ki é diferénsa entri kuzê ki é dretu i kuzê ki é mariadu i tanbê nu ten dizeju di konxe Deus i di faze amizadi ku el. Pur isu, nu ta fika dimiradu na modi ki séu ku téra é grandi i bunitu, ku kes kuza bunitu ki Deus faze, ku kes kuza di arti, múzika i puéma. I más inportanti, nu ten kapasidadi di adora nos Kriador. Kes kuza li ta mostra ma algen é diferenti di tudu kes otu kuza ki Deus faze na téra.

Para i pensa: Deus faze-nu ku kualidadis bunitu ki nu pode dizenvolve i midjora. Bu ta atxa ma el ta fazeba kel-li si el kreba pa algen viveba poku ténpu? Deus faze-nu ku kes kualidadi i kapasidadis spesial li pa nu ser filís i pa nu vive li na téra pa tudu ténpu.

Alguns algen ta fla ma Deus nunka ka kreba pa algen viveba li na téra pa tudu ténpu. Es ta atxa ma nu sta li sô pa un ténpu. I ma Deus sta ta prova-nu pa el odja si nu merese ba vive ku el na séu pa tudu ténpu ô nau. Má, bu ka ta konkorda ma si kel-li é verdadi, é Deus ki é kulpadu pa sufrimentu i maldadi ki ta izisti gósi? Kel-li ka ten  nada aver ku kes kualidadi ki el ten. Bíblia ta fla kel-li sobri Deus: ‘Tudu se kaminhus é justisa. El é un Deus fiel, ki nunka é ka injustu, el é justu i rétu.’ — Deuteronómio 32:4.

Bíblia ta mostra klaru pamodi ki Deus faze téra. El ta fla: ‘Séu é di Jeová, má Téra el da pa fidjus di ómi.’ (Salmo 115:16) Deus faze téra pa ser nos kaza bunitu pa tudu ténpu, ku tudu kes kuza ki nu meste pa nu ten un vida sábi i ki ka ta kaba. — Génesis 2:8, 9.

‘Séu é di Jeová, má Téra el da pa fidjus di ómi.’ — Salmo 115:16

Bíblia tanbê ta mostra klaru pamodi ki Deus faze algen. El da kel órdi li pa kel primeru kazal: ‘Nhos intxi Téra i nhos manda na tudu kriatura bibu ki ta mexe riba Téra.’ (Génesis 1:28) Es ta kuidaba di ses kaza sábi i es ta biraba téra interu na un paraízu. I kel-li ta daba es txeu filisidadi. Ta fika klaru ma obijetivu di Deus éra pa Adon ku Eva i ses fidjus viveba pa tudu ténpu li na téra, ka na séu.

Nton, pamodi ki nu ta móre? Bíblia ta mostra ma un anju rebéldi, ki dipôs bira ta txomadu Satanás i Diabu, tenta straga kel ki Deus faze na jardin di Éden. Modi ki el faze kel-li?

Satanás poi Adon ku Eva, ki é nos primeru pai ku mai, ta rabela kóntra Deus sima el. El fla ma Deus staba ta sukundi algun kuza dretu di es, ki é direitu di disidi di es pa es kuzê ki é dretu i kuzê ki é mariadu. Nton, es skodje fika di ladu di Satanás i es da Deus kósta. Kuzê ki kontise? Ku ténpu es móre, sima Deus dja avizaba es. Es perde oportunidadi di vive pa tudu ténpu na paraízu li na téra. — Génesis 2:17; 3:1-6; 5:5.

Rebelion di Adon ku Eva ta prujudika tudu algen ti oji. Bíblia ta fla: ‘Pekadu entra na mundu pamodi un ómi [Adon], i mórti entra pamodi pekadu, di es manera mórti spadja pa mundu interu’. (Romanos 5:12) Nu ta móre pamodi nu erda pekadu ku mórti di nos primeru pai ku mai, ka pamodi algun ‘planu’ ki Deus faze ki nu ka ta konsigi ntende.

Kantu Adon ku Eva ka obi ku Deus, kel-li ka muda kel tipu di vida ki Deus kreba pa nos nen kuzê ki el krê fazeba ku téra. Amor i justisa di Deus pô-l ta ranja un manera di salva-nu di pekadu ku mórti. Apóstlu Polu splika kel-li di kel manera li: ‘Pagamentu di pekadu é mórti, má prezenti ki Deus ta da é vida pa tudu ténpu através di Kristu Jizus, nos Sinhor.’ (Romanos 6:23) Pamodi amor, Deus ‘da se Fidju unijénitu [Jizus Kristu], pa tudu kenha ki mostra fé na el ka ser distruídu, má pa ten vida pa tudu ténpu.’ (João 3:16) Di livri vontadi, Jizus da se vida pa nu pode ten tudu kes kuza ki Adon perde. a

Ka ta dura, promésa di Deus di bira téra un paraízu ta ben kunpri. Bu pode sta la si bu sigi di korason kel konsedju li ki Jizus da: ‘Nhos entra pa porton stretu; pamodi kel porton largu i kel strada largu ta leba pa distruison, i txeu algen ta entra na el; má kel porton stretu i kel strada pertadu ta leba pa vida, i é poku algen ki ta atxa-l.’ (Mateus 7:13, 14) Bu futuru sta na bu mô. Ki disizon ki bu ta toma?