Danielle kele Mbangi ya Yehowa na Afrique du Sud. Muntu mosi buna ke vandaka ti kikalulu ya kukwenda kunwa kafe na restora mosi. Muntu yango vilanaka saki na yandi na restora yango. Saki yina vandaka ti kasaki mosi (portefeuille) yina vandaka ti mbongo mpi bakarti ya banki na kati. Danielle bakaka lukanu ya kuvutula saki yina na munkwa na yo. Yandi sosaka adresi na yandi to nimero na yandi ya telefone, kansi yandi zwaka kaka zina ya bakala yango. Yandi bingaka yandi kansi yo simbaka ve. Kansi Danielle landaka kusosa muntu yango. Yandi bingaka nimero mosi ya yandi monaka na faktire ya doktere mosi yina vandaka na saki yango. Nkento mosi yambaka mpi ndimaka kupesa Danielle nimero ya telefone ya bakala yina.

 Bakala yango yitukaka ntangu bantu yina ke salaka na biro ya doktere yina bingaka yandi mpi songaka yandi nde Danielle me mona saki na yandi, mpi yandi ke zola kuvutudila yandi yo. Ntangu bakala yina kwisaka kubaka saki yango, Danielle ti papa na yandi bantu yambaka yandi. Bo sadilaka dibaku yina sambu na kusonga yandi sambu na nki bo salaka yonso sambu na kuzwa yandi. Bo tubaka nde mutindu bo kele Bambangi ya Yehowa, bo ke salaka bikesa sambu na kuzitisa bansiku ya Biblia. Yo yina bo ke salaka yonso sambu na kulanda kuvanda masonga.—Baebreo 13:18.

 Bangunga fioti na nima, bakala yina tindilaka Danielle ti papa na yandi message sambu na kupesa bo diaka mersi mutindu bo vutudilaka yandi saki yina ti kasaki (portefeuille) ya vandaka na kati. Yandi sonikilaka bo nde: “Mono ke pesa beno mersi mingi mutindu beno salaka yonso sambu na kuzwa mono. Mono vandaka na kiese ya kukutana ti beno mpi mono ta vilaka ve ata fioti nde beno kele bantu yina ke zolaka bantu ya nkaka mpi banduku. Mono ke zola kupesa beno dikabu mosi sambu na kumonisa ntonda na mono. Mono me zaba nde beno ke salaka bibansa sambu na kusala kisalu yina Nzambi me pesaka beno. Mambu yina Danielle me sala me monisa mutindu ya bantu yina beno kele: bantu ya masonga mpi ya me kangamaka ngolo na Nzambi. Mono ke zola kusonga beno diaka nde mersi mpi bika nde Nzambi kusakumuna kisalu na beno.”

 Mwa bangonda na nima, papa Danielle solulaka diaka ti muntu yina mpi muntu yango songaka yandi nde yandi mpi na ture na yandi, yandi monaka kasaki (portemonnaie) mosi ya mbongo na ntoto ntangu yandi vandaka kusumba bima. Ntangu yandi monaka munkwa na yo mpi yandi vutudilaka yandi yo, yandi songaka yandi inki pusaka yandi na kusala mutindu yina. Yandi tubaka nde: “Kana muntu me sala kima mosi ya fioti ya mbote mpi ya ke monisa masonga, bantu ya nkaka ta landa mbandu na yandi mpi yo ke salaka nde luzingu na beto yonso kuvanda mbote.”