Na anu di 2017, 12 Tistimunha di Jeová viaja pa kósta di zóna di Moskitu, na Nikarágua, na un barku ki txoma Sturi Yamni. Un di kes Tistimunha di Jeová ki staba na barku, ki txoma Stefan, fla: “Nu krê ba vizitaba i nkorajaba un grupu pikinoti di Tistimunhas di Jeová ki ta vive na kel zóna izoladu i tanbê djudaba es prega notísias sábi na ses tiritóriu ki é grandi.”

Kes 12 Tistimunha di Jeová kumesa ses viaja di Pearl Lagoon i es bai pa, Río Grande de Matagalpa, ti txiga zóna di La Cruz de Río Grande. Pa tudu, es viaja 200 kilómetru. Nen es ka ta imajinaba ma nómi di kel barku ki siginifika “Notísias sábi” na língua miskitu, ta ben markaba vida di kes algen ki ta mora na bera di kel riu. Dipôs di uns 12 óra ta viaja, sen konta ku kel ténpu ki es tra pa durmi di noti, kes Tistimunha di Jeová txiga na zóna di La Cruz de Río Grande. Kes 6 Tistimunha di Jeová ki ta mora la fika txeu kontenti di resebe-s.

Na kel noti, kontise un tenporal ki poi un txuba fórti ta kai na undi ki ta kumesa Río Grande de Matagalpa. Na poku ténpu, kel riu intxi ti ki baza i agu kontinua ta subi duránti dôs dia. Salon di Reinu i txeu kaza na zóna di La Cruz, fika xeiu di agu. Kes irmon ki staba la ta vizita, djuda kes algen di kel zóna sai di ses kaza. Maioria di kes algen pasa dôs noti na kaza di un Tistimunha di Jeová.

Na tirseru noti, prizidenti di La Cruz, ba pidi kes Tistimunha di Jeová pa djuda-s pamodi Sturi Yamni éra úniku barku ki ta da pa viajaba na kel riu. El pidi nos irmons pa leba un grupu di pesoas pa bai djuda kes algen ki ta mora na kes zóna bera di kel riu ki fika prujudikadu. Kes irmon fika kontenti di djuda.

Na kel otu dia di palmanhan, três irmon leba kes algen ki bai djuda. Stefan fla: “Staba difísil viaja pamodi korenti di riu staba uma fórti i ta rasta kes arvi grandi ki rinka. Tanbê staba béntu fórti i riu staba ta kóre ku txeu forsa.” Sikrê na kel situason difísil, kel barku konsigi txiga na três zóna.

Kes três Tistimunha di Jeová pruveta kel oportunidadi pa konsola pesoas di kes zóna. Es dexa-s ku revista Nhos korda! di 2017, ku téma: “Tragédias — O que fazer quando sua vida está em jogo”. Kel revista txiga déntu di óra.

Kes algen di kes zóna fika txeu kontenti ku ajuda ki es dadu i ku manera ki Tistimunhas di Jeová uza Bíblia pa konsola-s. Un algen fla: “Es sta prontu pa djuda na ténpus difísil.” Un otu algen fla: “Es ta ama ses prósimu di verdadi.” Dipôs di odja tudu kuza ki Tistimunhas di Jeová faze pa djuda ses irmon i otus algen, txeu pesoas di kes zóna fika ta krê obi mensaji di Bíblia.