Na Kitanu 18 Août 2023, Mpangi Giacomo Maffei ya kele na Komite ya Filiale ya Colombie, basisaka Mbalula ya Nsi-Ntoto ya Mpa ya Masonuku ya Kigreki ya Bukristu na ndinga Wayuunaiki na Lukutakanu ya Distrike ya vandaka ti ntu-diambu “Beno Monisa Ntima ya Nda”! yina bo salaka na Maicao na La Guajira na Colombie. Bantu 265 vandaka na lukutakanu yina. Bantu lendaka kubaka na Internet Biblia yina bo ke sadilaka na ba-apareyi. Mabundu ta baka Biblia yai ya papie na bangonda ya ntete ya 2024.

Bantu kuluta 700 000 ke tubaka ndinga Wayuunaiki. Bo ke bingaka bantu ya ke tubaka ndinga yai nde Bawayuu. Bo ke zingaka na nziunga ya La Guajira na Colombie mpi na mbanza Zulia na nordi ya Vénézuéla. Bambangi ya Yehowa yantikaka kubalula mikanda na Ndinga Wayuunaiki na 1998. Babiro ya ke balulaka mikanda mpi bavideo kele na Riohacha, nto-mbanza ya La Guajira. Bampangi 445 ya ke longaka nsangu ya mbote (bansamuni) mpi ya ke tubaka ndinga Wayuunaiki ke sadilaka Yehowa na mabundu 17 mpi na bimvuka 4 na Colombie mpi na Vénézuéla.

Mpangi-bakala mosi monisaka ntonda sambu na Mbalula ya Nsi-Ntoto ya Mpa ya Masonuku ya Kigreki ya Bukristu na ndinga Wayuunaiki. Yandi tubaka nde: “Kuzwa Biblia mosi ya siki-siki na ndinga Wayuunaiki kele mbote mingi, yo kele dikabu ya Tata na beto ya zulu!” Mpangi-bakala ya nkaka tubaka nde: “Mono ke ndima nde Biblia yai ta sadisa bantu yina ta tanga yo na kukuma ti kinduku ya ngolo ti Yehowa mpi na kupusana pene-pene na yandi.”

Beto ke ndima nde Biblia yai ta sala nde bampangi na beto ya babakala mpi ya bankento ya ke tubaka ndinga Wayuunaiki kuvanda na kiese mpi yo ta sadisa bantu mingi na kuzaba Nzambi.—Matayo 5:3.