Kana bampasi ke katukaka ve na Nzambi, sambu na nki nzala ya ngolo, kinsukami yina ke manaka ve, bitumba, maladi ya ngolo, mpi bisumbula ya lugangu kele mingi? Biblia, Ndinga ya Nzambi, ke tubila bikuma tatu ya nene yina ke salaka nde bantu kumona mpasi:

1. Bwimi, Lukasi, mpi Kimpala. “Muntu me yalaka muntu sambu na kupesa yandi mpasi.” (Longi 8:9) Mbala mingi bantu ke kutanaka ti bampasi sambu bantu ya kukonda kukuka, ya bwimi, to ya nku ke niokulaka bo.

2. Ntangu mpi Mambu ya Kukonda Kukana. Mbala mingi bantu ke monaka mpasi “sambu ntangu mpi mambu ya kukonda kukana ke kuminaka bo yonso.” (Longi 9:11) Disongidila, bantu ke vandaka kaka na kisika ya mbi na ntangu ya mbi, bisumbula ke salamaka, mpi bantu ke vandaka na kidiba to ke salaka bifu.

3. Mfumu ya Mbi ya Nsi-Ntoto. Biblia ke tubila na pwelele yonso kikuma ya ntete yina ke salaka nde bantu kukutana ti bampasi. Yo ke tuba nde: “Nsi-ntoto ya mvimba kele na nsi ya kiyeka ya muntu ya mbi.” (1 Yoane 5:19) “Muntu ya mbi” yango kele Satana Diabulu, kigangwa ya ngolo ya kimpeve yina vandaka ntete wanzio ya Nzambi kansi “yandi kangamaka ve ngolo na kieleka.” (Yoane 8:44) Bawanzio ya nkaka landaka Satana mpi kolamaka na Nzambi sambu na kulanda bampusa na bo ya kinsuni, yo yina bo me kudikumisaka bademo. (Kuyantika 6:1-5) Banda Satana ti bademo na yandi kolamaka, bo ke vandaka ti bupusi ya ngolo mpi ya nku na mambu ya nsi-ntoto yai. Bupusi yai kele kibeni ngolo na bilumbu na beto. Bubu yai, Diabulu kele na makasi ya ngolo mpi “ke kusaka ntoto ya mvimba,” yo me nataka “mawa na ntoto.” (Kusonga 12:9, 12) Ya kieleka, Satana kele mfumu ya nku. Yandi ke waka kiese mingi kana bantu ke mona mpasi. Satana muntu kele na kisina ya bampasi ya bantu kansi Nzambi ve.

TADILA DIAMBU YAI: Kaka muntu ya mbi mpi ya nku lenda sala nde bantu yina me sala mbi ve kumona mpasi. Kansi, Biblia ke tubaka nde: “Nzambi kele zola.” (1 Yoane 4:8) Na kuwakana ti kimuntu na yandi ya zola, “ngindu lenda kwisila ve ata fioti Nzambi ya kieleka na kusala mambu na nku yonso” to “na kusala mambu ya mbi!”—Yobi 34:10.

Kansi, nge lenda kudiyula nde, ‘Tii nki ntangu Nzambi Nkwa-Ngolo Yonso ta bika nde Satana kulanda kuyala na nku yonso?’ Mutindu beto me katuka kumona yo, Nzambi ke mengaka mambu ya mbi, mpi yandi ke waka mpasi mingi ntangu beto ke kutanaka ti bampasi. Diaka, Biblia ke tuba nde, beno “losa basusi na beno yonso na yandi sambu yandi ke kudibanzaka sambu na beno.” (1 Piere 5:7) Nzambi ke zolaka beto mpi yandi kele ngolo ya kumanisa bampasi mpi mambu ya kukonda lunungu, mutindu disolo yina ke landa ta tendula yo. *