Na Oktobri 28, 2020, Tribinale ya mbanza Briansk ndimaka lukanu yina tribinale ya ntete bakaka sambu na bampangi-babakala Vladimir Khokhlov ti Edouard Jinjikov mpi bampangi-bankento Tatiana Chamcheva et Olga Silaïeva. Ntete bo zengilaka bo ndola ya bangonda banda na 12 tii na bangonda 15 ya boloko. Kansi bo kotisaka bo diaka ve na boloko sambu bo lutisaka dezia ntangu yai na boloko yina bo tulaka bo sambu na mwa ntangu. Sambu na lukanu yina tribinale me baka bubu yai, bo ta landa kutadila bampangi na beto yai bonso bantu ya mbi. Ata mpidina, bo kele na kiese sambu bo ta tula bo diaka ve na boloko. Ata nsiku mosi diaka ve ke pesa nzila ya kulandila bampangi yai mpi ya kupesa bo bandola ya nkaka ya ngolo.

Na ntwala nde tribinale kusambisa bampangi na beto na mbala ya ntete, bampangi-babakala yai salaka bilumbu 316 mpi bampangi-bankento yai salaka bilumbu 245 na boloko yina bo tulaka bo sambu na mwa ntangu. Ntangu bo basisaka bampangi-bankento yai na boloko, beto solulaka ti bo na Rapore No. 5 ya Nto-Kimvuka na Mvu 2020. Bo tubaka nde kisambu, kutanga Biblia mpi kikalulu ya kupesa matondo sadisaka bo na kukanga ntima na kiese.