Géra dja tirminaba, i vali di Elá gósi staba más kétu. Di tardi, béntu staba ta sopra divagar i el ta daba na téndas ki staba na kanpamentu di kes trópa. Rei Saul staba na un runion ku alguns di se trópa. Se fidju más bédju, Jonatan, staba na kel runion i un pastor jóven staba txeu animadu ta konta se stória. Kel jóven éra Davidi i el staba xeiu di zelu. Saul presta txeu atenson na kada palavra ki Davidi fla. Má, modi ki Jonatan xinti? Dja el ganhaba txeu géra duránti kel ténpu ki el sirbi na trópa di Jeová. Má oji gó, vitória ka éra di sel. Éra di kel jóven li. Davidi mata kel jiganti Gulias! Jonatan fika ku siumis di tudu kel glória ki Davidi staba ta resebe?

 Manera ki Jonatan reaji talvês ta dexa-u dimiradu. Nu lé kel-li: ‘Lógu dipôs ki Davidi tirmina di pâpia ku Saul, Jonatan ku Davidi bira txeu amigu i Jonatan kumesa ta ama-l sima se kabésa.’ Jonatan da Davidi se própi armas di géra i kel-li ta inkluiba se arku. Kel-li éra un prezenti grandi, pamodi Jonatan fika txeu konxedu pa un algen ki ta uzaba arku rei di dretu. Alén di kel-li, Jonatan i Davidi faze un kontratu ô un promésa sériu ki uni-s pa es ser amigus ki sénpri ta apoiaba kunpanheru. — 1 Samuel 18:​1-5.

 É di kel manera li ki kumesa un di kes amizadi más grandi ki Bíblia ta pâpia di el. Amizadi é un kuza txeu inportanti pa kes algen ki ten fé. Si nu skodje amigus ku kuidadu i nu ser un amigu lial i ki ta da ajuda, nos fé pode bira más fórti na es ténpu ki amor sta ta kaba. (Provérbios 27:17) Nton nu ben odja kuzê ki nu pode prende di kel amizadi di Jonatan.

 Modi ki kel amizadi li kria faxi si? Respósta ten aver ku bazi di kel amizadi li. Pensa na kuzê ki kontise antis. Jonatan staba ta pasa pa un ténpu difísil. Se pai, rei Saul, muda txeu pa piór timenti anu ba ta pasa. Antis, Saul éra umildi, obidienti i un ómi di fé. Má dipôs el bira un rei orgulhozu i dizobidienti. — 1 Samuel 15:17-​19, 26.

 Dja ki Jonatan i se pai éra txeu amigu, di sertéza el xinti txeu tristi di odja se pai ta muda di kel manera li. (1 Samuel 20:2) Talvês Jonatan fika preokupadu si Saul podia trazeba prublémas pa kel nason ki Jeová skodje. Povu ta disviaba di Jeová i perde se benson pamodi Saul bira dizobidienti? Di sertéza kel-li ka foi un ténpu fásil pa un ómi di fé sima Jonatan.

 Kes kuza li pode djuda-nu ntende kuzê ki poi Jonatan ta bira amigu di Davidi. Jonatan odja kel fé fórti ki Davidi tinha. Lenbra ma Davidi foi diferenti di kes otu ómi di trópa di Saul. Davidi ka xinti medu di Gulias, sikrê el éra uma tamanhu. El sabia ma si el lutaba na nómi di Jeová, el ta sérba mutu más fórti di ki Gulias ku tudu se armas. — 1 Samuel 17:45-​47.

 Uns anu antis di kel-li, Jonatan pensa di mésmu manera. El tinha sertéza ma dôs ómi, ki éra el ku se skuderu, podia atakaba i ganhaba un grupu interu di trópa armadu. Pamodi ki el pensa si? Jonatan fla: ‘Ka ten nada ki ta inpidi Jeová’. (1 Samuel 14:6) Nton Jonatan ku Davidi tinha alguns kuza igual ku kunpanheru: fé fórti na Jeová i txeu amor pa El. Kel-li éra midjór bazi pa kes dôs ómi ten un bon amizadi. Jonatan éra un prínsipi poderozu i el tinha kuazi 50 anu, Davidi gó éra sô un pastor umildi ki talvês nen 20 anu inda el ka tinha. Má simé, kes diferénsa li ka inpidi-s di kria ses amizadi. a

 Kel kontratu ki es faze bira un proteson grandi pa ses amizadi. Di ki manera? Pensa na kel-li: Davidi sabia ma Jeová kreba pa el sérba rei na Israel dipôs di Saul! El guarda kel kuza li pa el sen fla Jonatan nada? Nau! Óras ki dôs algen ten un amizadi fórti sima kel ki es tinha, es ka ta guarda segredu nen es ka ta konta kunpanheru mintira, má es ta xinti avontádi pa pâpia tudu kuza ku kunpanheru. Modi ki Jonatan xinti kantu el fika ta sabe ma é Davidi ki ta sérba rei? I si Jonatan tinha speransa di bira rei un dia pa el konpo tudu kes kuza mariadu ki se pai faze? Bíblia ka ta fla si Jonatan tevi ki luta kóntra sentimentus negativu ô nau. El ta pâpia sô di kel ki é inportanti mê: fé i lialdadi di Jonatan. El odja klaru ma spritu di Jeová staba ku Davidi. (1 Samuel 16:​1, 11-​13) Nton Jonatan kunpri ku juramentu ki el faze i pa el, Davidi kontinua ta ser un amigu, envês di un algen ki staba ta toma se lugar. Jonatan krê odjaba vontadi di Jeová ta kunpri.

 Kel amizadi li kaba pa ser un benson grandi. Kuzê ki nu pode prende ku fé di Jonatan? Tudu sérvu di Deus debe sforsa pa ntende valor ki un amigu ten. Nos amigu ka meste ten mésmu idadi, idukason ô puzison na sosiadadi ki nu ten. Má si un amigu ten un fé fórti, el pode djuda-nu txeu. Jonatan ku Davidi konsigi da kunpanheru forsa txeu bês. I es ta mesteba di kel ajuda li, pamodi ses amizadi staba ta ben pasa pa provasons inda más grandi.

 Na komésu, Saul ta gostaba di Davidi i el pô-l ta ser xéfi di se trópas. Má ka dura txeu pa Saul kumesa ta dizenvolve un mau kualidadi ki Jonatan ka dexa se korason dizenvolve, ki é siumis. Davidi ganha un géra tras di kel otu, kóntra kes filisteu ki éra inimigu di Israel. Pur isu, gentis fika ta dimira-l i ta ilojia-l. Alguns mudjer di Israel ti fika ta kanta: ‘Saul mata milharis, i Davidi mata dizénas di milharis.’ Saul ka gosta nada di kel-li. Pur isu, ‘di kel dia pa dianti, Saul sénpri ta odjaba pa Davidi ku diskunfiansa.’ (1 Samuel 18:7, 9) El fika ku medu di Davidi tra-l se reinu. Má Saul ka tinha razon pa pensa kel-li. É verdadi ki Davidi sabia ma el ta sérba rei dipôs di Saul, má nunka ka pasa-l pa kabésa fika na lugar di kel rei skodjedu pa Jeová, timenti inda el staba ta governa!

 Saul faze planu pa mata Davidi na géra, má kel planu ka da sértu. Davidi kontinua ta ganha géra i gentis kumesa ta gosta di el i ta ruspeta-l kada bês más txeu. Nton Saul ranja otu planu, el tenta djunta tudu se sérvus i se fidju más bédju na un armadilha pa mata Davidi! Imajina modi ki Jonatan xinti tristi kantu el odja se pai ta aji di kel manera li! (1 Samuel 18:25-​30; 19:1) Jonatan éra un fidju lial, má el éra un amigu lial tanbê. Ta parse ma el tinha ki skodjeba pa kenha ki el ta sérba lial. Kenha ki el skodje?

 El fla: ‘Rei ka debe peka kóntra se sérvu Davidi, pamodi el ka peka kóntra bo. Má, kuzê ki el faze pa bo djuda-u. El poi se vida na prigu pa mata kel filisteu, pur isu Jeová da Israel interu un vitória grandi. Bu odja kel-li i bu fika txeu kontenti. Nton, pa kuzê peka kóntra sangi di un inosenti, i poi Davidi ta matadu sen ninhun motivu?’ Na un di kes poku momentu ki Saul ta pensaba dretu, el obi ku Jonatan i ti el jura ma el ka ta fazeba Davidi nada. Má Saul ka ta kunpriba ku se promésas. Dipôs ki Davidi ganha más géra, Saul fika ku tantu siumis ki el tenta da Davidi ku lansa! (1 Samuel 19:​4-6, 9, 10) Má Davidi skapa i el fuji di kaza di Saul.

 Dja bu kustuma nfrenta dizafiu di skodje pa kenha ki bu ta mostra bu lialdadi? Kel-li pode ser txeu difísil. Na un situason sima kel-li, alguns algen talvês ta fla-u ma família ta ben primeru. Má Jonatan sabia ma kel-li ka éra midjór disizon. Modi ki el ta fikaba na ladu di se pai, si Davidi éra un sérvu di Jeová lial i obidienti? Nton Jonatan dexa se lialdadi pa Jeová djuda-l toma se disizon. Pur isu el difende Davidi. Má, nbóra lialdadi di Jonatan pa Deus éra más inportanti, simé el mostra lialdadi pa se pai tanbê, pamodi el da-l konsedju sinseru envês di el fla-l kel ki Saul ta gostaba di obi. Si nos tudu nu imita manera ki Jonatan mostra lialdadi, kel-li ta djuda-nu txeu.

 Jonatan torna tenta pa Saul ku Davidi faze pas, má di es bês el tevi ménus rezultadu inda. Davidi ba nkontra ku Jonatan sukundidu i el fla-l ma el staba ku medu di es mata-l. El fla se amigu más grandi: ‘Ten sô un pasu entri mi ku mórti!’ Jonatan konkorda ku Davidi pa el tenta diskubri kal ki éra intenson di Saul i dipôs pa el konta Davidi. Davidi ta kontinuaba sukundidu i Jonatan ta daba el un sinal através di se arku i se flexa. Jonatan pidi Davidi sô pa el faze un promésa: ‘Nunka ka bu dexa di mostra amor lial pa kes algen di nha kaza, mésmu óras ki Jeová kaba ku tudu inimigu di Davidi di Téra.’ Davidi promete ma sénpri el ta kuidaba di kes algen di família di Jonatan. — 1 Samuel 20:​3, 13-​27.

 Jonatan tenta pâpia ben di Davidi pa Saul, má rei fika txeu xatiadu ku el! El txoma Jonatan di ‘fidju di un mudjer rebéldi’ i el fla-l ma lialdadi ki el tinha pa Davidi éra un vergónha pa se família. El tenta poi Jonatan ta pensa na se própi interesi. El fla-l: ‘Timenti kel fidju di Jesé sta bibu na téra, nen bo nen bu reinu ka ta sta suguru.’ Má Jonatan ka dexa kel-li afeta-l, nton el kontinua ta insisti ku se pai: ‘Pamodi ki el debe matadu? Kuzê ki el faze?’ Saul sai di kabésa! Dja el staba un algen grandi, má simé inda el tinha forsa di un trópa poderozu. El tenta da se fidju ku lansa! Má sikrê ku tudu se kapasidadi, el fadja. Jonatan sai di la rabaxadu, ta xinti maguadu i xatiadu. — 1 Samuel 20:24-​34.

 Kel otu dia di palmanhan, Jonatan bai ti kel kanpu pértu di undi ki Davidi staba ta sukundi. El da ku se flexa sima el konbinaba ku Davidi, pa dexa-l sabe ma Saul inda tinha intenson di mata-l. Dipôs Jonatan manda se ajudanti volta pa sidadi. El ku Davidi fika es sô i es konsigi ten un bokadinhu di ténpu pa es pâpia ku kunpanheru. Es tudu dôs txora. Jonatan dispidi ku txeu tristéza di se amigu jóven, ki staba ta kumesa un novu vida sima di refujiadu. — 1 Samuel 20:35-​42.

 Tudu kes provason li, mostra ma Jonatan éra lial mê i ma el ka ta pensaba sô na se kabésa. Di sertéza, Satanás, ki é inimigu di tudu algen fiel, ta fikaba kontenti si Jonatan fazeba sima se pai i el poba se dizeju di ten puder i glória pa frenti di tudu kuza. Lenbra ma Satanás gosta di poi algen ta pensa sô na se kabésa. El konsigi poi Adon ku Eva, nos primeru mai ku pai, ta faze kel-li. (Génesis 3:​1-6) Má, ku Jonatan el ka konsigi. Di sertéza, kel-li dexa-l uma diziludidu! Bu ta vense tentasons sima kel-li? Na nos ténpu kuazi tudu algen, na tudu lugar ta pensa sô na ses kabésa. (2 Timóteo 3:​1-5) Nu ta prende ku izénplu di Jonatan, ki foi un algen lial i ki ka pensa sô na se kabésa?

 Ku ténpu, kel ódiu ki Saul tinha di Davidi fika ta kontrola tudu kuza ki el ta pensaba ô xinti. Jonatan ka ta podia fazeba nada pa inpidi se pai di aji sima un algen dodu, ki uza se trópas pa rabida kel país di kabésa pa baxu sô pa djobe un ómi inosenti. (1 Samuel 24:​1, 2, 12-​15; 26:20) Jonatan djuda-s? É interesanti ki Bíblia nunka ka ta fla se nómi óras ki el ta pâpia di kes pirsigison li. Jonatan nunka ka ta fazeba un kuza di kel-li, pamodi el éra lial pa Jeová, pa Davidi i pa kel juramentu di amizadi ki el faze.

 Kel ki el ta xintiba pa se amigu nunka ka muda. Dipôs, el konsigi ranja un manera di nkontra ku Davidi otu bês. Es nkontra na Oreza, ki ta siginifika ‘lugar ki ten txeu arvi’. Oreza ta fikaba na un lugar dizértu, ki tinha txeu rótxa i talvês el ta fikaba uns kilómetru pértu di Ebron. Pamodi ki Jonatan poi se vida na prigu pa el ba djobe es ómi ki staba ta fuji? Bíblia ta fla ma el faze kel-li pa el podia djudaba Davidi ‘atxa forsa na Jeová.’ (1 Samuel 23:16) Modi ki Jonatan faze kel-li?

 El fla se amigu más jóven: ‘Ka bu fika ku medu’. Inda el da-l más kunfiansa. El fla-l: ‘Saul, nha pai, ka ta atxa-u.’ Pamodi ki Jonatan tinha tudu kel sertéza li? Pamodi Jonatan tinha txeu fé ma vontadi di Jeová ta kunpriba. El kontinua ta fla: ‘Bu ta ben ser rei di Israel’. Uns anu antis di kel-li, Jeová dja mandaba proféta Samuel pa fla ma kel-li ta kontiseba i gósi Jonatan staba ta lenbra Davidi ma palavra di Jeová ka ta fadja. Kuzê ki Jonatan ta pensaba ma el ta ben fazeba na futuru? El fla: ‘N ta ser kel sugundu dipôs di bo’. Fórti umildadi grandi ki kel ómi li mostra! El ta fikaba kontenti di sirbi dibaxu di lideransa di kel ómi li, ki éra 30 anu más novu ki el, i fika na se ladu ta apoia-l! Jonatan tirmina ku kes palavra li: ‘Saul, nha pai tanbê sabe di kel-li.’ (1 Samuel 23:17, 18) Na se korason, Saul sabia ma el ka ta podia ganhaba kel luta ki el tinha kóntra kel ómi ki Jeová skodjeba pa ser rei!

 Di sertéza, sima anus ba ta pasa, Davidi ta lenbraba sénpri di kel konbérsu li ku karinhu. Kel-li foi últimu bês ki es odja kunpanheru. Infilismenti, kel speransa ki Jonatan tinha di ser kel sugundu algen dipôs di Davidi, nunka ka txiga di kunpri.

 Jonatan bai pa géra djuntu ku se pai pa es luta kóntra kel grandi inimigu di Israel, kes filisteu. El podia lutaba djuntu ku se pai ku se konsénsia trankilu, pamodi el ka dexa kes kuza mariadu ki se pai faze, trapadja se sirvisu pa Jeová. El luta ku koraji i lialdadi, sima sénpri el ta fazeba. Má simé, kuzas ka kóre dretu pa Israel na kel géra la. Saul txiga ti di nvolve ku bruxaria ô fitisaria, ki Lei di Deus ta flaba ma éra un pekadu gravi ki ta ofende Jeová. Pur isu Jeová ka staba ta abênsua Saul más. Jonatan ku más dôs fidju di Saul matadu na géra. Saul dadu pankada gravi i el tra se própi vida. — 1 Samuel 28:​6-​14; 31:​2-6.

 Davidi fika txeu tristi. El éra un ómi rei di dretu ki ti el txora pa Saul, ki dja trazeba el txeu sufrimentu i dór! Davidi skrebe un kántiku pa Saul ku Jonatan. Talvês kes palavra ki Davidi skrebe pa se amigu i algen ki ta daba el konsedju, ki ta mexe más txeu ku algen, é kes-li: ‘N sta tristi pamodi bo, nha irmon Jonatan; Bo éra un amigu ki N kreba txeu. Pa mi, bu amor éra midjór di ki amor di mudjeris.’ — 2 Samuel 1:​26.

 Davidi nunka ka skese di promésa ki el faze Jonatan. Uns anu dipôs, el faze tudu pa djuda fidju di Jonatan, Mefibozéti, ki éra difisienti. (2 Samuel 9:​1-​13) Di sertéza, Davidi prende txeu ku izénplu ki Jonatan dexa di lialdadi i di bon konportamentu. Tanbê Davidi prende ku dispozison ki Jonatan tinha di fika na se ladu, mésmu óras ki faze kel-li ta trazeba el txeu prubléma. Nu ta prende kes lison li tanbê? Nu pode djobe amigus ki é sima Jonatan? Nu pode ser kel tipu di amigu li? Si nu djuda nos amigu dizenvolve i omenta ses fé na Jeová, si nu poi nos lialdadi pa Deus na primeru lugar i si nu mante lial envês di djobe nos própi interesi, nu ta ser kel tipu di amigu ki Jonatan éra. I nu ta imita se fé.