DISOLO YINA KELE NA LUTITI YA ZULU | BAMBONA-MESO YA KE TUBILA ZULU
Bangiufula ya Me Tala Bantu Yina Kele na Zulu
Keti nge me kudiyulaka dezia bangiufula ya me tala zulu mpi bantu yina ke zingaka kuna? Kana mvutu kele ee, nge kele ve nge mosi. Banda ntama, bantu me yindulaka mambu mingi sambu na diambu yai. Bantu mingi ke kwikilaka nde ba-nkaka yina me fwaka ke zingaka kuna mpi beto fwete zitisa bo. Bantu ya nkaka ke yindulaka nde yo kele kisika mosi ya pima mpi ya kiese, kisika bawanzio ti bantu ya mbote yina me fwaka ke zingaka. Bantu ya nkaka diaka ke monaka nde yo kele kisika yina banzambi mingi kibeni ke zingaka.
Bantu mingi ke tubaka nde beto lenda zaba ve ata kima mosi na yina me tala zulu sambu ata muntu mosi ve me katukaka kuna sambu na kutela beto mambu ya me tala zulu. Kansi bangindu yai kele mbi. Yezu Kristu zingaka na zulu na ntwala nde yandi kwisa na ntoto. Yandi songaka bantwadisi ya mabundu ya mvu-nkama ya ntete na pwelele yonso nde: “Mono katukaka na zulu sambu na kukwisa kusala luzolo na mono ve, kansi luzolo ya muntu yina tindaka mono.” Yo yina, ntangu Yezu songaka bantumwa na yandi nde, “bisika ya kuzinga kele mingi na nzo ya Tata na mono,” yandi vandaka kuzabisa bo mambu yina yandi zabaka.—Yoane 6:38; 14:2.
Ya kieleka, Tata ya Yezu kele Nzambi, zina na yandi kele Yehowa, mpi “nzo” ya Yehowa kele na zulu. (Nkunga 83:18) Yo yina, ata muntu mosi ve lenda tubila mbote zulu kuluta Yehowa Nzambi mpi Yezu Kristu. Na nzila ya bambona-meso ya kuyituka yina bo me songaka bantu ya kwikama, bo me monisaka mambu mingi ya me tala zulu.
Disolo yina ke landa ta tubila baverse ya Biblia ya ke tendula mambu yina bantu monaka na bambona-meso. Ntangu nge ke tadila bambona-meso yango, yibuka nde beto lenda simba ve zulu mpi yo kele ve ti bima yina beto lenda simba to kumona. Nzambi ponaka ve na kutendudila beto mambu na bangogo yina kaka bigangwa ya kimpeve lenda bakisa, kansi beto ve. Yo yina, ntangu yandi pesaka bantu bambona-meso ya ke monisa mutindu zulu kele, yandi sadilaka bangogo yina beto lenda bakisa. Bambona-meso yina ta sadisa nge na kubakisa bantu yina ke zingaka na ‘bisika mingi ya kuzinga’ yina kele na zulu.
