DURÁNTI un monti ténpu, kes krítiku di Bíblia ta flaba ma Rei Belsazar, ki ta papiadu di el na livru di Daniel, nunka ka izistiba. (Dan. 5:1) Es ta difendeba kel ideia li, pamodi arkiólogus nunka ka atxaba nada ki ta mostra ma Belsazar ta izistiba. Má, kel-li muda na anu di 1854. Pamodi?

Na kel anu, un kónsul di Gran-Britanha, ki txomaba John Taylor, bai djobe alguns kuza ki resta di Ur, ki éra un sidadi antigu. Oji el ta fika na sul di Iraki. John atxa la alguns silindru di arjila déntu di un tori grandi. Kada un di kes silindru ta midiba uns 10 cm di konprimentu i tinha un manera di skrebe antigu ki ta txomadu kuneiformi. Na un di kes silindru sta skrebedu un orason, ki ta dizeja vida kunpridu pa Rei Nabonidu i pa Belsazar ki éra se fidju más grandi. Ti mésmu kes krítiku tevi ki konkorda ma kel diskubérta éra un próva ma Belsazar izistiba mê.

Má, Bíblia ka ta fla sô ma Belsazar izistiba, tanbê el ta fla ma el éra un rei. Kel-li é otu kuza ki kes krítiku duvida tanbê. Pur izénplu, pa vólta di anu 1875, un sientista inglês ki txomaba William Talbot, skrebe ma alguns algen ta kriditaba ma “Bel-sar-ussur [Belsazar] governa na mésmu ténpu ki se pai Nabonidu. Má ka ten ninhun próva sobri kel-li.”

Má, kel asuntu fika klaru kantu atxadu otus silindru di arjila. Es mostra ma Rei Nabonidu, ki éra pai di Belsazar fika fóra di Babilónia duránti txeu anu. Kenha ki fika ta governa kantu ki el ka staba? Encyclopaedia Britannica ta fla: “Kantu Nabonidu staba na otu país, el dexa Belsazar pa governa i pa komanda maioria di se trópas.” Nton, Belsazar governa Babilónia duránti kel ténpu. É pur isu ki un arkiólogu ki é bon na ntende línguas ki txomaba Alan Millard fla ma “livru di Daniel ten razon di txoma Belsazar di ‘rei.’”

Má é klaru ki sérvus di Deus ta atxa ma kel próva más inportanti ki ta mostra ma livru di Daniel é di kunfiansa i ma el ben di Deus, sta na Bíblia. — 2 Tim. 3:16.