Un mai soltera ki txoma Desikar krê sérba pioneru fíksu pa el pode fazeba más pa Jeová. El ta vive na Venezuela, ki é un país ki ten txeu prubléma di falta di dinheru. Má simé, el staba disididu na ser pionera, i é kel-la ki el faze. El staba kontenti ku kel-la, má dipôs kumesa COVID-19.

 Kantu COVID-19 kumesa, ka foi fásil pa Desikar ranja otus manera di faze pregason pamodi kel situason. Skrebe karta éra un prubléma pa el. Tanbê, el ka ta podia uzaba xamada ku vídiu na pregason pamodi internet é txeu karu na se zóna. El fla: “N staba dizanimadu. Dirapenti N ka ta podia pregaba más sima N ta fazeba. N ta atxaba ma N ka staba ta ser un bon pioneru fíksu.”

 Dipôs, na janeru di 2021, filial di Tistimunhas di Jeová na Venezuela aprova un kanpanha spesial di pregason. Fazedu planu pa alguns diskursu pa públiku dadu na uns 60 stason di rádiu i 7 kanal di tilivizon, duránti tudu kes sinku fin di simana di kel mês. Tistimunhas di Jeová insentivadu pa konvida kes algen ki mostra interesi pa odja i pa obi. Tanbê filial da perguntas i testus di Bíblia ki staba ligadu ku kada diskursu, ki nos irmons ta pode uzaba na ses karta i pa tilifóni. Alén di kel-li, filial insentiva irmons pa uza mensajen pa telemóvel na ses pregason, ki bira un otu manera di faze pregason pa txeu Tistimunha di Jeová na Venezuela.

 Desikar fika kontenti di partisipa na es kanpanha. Enbóra nunka el ka uzaba mensajen pa telemóvel pa daba tistimunhu, el disidi sprimenta. Má simé, el mesteba di ajuda. El fla: “Ami é ka bon na uza aparelhus eletróniku.” Nton el pidi se fidju-fémia pa inxina-l. I sô ku alguns aula, Desikar staba prontu pa partisipa na kanpanha.

 El manda mensajen di se telemóvel, pur isu el konsigi konvida txeu algen ki el konxe pa ba obi kes diskursu gravadu. El fika dimiradu ku rezultadu. Txeu di kes algen ki Desikar konvida obi kes diskursu i es faze pergunta. Otus ka konsigi odja i obi, má es pergunta Desikar kuzê ki papiadu na kes diskursu. Desikar fla: “N pripara un rezumu ku kes nóta ki N toma i N fla-s sobri kes diskursu. Nunka N ka fazeba más di sinku revizita na un mês, má na fin di kanpanha dja N fazeba 112 revizita!” a

 Tanbê Desikar konvida se irman ki é ka Tistimunha di Jeová, ki ta mora na se ladu, pa obi kes diskursu na rádiu. Desikar fla: “N fika spantadu kantu nha irman konkorda. Tudu dumingu, 8 óra di palmanhan N ta baba se kaza i nu ta obiba djuntu. El tinha txeu pergunta ki el ta fazeba duránti prugrama i tanbê na fin.” Irman di Desikar tanbê sisti Komemorason di mórti di Jizus através di xamada ku vídiu i el dexa Desikar uza se internet pa faze pregason.

 Desikar fla: “N ta agradese Jeová txeu. Tanbê N ta agradese ansions di nha kongregason pamodi es da-m txeu koraji. Es djuda-m xinti otu bês alegria na pregason.” (Jeremias 15:16) Desikar kontinua se pioneru i ta inxina kes algen ki mostra interesi através di mensajen pa telemóvel.