Perguntas ki leitoris ta faze
Ken ki é kel ‘mudjer’ ki Isaías 60:1 ta pâpia di el, i modi ki el ta ‘labanta’ i ‘dexa se lus brilha’?
Isaías 60:1 ta fla: ‘Ó mudjer, labanta i dexa bu lus brilha, pamodi bu lus dja txiga. Glória di Jeová sta ta brilha na bo.’ Kes versíklu antis i dipôs ta mostra ma kel ‘mudjer’ éra Sion, ô Jiruzalen, ki éra kapital di Judá na kel ténpu. a (Isa. 60:14; 62:1, 2) Jiruzalen ta reprizentaba nason di Israel interu. Kuzê ki Isaías fla ta pô-nu ta faze dôs pergunta: Primeru, na ki ténpu i modi ki Jiruzalen ‘labanta’ i el dexa se lus spritual brilha? Sugundu, kes palavra di Isaías ten un kunprimentu más grandi na nos ténpu?
Na ki ténpu i modi ki Jiruzalen ‘labanta’ i el dexa se lus spritual brilha? Jiruzalen i se ténplu fika distruídu timenti kes judeu staba prézu na Babilónia duránti 70 anu. Má dipôs ki kes algen di Média i di Pérsia distrui Babilónia, tudu kes israelita ki staba ta vive na tudu párti di Babilónia fika livri pa volta pa ses téra i adora Jeová otu bês. (Esd. 1:1-4) Dipôs di anu 537 A.K., kes israelita fiel di kes 12 tribu volta pa Jiruzalen. (Isa. 60:4) Es kumesa ta faze sakrifisiu pa Jeová, ta faze kes fésta i ta konpo ténplu. (Esd. 3:1-4, 7-11; 6:16-22) Di kel manera li, glória di Jeová kumesa ta brilha sobri Jiruzalen, kel-li krê fla ma el kumesa ta brilha riba di se povu. I pamodi kel-li, es bira un lus na sentidu spritual pa kes nason ki ka konxeba Jeová.
Má na kel ténpu, kel profesia di Isaías kunpri sô un párti. Maioria di israelita ka kontinua ta obi ku Jeová. (Nee. 13:27; Mal. 1:6-8; 2:13, 14; Mat. 15:7-9) Más tardi, es ka seta ma Jizus Kristu éra Misías. (Mat. 27:1, 2) Na anu 70, Jiruzalen i se ténplu distruídu pa sugundu bês.
Jeová dja flaba ma kel-li ta ba kontiseba. (Dan. 9:24-27) Nton ta fika klaru ma kantu Jeová faze kel profesia na Isaías kapítlu 60, el ka staba ta spera ma el ta kunpriba konpletamenti na Jiruzalen.
Kes palavra di Isaías ten un kunprimentu más grandi na nos ténpu? Sin, má el ta involve otu mudjer ki ta reprizenta “Jiruzalen di riba”. Apóstlu Paulu pâpia sobri el, kantu el fla: “El é nos mai.” (Gál. 4:26) Jiruzalen di riba é kel párti di organizason di Deus na séu ki é formadu pa tudu kes kriatura spritual ki é fiel. Se fidjus ta inklui Jizus i kes 144 mil skodjedu ku spritu santu, ki sima Paulu ten speransa di ba vive na séu. Kes skodjedu ku spritu santu é un “nason santu”, ki é “Israel di Deus.” — 1 Ped. 2:9; Gál. 6:16.
Modi ki Jiruzalen di riba ‘labanta’ i el ‘dexa se lus spritual brilha’? El faze kel-li através di se fidjus skodjedu ku spritu santu. Konpara profesia di Isaías 60 ku kuzê ki kontise ku kes skodjedu ku spritu santu.
Kes kriston skodjedu ku spritu santu ‘labanta’ pamodi es staba na sukuru spritual désdi kantu kes apóstlu móre i kes algen ki fika kóntra organizason bira más txeu. (Mat. 13:37-43) Duránti kel ténpu es fika kontroladu pa Babilónia Grandi, ki ta reprizenta tudu kes relijion falsu. Es kontinua prézu ti “ténpu di fin di kel mundu li”, ki kumesa na anu 1914. (Mat. 13:39, 40) Lógu dipôs, na anu 1919, es libertadu i es kumesa ta dexa ses lus brilha através di pregason di notísias sábi di Reinu. b Timenti anus ba ta pasa, pesoas di tudu nason ben pa kel lus, kel-li ta inklui kes skodjedu ku spritu santu ki pasa ta faze párti di Israel di Deus, es é kes ‘rei’ ki Isaías 60:3 ta pâpia di el. — Apo. 5:9, 10.
Na futuru, kes skodjedu ku spritu santu ta ben spadja lus di Deus di un manera mutu más txeu inda. Modi ki es ta faze kel-li? Óras ki es tirmina ses vida na téra, es ta bira párti di “Jiruzalen Novu” ô noiva di Kristu, ki é formadu pa kes 144 mil rei i saserdótis. — Apo. 14:1; 21:1, 2, 24; 22:3-5.
Jiruzalen Novu ta ben ten un papel inportanti na kunprimentu di profesia di Isaías 60:1. (Konpara Isaías 60:1, 3, 5, 11, 19, 20 ku Apokalipse 21:2, 9-11, 22-26.) Sima Jiruzalen na téra éra séntru di govérnu di Israel na pasadu, di mésmu manera Jiruzalen Novu i Jizus Kristu, ta ben bira séntru di govérnu di mundu novu. Modi ki Jiruzalen Novu “ta dixi di séu, di undi ki Deus sta”? Kel-li ta kontise óras ki el ben faze kuzas ki ta afeta téra. Povu di Deus “ta ben anda giadu pa se lus”. Tanbê, es ta ben vive livri di pekadu i di mórti. (Apo. 21:3, 4, 24) Rezultadu di kel-li é ma ta ben fazedu “tudu kuza novu otu bês,” sima proféta Isaías i otus proféta dja flaba. (Atus 3:21) Kel grandi mudansa li kumesa kantu Jizus bira Rei, i el ta ben tirmina na fin di se govérnu di mil anu.
a Na Isaías 60:1, na Traduson di Mundu Novu, uzadu ‘mudjer’ envês di ‘Sion’ ô ‘Jiruzalen’, pamodi kel vérbu na ebraiku ki uzadu pa ‘labanta’ i ‘dexa bu lus brilha’ sta na femininu, sima palavra ‘bo’ tanbê. Palavra ‘mudjer’ uzadu pa djuda ken ki sta ta lé intende ma el sta ta pâpia di un mudjer sinbóliku.
b Ezequiel 37:1-14 i Apokalipse 11:7-12 tanbê ta pâpia di kel rekuperason di adorason verdaderu ki kontise na anu 1919. Ezekiel flaba ma dipôs di txeu ténpu na sukuru spritual, tudu kes kriston skodjedu ku spritu santu ta ben rekuperaba ses amizadi ku Jeová. Kel profesia di Apokalipse ta pâpia di rekuperason spritual di un grupu pikinoti di irmons skodjedu ku spritu santu ki toma kónta di organizason dipôs di poku ténpu sen faze ses trabadju pa Jeová, pamodi es podu prézu di manera injustu. Na anu 1919, es skodjedu pa es ser “skravu fiel i prudenti”. — Mat. 24:45; odja livru A Adoração Pura de Jeová É Restaurada!, pájina 118.
