Bíblia ta fla ma ‘Jeová ka ta nega nada di bon pa kes ki ta anda lial ku el.’ (Salmo 84:11) Kuzê ki ‘anda lial ku el’ krê fla? El krê fla vive di un manera ki ta mostra ma bu sta kunpri kel promésa ki bu faze kantu bu da bu vida pa Jeová. (Eclesiastes 5:4, 5) Modi ki bu pode kontinua lial pa Jeová dipôs ki bu batiza?

Na kel artigu li

•  Ka bu dizisti óras ki bu ta pasa pa prublémas

•  Sforsa pa bu ka kai na tentason

•  Ka bu perde interesi pa kuzas spritual

 Testu di Bíblia: ‘Nu ten ki pasa pa txeu difikuldadi pa nu entra na Reinu di Deus.’ — Atos 14:22.

 Kuzê ki kel testu li krê fla: Un óra ô otu, tudu sérvu di Deus ta pasa pa prublémas na vida. Alguns prubléma ki bu pode pasa pa el é pamodi bu ta sirbi Deus. Pur izénplu, es pode faze-u trósa ô maltrata-u. Má prublémas sima falta di dinheru ô prubléma di saúdi pode afeta tudu algen.

 Kuzê ki pode kontise: Alvês, bu situason di vida ta muda. I nen sénpri é pa midjór. Bíblia ta fla ma kuzas mariadu ta kontise ku tudu algen. Ka ta inporta si bu ta sirbi Deus ô nau. — Eclesiastes 9:11.

 Kuzê ki bu pode faze: Gósi ki dja bu sabe ma bu ta ben infrenta prublémas, bu pode pripara pa es. Inkara prublémas sima un oportunidadi pa bira bu fé más fórti i pa bu kunfia más na Jeová. (Tiago 1:2, 3) Ku ténpu, bu pode xinti sima apóstlu Paulu ki fla: “Pa tudu kuza N ten forsa grasas-a kel ki ta da-m puder.” — Filipensis 4:13.

 Un ideia: Konxe stória di Juzé más midjór. Bu pode lé sobri stória di se vida na livru di Génesis kapítlus 37 i 39 ti 41. Pensa na kes pergunta li: Ki prublémas ki el ka staba ta spéra kontise ku el i modi ki el lida ku es? Modi ki Jeová djuda Juzé?

 Bu meste di más ajuda?

•   Lé:

   “Kuzê ki N pode faze óras ki kontise un disgrasa na nha vida?”

   “Modi ki N pode lida ku prublémas i vense-s?”

   “Modi ki N pode lida ku mudansas?”

•   Diskarega:

   “Kuzê ki bu pode faze si bu pai ô bu mai sta duenti?”

 Testu di Bíblia: ‘Tudu algen ta provadu óras ki se própi dizeju ta tenta-l i ta ingoda-l.’ — Tiago 1:14.

 Kuzê ki kel testu li krê fla: Alvês nos tudu nu ta xinti tentadu na faze algun kuza mariadu. Pur isu, é inportanti nu kontrola nos dizejus.

 Kuzê ki pode kontise: Dipôs ki bu batiza bu ta kontinua ta lida ku kes ‘dizeju di karni’. (2 Pedro 2:18) Bu pode ti xinti tentadu na faze séksu antis di kazamentu.

 Kuzê ki bu pode faze: Pripara gósi, antis di bu pasa pa tentason. Asi óras ki kes dizeju parse bu ka ta faze kuzas mariadu. Lenbra ma Jizus fla: “Ningen ka ta pode ser skravu di dôs dónu.” (Mateus 6:24) É bo ki ta skodje kenha ki bu krê pa ser bu dónu. Pur isu, skodje Jeová. Sikrê un dizeju é fórti, é bo ki ta disidi si bu ta kai na tentason ô nau. — Gálatas 5:16.

 Un ideia: Tenta konxe bus pontu fraku i bus pontu fórti. Skodje amigus ki ta djuda-u mostra kes bon kualidadi ki bu ten. Ivita kes algen, lugaris i situasons ki pode ka dexa-u faze kel ki é dretu. — Salmo 26:4, 5.

 Bu meste di más ajuda?

•   Lé:

   “Modi ki N pode vense tentason?”

   “Modi ki N pode para di pensa na séksu?”

   “Kuzê ki N pode faze pa nhas koléga ka manda na mi?”

   “Bu ta pensa sima Jeová?”

 Testu di Bíblia: ‘Nhos mostra es mésmu inpenhu, ti ki fin txiga, asi pa nhos ka bira prigisozu’. — Hebreus 6:11, 12.

 Kuzê ki kel testu li krê fla: Un algen ki ka ta konsentra na se trabadju pode kumesa ta trabadja más poku i ti bira prigisozu.

 Kuzê ki pode kontise: Di sertéza, kantu bu batiza bu staba txeu kontenti i xeiu di zelu. Bu tinha un amor fórti pa Jeová. Má dipôs di algun ténpu, bu pode atxa difísil kontinua ta obi ku Jeová na tudu kuza. Kel-li pode dexa-u dizanimadu i pode pô-u ta perde interesi pa kuzas spiritual. — Gálatas 5:7.

 Kuzê ki bu pode faze: Kontinua ta faze kel ki é dretu, sikrê duránti algun ténpu bu ka xinti vontadi di faze-l. (1 Coríntios 9:27) Tenta konxe Jeová midjór i pâpia ku el na orason sénpri, asi pa bu amizadi ku el bira más fórti. Tanbê, kontinua ta faze amizadi ku kes algen ki ta ama Jeová.

 Un ideia: Lenbra ma Jeová ta ama-u txeu i ma el sta prontu pa djuda-u. Ka bu atxa ma el sta xatiadu ku bo si talvês bu perde bu zelu duránti un ténpu. Bíblia ta fla: ‘El ta da puder pa ken ki sta kansadu i el ta da forsa pa ken ki sta sen forsa.’ (Isaías 40:29) El ta abênsua sforsu ki bu ta faze pa rekupera bu interesi pa kuzas spritual.

 Bu meste di más ajuda?

•   Lé:

   “Jóvens, nhos kontinua ta trabadja pa nhos salvason”

   “Modi ki N pode xinti alegria na adora Deus?”

•   Odja vídiu:

   Kuzê ki otus jóven ta fla — Midjór vida ki ten

 Kuzê ki nu prende: Si bu kontinua lial pa Jeová bu ta poi se korason ta fika kontenti! (Provérbios 27:11) El ta fika kontenti si bu skodje fika di se ladu. Tanbê el ta da-u tudu kel ki bu meste pa bu kontinua ta aguenta kes ataki di Satanás.