Modi ki bu pode studa Bíblia di manera ki ta djuda-u i ki ta fika más sábi?

TOKA

JUZUÉ tinha ki lebaba nason di Israel pa téra ki Deus prometeba es. Kel-li éra un trabadju difísil. Má Jeová da-l forsa i koraji kantu ki el fla-l: ‘Ten koraji i txeu forsa. Obi ku nha Lei. Le-l dia ku noti pa bu kunpri ku kuidadu tudu ki sta skrebedu na el. Asi, bu ta ten bon rezultadu na bu kaminhu i bu ta aji ku sabedoria.’ — Jos. 1:7, 8.

Nu sta ta vive na ténpu ‘konplikadu, difísil di aguenta’, pur isu nos tanbê nu ta pasa pa prublémas difísil na vida. (2 Tim. 3:1) Si nu krê ten bon rezultadu sima Juzué, nu meste sigi konsedju ki Jeová ta da-nu. Nu meste lé Bíblia tudu dia i uza kel ki nu prende pa nu toma bon disizon.

Talvês alguns di nos pode ka sabe modi ki nu ta studa ô nu ka gosta di studa. Má faze studu pesoal é txeu inportanti. Kuzê ki bu pode faze pa bu studu di Bíblia djuda-u i fika más sábi? Na kuadru ‘ Tenta faze kes kuza li’ ta mostra alguns kuza ki bu pode faze.

Salmista kanta: ‘Gia-m na kaminhu di bus mandamentu, pamodi N gosta di es.’ (Sal. 119:35) Bo tanbê bu pode gosta di studa Palavra di Deus. Bu pode atxa txeu jóia si bu ka dizisti di studa Bíblia.

Sikrê bu ka sta ta kuida di un nason interu sima Juzué, bu ten bus própi prubléma. Imita Juzué, studa i faze sima bu prende. Si bu faze si bu ta toma bons disizon i bu ta ten bons rezultadu.

TENTA FAZE KES KUZA LI

Faze orason antis di bu studa. Na Bíblia nu ta sabe modi ki Jeová ta pensa. Kes informason skrebedu pa djuda-nu. Óras ki bu ta lé Bíblia, pidi Jeová pa djuda-u ntende-l. Tanbê pidi-l pa el djuda-u lenbra di kuzê ki bu lé i faze sima bu prende. — Esd. 7:10.
Faze perguntas pa bu kabésa timenti bu sta ta lé Bíblia ô otus publikason. Pur izénplu: ‘Kuzê ki kel asuntu li ta inxina-m sobri Jeová? Modi ki el sta ligadu ku téma di Bíblia? Modi ki N pode uza kel ki N prende pa N djuda otus?’
Pensa na kuzê ki bu studa. Óras ki bu ta lé, para un poku i pensa: ‘Modi ki es asuntu ta pô-m ta xinti? Pamodi ki N sta xinti si? Kuzê ki es asuntu ten aver ku kuzas ki N pasa, ki N sta ta pasa gósi ô ki N pode ben pasa na futuru? Modi ki N pode sigi es prinsípiu i konsedju di Bíblia na nha vida?’ (Jó 23:5 ; Sal. 49:3) Óras ki bu ta pensa na kuzas ki bu lé, odja si bu ta konsigi splika pamodi ki Jeová ta fla se povu pa ka faze alguns kuza. Ô pensa na kuzê ki pode kontiseba si un personájen di Bíblia fazeba di otu manera. — Deut. 32:28, 29.
Uza bu imajinason timenti bu sta ta lé. Pur izénplu, bu ta konsigi imajina kuzê ki kontise kantu irmons di Juzé bende-l pa ismaelitas? (Gén. 37:18-28) Kuzê ki bu sta ta odja? Bu sta konsigi obi algun son? Bu sta xinti algun txeru? Tenta poi na lugar di kes personájen. Na kuzê ki es sta ta pensa? Modi ki es sta ta xinti? Óras ki bu ta uza imajinason, bu studu ta ganha vida i ta fika más sábi.
Uza feraméntas di studu. Es ta djuda-nu óras ki nu ta faze piskiza. Prende uza kes feraménta ki nu ten ki sta inprimidu i kes ki sta na internet. Ka bu ten medu di pidi un algen pa djuda-u uza-s. Pur izénplu, Índice das Publicações da Torre de Vigia ô Guia de Pesquisa para Testemunhas de Jeová pode djuda-u atxa informasons sobri un asuntu ki bu krê ô algun asuntu di Bíblia. Tanbê uza kes apéndisi di Tradução do Novo Mundo da Bíblia Sagrada, si sta na língua ki bu ta ntende. Es ten informason inportanti sobri pézu, medida, lugaris, datas i otus asuntu.
Faze rezumu di kes kuza más inportanti ki bu studa. Kel-li ta djuda-u lenbra di kes kuza ki bu studa. Tanbê fla otus algen kuza ki bu prende. Bu pode uza alguns di kes informason na pregason? Faze kes kuza li, ta djuda-u lenbra di kes kuza inportanti ki bu prende i uza-l pa djuda otus.