“Kiti ya kimfumu vandaka na zulu, mpi muntu mosi vandaka na kiti yina ya kimfumu. Muntu yina me vanda vandaka kumonika bonso ditadi ya yaspe mpi ditadi ya sardwane, mpi nkongolo yina vandaka kumonika bonso emerode vandaka na nziunga ya kiti ya kimfumu.”—Kusonga 4:2, 3.

“Nsemo vandaka na nziunga na yandi bonso nsemo ya nkongolo na dituti na kilumbu mosi ya mvula. Yai kele mutindu nsemo yina vandaka kusema na nziunga yina vandaka kumonika. Yo vandaka kumonika bonso nkembo ya Yehowa.”—Ezekiele 1:27, 28.

Bambona-meso yina ntumwa Yoane mpi profete Ezekiele monaka ke sadila bima yina beto lenda mona, mu mbandu matadi ya ntalu kibeni, nkongolo, mpi kiti ya kimfumu ya kuyituka, sambu na kutubila bunene ya Yehowa, Nzambi ya Kuluta Kuzanguka. Bambona-meso yai ke songa beto nde kisika Yehowa kele ke monikaka kitoko mpenza, yo ke pesaka kiese, mpi kele pima.

Mambu yina bambona-meso ke tubila sambu na Nzambi ke wakana ti bangogo yai ya muyimbi-bankunga sonikaka: “Yehowa kele nene mpi yo me fwana kibeni na kukumisa yandi. Yandi ke pesaka boma mingi kuluta banzambi yonso ya nkaka. Banzambi yonso ya bantu kele banzambi ya kukonda mfunu, kansi Yehowa muntu salaka zulu. Bunene ti lukumu kele na ntwala na yandi; ngolo ti kitoko kele na kisika na yandi ya santu.”—Nkunga 96:4-6.

Ata Yehowa kele Muntu ya Kuluta Yonso, yandi ke lomba beto na kukwenda pene-pene na yandi na nzila ya kisambu mpi yandi ke ndimisa beto nde yandi ke waka beto. (Nkunga 65:2) Nzambi ke zolaka beto mingi mpi ke kudibanzaka mpenza sambu na beto, yo yina ntumwa Yoane sonikaka na masonga yonso nde: “Nzambi kele zola.”—1 Yoane 4:8.

“Etiene vandaka ya kufuluka na mpeve santu; yandi talaka na zulu mpi yandi monaka nkembo ya Nzambi mpi Yezu me telama na diboko ya kitata ya Nzambi, ebuna yandi tubaka nde: ‘Tala, mono ke mona zulu me kanguka mpi Mwana ya muntu me telama na diboko ya kitata ya Nzambi.’”—Bisalu 7:55, 56.

Ntangu fioti na ntwala nde Etiene kumona mbona-meso yai, bantu yina Etiene vandaka kusonga mambu yai, disongidila bantwadisi ya Bayuda, salaka yonso sambu bo fwa Yezu. Mbona-meso yai ke monisa nde Yezu vandaka na luzingu mpi nde Nzambi futumunaka  yandi mpi pesaka yandi lukumu. Sambu na diambu yai, ntumwa Polo sonikaka nde: “[Yehowa] tedimisaka [Yezu] na bafwa mpi yandi vandisaka yandi na diboko na yandi ya kitata na bisika ya zulu, na zulu kibeni ya konso luyalu, kiyeka, ngolo, kimfumu, mpi ya konso zina yina bo lenda tanga, kaka na ngidika ya bima yai ve, kansi mpi na ngidika yina ke kwisa.”—Baefezo 1:20, 21.

Masonuku ke tubila kaka ve kiyeka ya nene ya Yezu, kansi yo ke monisa mpi nde Yezu ke kudibanzaka mpenza sambu na bantu mutindu Yehowa ke kudibanzaka sambu na bantu. Ntangu yandi vandaka na ntoto, Yezu belulaka bambefo ti bantu yina vandaka ti bifu na nitu, mpi tedimisaka bafwa. Na nzila ya lufwa na yandi ya kimenga, Yezu me monisaka zola na yandi ya ngolo sambu na Nzambi mpi sambu na bantu. (Baefezo 2:4, 5) Yezu me telama na diboko ya kitata ya Nzambi mpi ntama mingi ve yandi ta yala mpi ta natila bantu ya bulemfu balusakumunu mingi na bisika yonso.

“Mono [profete Daniele] landaka kutala tii kuna bo tulaka bakiti ya kimfumu mpi Mbuta ya Bilumbu [Yehowa] vandaka. . . . Funda mosi mbala funda vandaka kusadila yandi, mpi mafunda kumi mbala mafunda kumi vandaka kutelama na ntwala na yandi.”—Daniele 7:9, 10.

Na mbona-meso yai ya ke monisa zulu, Daniele monaka wanzio mosi mpamba ve, kansi bawanzio mingi kibeni. Yo fwete vanda nde mbona-meso yai vandaka kupesa mpenza boma! Bawanzio kele bantu ya kele na nitu ya kimpeve. Bo kele bantu ya nkembo, ya mayele, mpi ya ngolo. Bankaka kele baserafe, bankaka basherube. Biblia ke tubila bawanzio mbala kuluta 250.

Bawanzio kele ve bantu yina zingaka ntete na ntoto na ntwala ya kukuma bawanzio. Kansi Nzambi gangaka bawanzio na ntwala nde yandi ganga muntu. Ntangu Nzambi salaka ntoto, bawanzio vandaka na lweka na yandi. Bo monaka mpi tulaka milolo ya kiese.—Yobi 38:4-7.

Mutindu mosi yina bawanzio ya kwikama ke sadilaka Nzambi kele kupesa maboko na kisalu ya kuluta mfunu yina ke salama bubu yai na ntoto, disongidila kisalu ya kuzabisa nsangu ya mbote ya Kimfumu ya Nzambi. (Matayo 24:14) Mutindu bo ke pesa maboko na kisalu yai monanaka na mbona-meso yina bo songaka ntumwa Yoane yina sonikaka nde: “Mono monaka wanzio ya nkaka ke pumbuka na kati-kati ya zulu, mpi yandi vandaka ti nsangu ya mbote ya mvula na mvula ya kuzabisa na bantu yina ke zingaka na  ntoto, na makanda yonso, na mabuta yonso, na bandinga yonso, mpi na bansi yonso.” (Kusonga 14:6) Bubu yai bawanzio ke solulaka diaka ve ti bantu mutindu bo vandaka kusala yo na mabaku ya nkaka na ntangu ya ntama, kansi bo ke twadisa bantu yina ke longa nsangu ya mbote na bantu ya ntima-masonga.

“Bitumba basikaka na zulu: Mikaele [Yezu Kristu] mpi bawanzio na yandi nwanaka ti dragoni, mpi dragoni ti bawanzio na yandi nwanaka kansi bo nungaka ve, mpi kisika vandaka diaka ve sambu na bo na zulu. Ebuna, bo losaka dragoni ya nene na nsi, nioka ya ntama, yina bo ke bingaka Diabulu mpi Satana, yina ke kusaka ntoto ya mvimba; bo losaka yandi na ntoto, mpi bo losaka yandi na nsi ti bawanzio na yandi.”—Kusonga 12:7-9.

Na ntangu mosi buna, ngemba vandaka ve na zulu. Na luyantiku ya disolo ya luzingu ya bantu, wanzio mosi kumaka ti nzala nde bantu kusambila yandi yo yina yandi kolamaka na Yehowa mpi kumaka Satana, disongidila “Mbeni.” Na nima, bawanzio ya nkaka mpi vukanaka ti yandi, bo kolamaka mpi bo me kumaka kubinga bo bademo. Bo kele bantu ya mbi mpenza sambu bo ke telaminaka Yehowa mpi me nataka bantu mingi sambu bo landa ve lutwadisu ya zola ya Yehowa.

Satana ti bademo na yandi kele bantu ya mbi mpenza mpi ya nku. Bo ke zolaka ve bantu mpi bo kele na kisina ya bampasi mingi ya kele na ntoto. Mu mbandu, Satana fwaka bitwisi ya Yobi muntu ya kwikama mpi bansadi na yandi. Yandi fwaka bana yonso kumi ya Yobi mutindu yandi sadilaka “mupepe mosi ya ngolo” sambu na kubwisa nzo yina bo vandaka. Na nima, Satana basisaka Yobi “bivimbu ya mpasi kibeni katuka na makulu tii na ntu.”—Yobi 1:7-19; 2:7.

Kansi ntama mingi ve, bo ta fwa Satana. Banda bo me losaka yandi pene-pene ya ntoto, yandi me zaba nde “yandi kele ti ntangu fioti.” (Kusonga 12:12) Nsangu ya mbote kele nde Satana ta fwa.

“Nge [Yezu] sumbaka bantu ya mabuta yonso, ya bandinga yonso, ya bansi yonso, mpi ya makanda yonso sambu na Nzambi, mpi nge kumisaka bo kimfumu mpi banganga-nzambi sambu na Nzambi na beto, mpi bo fwete yala bonso bantotila na ntoto.”—Kusonga 5:9, 10.

Kaka mutindu Yezu futumukaka sambu na kukwenda kuzinga na zulu, bantu ya nkaka mpi ta futumuka. Yezu tubilaka bantumwa na yandi ya kwikama nde: “Mono ke kwenda sambu na kuyidikila beno kisika. Diaka, . . . mono ta kwisa diaka mpi mono ta yamba beno kisika mono kele, sambu beno mpi kuvanda kisika yina mono kele.”—Yoane 14:2, 3.

 Bantu yina ke kwenda na zulu ke kwenda kuna sambu na kusala kisalu. Kumosi ti Yezu, bo ta sala guvernema yina ta yala bantu ya ntoto ya mvimba mpi ta natila bo balusakumunu. Yo kele Kimfumu yina Yezu songaka balongoki na yandi na kusamba sambu na yo na kisambu yai ya mbandu: “Tata na beto yina kele na zulu, zina na nge kuvanda ya santu. Kimfumu na nge kukwisa. Luzolo na nge kusalama na ntoto, bonso na zulu.”—Matayo 6:9, 10.

“Mono [ntumwa Yoane] waka ndinga mosi ya ngolo ke katuka na kiti ya kimfumu mpi ke tuba nde: ‘Tala! Tenta ya Nzambi kele ti bantu, . . . mpi yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.’”—Kusonga 21:3, 4.

Mbona-meso yai ke tubila ntangu yina Kimfumu ya Nzambi ta sukisa luyalu ya Satana mpi ta kumisa ntoto paladisu. Bantu ya kele na Kimfumu yina kele Yezu ti bantu yina ta futumuka na ntoto sambu na kukwenda kuzinga na zulu. Mambu yina me natilaka bantu bampasi mpi mawa ta vanda diaka ve. Lufwa mpi ta vanda diaka ve.

Inki ta kumina bantu mingi kibeni yina me fwaka mpi ta futumuka kansi ve sambu na kukwenda kuzinga na zulu? Na bilumbu ke kwisa, bo ta vutula bo na luzingu ti kivuvu ya kuzinga kimakulu na Paladisu na ntoto.—Luka 23:43.