Ee, bawanzio ya mbi kele. Bo katukaka na wapi? Kuvila ve nde Nzambi gangaka bawanzio ti kimpwanza ya kupona. Ntangu fioti na nima ya kusala bakala ti nkento ya ntete, Adami ti Eva, kigangwa mosi ya kimpeve yina vandaka ya kukuka sadilaka na mutindu ya mbi kimpwanza na yandi ya kupona mpi yandi pusaka bantu na kukolama. Yandi pusaka Adami ti Eva na kukolama na Nzambi. (Kuyantika 3:1-7; Kusonga 12:9) Biblia ke tubila ve zina ya kigangwa yina ya kimpeve to kiyeka yina yandi vandaka ti yo na zulu na ntwala nde yandi kolama. Kansi na nima ya kukolama, Biblia ke bingaka yandi Satana, disongidila “Mbeni,” mpi Diabulu, disongidila “Muntu ya ke kusilaka bantu makambu.”—Matayo 4:8-11.

Diambu ya mawa kele nde kukolama yina sukaka ve pana. Na bilumbu ya Noa, bawanzio mingi “yambulaka kisika yina bo vandaka kuzinga” na zulu na dibuta ya Nzambi. Bo kwisaka na ntoto mpi bo lwataka nitu ya bantu sambu na kusala mambu ya nsoni mpi ya mbi yina Nzambi pesaka bo ve ata fioti nswa.—Yude 6; Kuyantika 6:1-4; 1 Piere 3:19, 20.

Inki kuminaka bawanzio yina ya mbi? Ntangu Nzambi nokisaka mvula ya ngolo na ntoto ya mvimba sambu na kukatula mambu ya mbi, bo lwataka nitu ya kimpeve mpi bo vutukaka na zulu. Ata mpidina, Nzambi pesaka ve bawanzio yai ya mbi nswa ya kuvutukila “kisika na bo ya luyantiku.” Kansi, yandi me kangaka bo “na mpimpa ya ngolo [ya kimpeve],” yina bo ke bingaka Tartare. (Yude 6; 2 Piere 2:4) Bademo yai me kuditulaka na nsi ya luyalu ya Satana Diabulu, “mfumu ya bademo,” yina “ke landaka kudikitula bonso wanzio ya nsemo.”—Matayo 12:24; 2 Bakorinto 11:14.

Biblia ke longaka nde Kimfumu ya Mesia ya Nzambi me yantikaka kuyala na zulu banda 1914. * Na nima ya diambu yai ya mfunu, bo kulaka Satana ti bademo na yandi na zulu mpi bo losaka bo pene-pene ya ntoto. Mambu ya mbi yina ke salama mingi mpi mansoni yina kele na ntoto ke ndimisa nde bo kele ti bupusi ya mbi na luzingu ya bantu.—Kusonga 12:9-12.

Kansi, mutindu mambu ya mbi mpi mubulu ya ngolo ke kuma mingi, yo ke monisa nde nsuka ya luyalu na bo ya nku me finama. Ntama mingi ve, bo ta kanga bigangwa yina ya nku. Kimfumu ya Nzambi ta yala ntoto yina ta kuma paladisu bamvula 1 000, na nima bo ta pesa bigangwa yina ya nku ntangu fioti sambu na kumeka bantu na mbala ya nsuka. Na nima, bo ta fwa bo kimakulu.—Matayo 25:41; Kusonga 20:1-3, 7-10.