1-2. Pamodi ki kes algen ki ta sirbi Jeová é filís? (Tiagu 1:22-25)

 JEOVÁ i se Fidju ki el ta ama, krê pa nu ser filís. Skritor di Salmo 119:2 fla: ‘Filís é kes ki ta sigi bus konsedju, i ki ta djobe Jeová di tudu ses korason.’ Jizus fla: “Filís é kes ki ta obi palavra di Deus i ta faze sima el ta fla!” — Luk. 11:28.

² Dja ki nu ta sirbi Jeová, nos é un povu filís. Pamodi? Nu ten txeu motivu, má un di kes motivu más inportanti é pamodi nu ta lé Palavra di Deus tudu dia i nu ta sforsa pa nu faze sima nu prende. — Lé Tiagu 1:22-25.

3. Ki rekonpensa nu ta ten óras ki nu ta faze sima nu lé na Palavra di Deus?

³ Ten alguns manera ki nu ta ten bons rezultadu óras ki nu ta “aji di akordu ku palavra di Deus”. Un di kes manera é pamodi nu sabe ma kel-li é inportanti pa nu agrada Jeová. Kel-li ta pô-nu ta fika kontenti. (Ecl. 12:13) Óras ki nu ta faze kel ki nu ta prende na Palavra di Deus, nu ta ten un família filís i nu ta bira más amigu di irmons na kongregason. Talvês dja bu odja kel-li ta kontise na bu vida. Tanbê, nu ta ivita txeu prubléma ki pesoas ta pasa pa el óras ki es ka ta obi ku Jeová. Talvês nu ta konkorda ku rei Davidi, ki dipôs di kanta sobri leis, órdis i julgamentus di Jeová, el tirmina ta fla: ‘Ten txeu rekonpénsa na sigi-s.’ — Sal. 19:7-11.

4. Pamodi ki nen sénpri é ka fásil aji di akordu ku Palavra di Deus?

 ⁴ Nen sénpri é ka fásil aji di akordu ku Palavra di Deus. Enbóra nu ten un vida okupadu, nu meste tra ténpu pa nu lé i studa Bíblia, asi pa nu intende kuzê ki Jeová krê pa nu faze. Pur isu, nu sta ben odja alguns sujiston ki pode djuda-nu lé Bíblia tudu dia. Tanbê, nu ta ben odja kuzê ki pode djuda-nu pensa na kuzê ki nu lé i alguns manera ki nu pode faze kel ki nu prende na nos vida.

TRA TÉNPU PA LÉ PALAVRA DI DEUS

5. Kal ki é alguns kuza ki nu ten ki faze ki ta toma-nu txeu ténpu?

⁵ Txeu sérvu di Jeová ten un vida txeu okupadu. Nu ta uza maior párti di nos ténpu ta faze kuzas ki Bíblia ta fla ma é inportanti. Pur izénplu, txeu di nos ten ki trabadja pa kuida di nos kabésa i di nos família. (1 Tim. 5:8) Txeu irmon sta kuida di ses pai ku ses mai ki dja sta algen grandi ô ki sta duenti. Tanbê, nos tudu nu ten ki kuida di nos saúdi, i faze kel-li ta toma-nu ténpu. Alén di kes responsabilidadi li, nu ten responsabilidadis na kongregason. Un di kes responsabilidadi más inportanti é faze nos midjór na trabadju di pregason. Ku tudu kes responsabilidadi ki bu ten li, modi ki bu pode atxa ténpu pa bu lé Bíblia tudu dia, pa bu midita na kuzê ki bu lé i pa bu faze sima bu prende?

6. Kuzê ki nu pode faze pa nu lé Bíblia tudu dia? (Odja fotu.)

⁶ Lé Bíblia é un di kes kuza “más inportanti” pa sérvus di Jeová. Pur isu, nu meste ten serteza ma nu ta faze-l tudu dia. (Flp. 1:10) Primeru vérsu di livru di Salmos ta pâpia di un ómi ki é filís. Kel vérsu ta fla: ‘El gosta txeu di lei di Jeová, i el ta lé Se lei ku vós baxu, dia ku noti.’ (Sal. 1:1, 2) É klaru ki kel-li krê fla ma nu debe tra ténpu  pa nu lé Bíblia. Kal ki é midjór óra pa nu lé Bíblia? Kel-li ta dipende di kada un di nos. Má kuzê ki é inportanti é skodje un óra ki nu ta pode lé Bíblia tudu dia. Un irmon ki txoma Victor fla: “N gosta di lé Bíblia tudu dia di palmanhan. Enbóra N ka gosta di labanta sédu, kel-li é un óra ki ten ménus kuza pa distrai-m. Nha menti ta sta frésku i N ta konsigi konsentra más midjór.” Talvês bu pode faze mésmu kuza. Pensa na kel pergunta li: ‘Kal ki é midjór óra pa N lé Bíblia?’

PENSA NA KUZÊ KI BU LÉ

7-8. Kuzê ki pode ka dexa-nu tra más pruvetu di kuzê ki nu ta lé? Da un izénplu.

⁷ Alvês nu pode lé txeu kuza, má nu pode ka intende nada. Dja bu kustuma lé algun kuza i lógu dipôs bu ka konsigi lenbra di kuzê ki bu lé? Kel-li dja kontise ku nos tudu. Infilismenti, pode kontise mésmu kuza óras ki nu ta lé Bíblia. Talvês nu ten méta di lé alguns kapítlu di Bíblia tudu dia. Kel-li é un kuza bon. Nu meste poi un méta i sforsa pa kunpri-l. (1 Kor. 9:26) Má nu meste faze más di ki sô lé Bíblia si nu krê tra más pruvetu di el.

⁸ Pensa na kel konparason li: agu di txuba é txeu inportanti pa vida na téra. Má si kai txeu txuba na poku ténpu, txon ta fika modjadu dimás. Óras ki kel-li ta kontise, txeu txuba ka ta djuda téra. Ta meste ténpu pa agu entra na txon, asi pa plantas pode kria. Di mésmu manera, nu ka debe lé Bíblia rápidu dimás ki nu ka ta konsigi tra ténpu pa nu pensa, lenbra i faze sima nu lé. — Tia. 1:24.

9. Kuzê ki nu debe faze si nu xinti ma nu sta ta lé Bíblia rápidu dimás?

⁹ Dja bu kustuma sta ta lé Bíblia i bu da kónta ma bu sta ta lé rápidu dimás? Kuzê ki bu debe faze? Lé más divagar, asi pa bu pode pensa na kuzê ki bu sta  lé, ô tra ténpu dipôs di bu leitura, pa bu pensa na kuzê ki bu lé. Kel-li pode ser más fásil di ki kel ki bu ta pensa. Talvês bu pode disidi pasa más ténpu ta studa, asi pa bu pode pensa na kes informason. Ô bu pode lé ménus versíklu i uza kel ténpu pa bu pensa na kuzê ki bu lé. Victor, ki dja nu papiaba di el fla: “N ta lé poku kapítlu, alvês sô un. Dja ki N ta lé sédu palmanhan, duránti dia N ta krê pensa na kuzê ki N lé.” Bu pode skodje kantu kapítlu ki bu ta lé, má é inportanti bu lé sen présa, asi pa bu pode konsigi pensa na kuzê ki bu lé. — Sal. 119:97; odja kuadru “ Pensa na kes pergunta li”.

10. Da un izénplu di modi ki bu pode faze sima bu prende. (1 Tesalonisensis 5:17, 18)

¹⁰ Ka ta inporta ki óra ki bu ta lé Bíblia ô kantu ténpu ki bu ta pasa ta lé, sforsa pa bu faze sima bu prende. Timenti bu ta lé un párti di Palavra di Deus, pensa na kel pergunta li: ‘Modi ki N pode faze sima N prende, gósi ô na futuru?’ Pur izénplu, imajina ma bu sta ta lé 1 Tesalonisensis 5:17, 18. (Lé.) Dipôs di lé kes dôs versíklu li, bu pode para i pensa si bu sta ta ora sénpri i di korason. Tanbê bu pode pensa na kuzê ki bu pode mostra gratidon. Talvês, bu pode disidi ma bu sta ba agradese Jeová pa três kuza. Sikrê bu pasa alguns minutu ta midita na kuzê ki bu prende di Bíblia, kel-li pode djuda-u intende Palavra di Deus i faze kel ki el ta fla. Pensa na kes bon rezultadu ki bu pode ten si bu faze kel-li tudu dia óras ki bu ta lé kes otu párti di Bíblia! Bu ta bira un sérvu di Jeová midjór. Má, kuzê ki bu debe faze si bu xinti ma bu ten ki faze txeu mudansa?

POI MÉTAS KI BU TA KONSIGI ALKANSA

11. Pamodi ki alvês bu pode xinti dizanimadu? Da un izénplu.

¹¹ Óras ki bu ta lé Bíblia, alvês bu pode fika dizanimadu pamodi bu ta da kónta ma ten txeu kuza ki bu meste midjora. Pur izénplu, imajina ma un dia, na bu leitura di Bíblia bu atxa un konsedju ki ta fla pa nu ka faze diferénsa di algen. (Tia. 2:1-8) Bu ta odja ma bu meste midjora na manera ki bu ta trata otus algen. Pur isu, bu ta disidi faze alguns mudansa. Kel-li é bon! Dipôs, otu dia bu ta lé otu párti di Bíblia ki ta mostra ma é inportanti nu kontrola kuzê ki nu ta fla. (Tia. 3:1-12) Bu ta da kónta ma alvês bu ta fla kuzas ki ka ta mostra amor. Nton, bu ta disidi  ma bu ta fika ta fla kuzas ki ta inkoraja otus algen. Na bu leitura di Bíblia di kel otu dia, bu ta atxa un konsedju ki ta fla ma bu ka debe faze amizadi ku pesoas di mundu. (Tia. 4:4-12) Bu ta da kónta ma bu meste toma más kuidadu ku kuzê ki bu ta skodje pa bu divirti ku el. Na kes otu dia, bu pode xinti ma é difísil faze kes mudansa li.

12. Pamodi ki bu ka debe fika dizanimadu si óras ki bu lé Bíblia bu da kónta ma bu meste faze mudansas? (Odja nóta di rodapé.)

¹² Si bu meste faze txeu mudansa, ka bu fika dizanimadu. Kel-li ta mostra ma abo é umildi. Óras ki nos é umildi, nu ta lé Bíblia i nu ta djobe maneras di midjora. a Tanbê, lenbra ma “bisti di kel manera di ser novu” é un kuza ki ta leba ténpu. (Kol. 3:10) Kuzê ki ta djuda-u kontinua ta aji di akordu ku Palavra di Deus?

13. Kal ki é un bon manera di faze sima bu sta prende? (Odja fotu i dizenhus.)

¹³ Envês di tenta faze tudu kes mudansa di un bês, tenta faze un ô dôs di kada bês. (Pro. 11:2) Tenta faze kel-li: faze un lista di alguns kuza ki bu meste midjora i dipôs skodje un ô dôs di es pa bu kumesa na el. Dexa kes otu pa dipôs. Kal kuza ki bu krê kumesa pa el?

14. Ki méta bu pode kumesa ta sforsa pa alkansa?

¹⁴ Bu pode kumesa ku un méta ki é más fásil bu alkansa. Ô bu pode skodje un kuza ki bu meste midjora na el más txeu. Óras ki bu disidi kuzê ki bu krê midjora na el, faze piskiza na nos publikasons. Bu pode uza Índice das  Publicações da Torre de Vigia ô Publikason pa djuda Tistimunhas di Jeová faze piskiza. Faze orason sobri bu méta i pidi Jeová pa da-u “dizeju i forsa pa aji.” (Flp. 2:13) Dipôs tenta faze sima bu prende. Óras ki bu alkansa bu primeru méta, talvês bu pode xinti más motivadu na faze otus mudansa. Tanbê, óras ki bu odja ma bu ta konsigi faze un mudansa ô midjora un kualidadi, bu ta xinti más motivadu na kontinua ta faze mudansas. I talvês ta fika más fásil pa bu faze otus mudansa.

NHOS DEXA PALAVRA DI DEUS “DJUDA NHOS”

15. Pamodi ki povu di Jeová é diferenti di kes monti algen ki ta lé Bíblia? (1 Tesalonisensis 2:13)

¹⁵ Alguns algen ta lé Bíblia txeu. Má es ta kunfia na Bíblia mê? Es ta tenta vive di akordu ku kuzê ki Bíblia ta inxina i es ta faze mudansa na ses vida? Infilismenti txeu bês respósta é nau. Má povu di Jeová ta pensa diferenti sobri Bíblia. Sima kes primeru kriston, nu ta seta Bíblia sima “el é di verdadi, palavra di Deus”. Alén di kel-li, nu ta faze tudu kel ki nu ta pode pa nu sigi konsedjus di Bíblia na nos vida. — Lé 1 Tesalonisensis 2:13.

16. Kuzê ki pode djuda-nu aji di akordu ku Palavra di Deus?

¹⁶ Nen sénpri é ka fásil lé Palavra di Deus i vive di akordu ku kel ki el ta fla. Pode ser difísil atxa ténpu pa nu lé Bíblia. Ô nu pode lé Bíblia rápidu dimás i ka pensa na kuzê ki nu lé. Ô nu pode xinti dizanimadu pamodi ten txeu kuza ki nu meste midjora. Ka ta inporta kal ki é dizafiu, ku ajuda di Jeová bu pode vense-l. Nu debe sta disididu na seta se ajuda i bira sima un algen ki ka ta skese faxi, má ki ta aji di akordu ku Palavra di Deus. Nu ka ten dúvida ma kantu más nu lé Palavra di Deus i faze sima nu prende na nos vida, nu ta ser más filís. — Tia. 1:25.