N nase na Paddington, na un lugar ki ten txeu algen na Londris, na Inglatéra. N ta moraba ku nha mai i três irman más grandi. Nha pai ta saíba di kaza txeu bês pamodi el tinha prubléma ku bebida alkólika.

Kantu N staba pikinoti, nha mai inxina-m faze orason tudu noti. N tinha un Bíblia pikinoti ki tinha sô Salmos, i N faze múzikas pa N pode kanta-s. N ta lenbra ma N leba un frazi na un di nhas livru, ki ka sai-m di nha kabésa: “Un dia, bu ka ta manxe.” Kel frazi li pô-m kordadu noti interu ta pensa na nha futuru. N ta pensaba: ‘Vida ka pode ser sô kel-li. Kal ki é obijetivu di vida?’ N ka krê moreba!

Fitisaria ku bruxaria ta poba mi kurioza. N ta tenta papiaba ku mortus, N ta baba simitériu ku nhas amigu di skóla, i nu ta odjaba filmis ki ta da algen medu. Nu ta atxaba kel-li sábi má omésmu ténpu ta daba nos medu.

N kumesa ta rabela kantu N tinha sô 10 anu. N kumesa ta fuma sigaru, i na poku ténpu N fika visiadu. Dipôs, N kumesa ta fuma padjinha. Ku 11 N kumesa ta uza bebida alkólika. Nbóra N ka gostaba di se gostu, má N gostaba di fika moku. N gostaba di múzika i di badja. N ta baba fésta ku diskotéka sénpri ki N ta podeba. N ta saíba di noti sukundidu i N ta voltaba kuazi ta manxe. Na kel otu dia N ta fikaba kansadu, i txeu bês N ka ta baba skóla. I óras ki N ta baba skóla, N ta bebeba sénpri na intervalu.

Na nha últimu anu di skóla N tevi nóta sô mariadu. Kantu nha mai da kónta di nhas nóta, el fika txeu tristi i ku raiba di mi. Nu diskuti i N fuji di kaza. Duránti un ténpu, N fika ku nha namoradu se nómi éra Toni i el éra di un relijion ki txoma rastafári. El staba nvolvidu na alguns krimi, el ta bendeba dróga i el tinha fama di ser uma violéntu. Poku ténpu dipôs N fika grávida i kantu N tinha sô 16 anu nos fidju nase.

N konxe Tistimunhas di Jeová kantu N ta moraba na un lugar ki éra pa kes mai ki éra soltera ku ses fidju i es da-m un kuartu la. Dôs mudjer ki éra Tistimunhas di Jeová sénpri ta ba vizitaba alguns di kes otu mai jóven. Un dia N pâpia ku es tanbê. N krê provaba ma Tistimunhas di Jeová ka tinha razon. Má simé es uza Bíblia pa responde tudu kes monti pergunta ki N tinha di manera klaru i ku kalma. Es ta mostraba txeu bondadi, i es éra idukadu i N gosta txeu di kel-li. Nton, N seta studa Bíblia ku es.

Lógu na komésu N prende un kuza na Bíblia ki muda nha vida. Désdi kantu N staba pikinoti, N tinha medu di móre. Má N prende ma Jizus inxina sobri resureison! (João 5:28, 29 ) Tanbê N prende ma Deus ta preokupa ku mi. (1 Pedro 5:7 ) Kuzê ki toka nha korason más txeu é testu di Jeremias 29:11, ki ta fla: ‘Jeová fla: “N sabe dretu kuzê ki N sta pensa pa nhos. ‘N krê pa nhos ten pas envês di disgrasa. N krê da nhos un futuru i un speransa.’”’ N kumesa ta kridita ma pode tinha speransa di ben vive pa tudu ténpu na paraízu na Téra. — Salmo 37:29.

Tistimunhas di Jeová mostra-m amor di verdadi. Kantu N sisti un di ses runion pa primeru bês, anbienti éra sábi i ta poi algen ku gana torna bai, tudu algen ta mostraba amor! (João 13:34, 35 ) Manera ki es trata-m éra diferenti di kel igreja ki N ta baba. Tistimunhas di Jeová resebe-m dretu sikrê ku nha situason. Es mostra paxénxa ku mi, es preokupa ku mi, es da-m atenson i es djuda-m na otus kuza ki N staba ta meste. N xinti ma N ta fazeba párti di un família grandi xeiu di amor.

Na nha studu di Bíblia, N da kónta ma N meste mudaba nha manera di vive pa N pode sigi kes lei di Deus. É ka éra fásil pa mi para di fuma sigaru. Omésmu ténpu, N da kónta ma alguns múzika ta poba mi ku gana di fuma padjinha, nton N para di obi kes múzika. N para di ba fésta i diskotéka asi pa N ka xintiba tentason di bebe i toma moku. I N ranja amigus novu ki ta djudaba mi na nha novu manera di vive. — Provérbios 13:20.

Toni kumesa ta studa Bíblia ku Tistimunhas di Jeová tanbê. Sima el ba ta odja Tistimunhas di Jeová ta uza Bíblia ta responde se perguntas, ael tanbê el fika ku sertéza ma kel ki el staba ta prende éra verdadi. El faze mudansas grandi na se vida. El dexa di ten kes amigu ki el tinha ki éra violéntu, el para di faze kes kuza ki éra krimi i el larga fuma padjinha. Pa nu pode viveba sima Jeová ta krê, nu odja ma nu tinha ki para di faze konportamentu seksual mariadu i kria un bon anbienti pa nos fidju. Nu kaza na 1982.

N ta lenbra ma N ta djobeba na revistas Sentinéla i Nhos korda! a stória di kes algen ki konsigi muda kes kuza ki N krê mudaba. Ses izénplu da-m txeu koraji! Es djuda-m kontinua ta sforsa i pa N ka dizisti. N kontinua ta pidi Jeová pa el ka dizisti di mi. Mi ku Toni nu batiza kómu Tistimunhas di Jeová na julhu di 1982.

Ten un amizadi ku Jeová salva nha vida. Mi ku Toni tanbê nu resebe ajuda di Jeová na ténpus difísil. Nu prende kunfia na Deus sikrê ku difikuldadi, nu xinti ma sénpri el djuda i apoia nos família. — Salmo 55:22.

N fika rei di kontenti di djuda nos fidju matxu i nos fidju-fémia konxe Jeová sima ami tanbê N konxe. Gósi N ta fika kontenti tanbê di odja ses fidjus ta prende sobri Deus.

Gósi N ka ta fika kordadu di noti ta preokupa ku futuru ô ku mórti. Mi ku Toni nu sta txeu okupadu na viaja kada simana pa un kongregason diferenti di Tistimunhas di Jeová pa nkoraja-s. Nu ta bai djuntu ku es pa inxina otus ma si es mostra fé na Jizus es tanbê es pode ben ten vida pa tudu ténpu.