BAMVULA fioti me luta, Cesar ti nkento na yandi Rocio, vandaka kuzinga mbote na Californie. Cesar vandaka kusala bisalu ya bamasini yina ke pesaka tiya, mupepe, mpi madidi na nzo. Ricio, vandaka kusala ntangu fioti na lupitalu, na kisika yina bo ke vingilaka doktere. Bo vandaka ti nzo na bo mosi, kansi bo vandaka ve ti bana. Ebuna, diambu mosi sobaka luzingu na bo. Inki diambu?

Na Oktobri 2009, biro ya filiale ya États-Unis, tindaka mikanda na mabundu yonso ya insi yina. Bo vandaka na mfunu ya bampangi ya luzolo ya mbote na kukwenda kupesa maboko na ntangu fioti na Betele sambu na kukumisa biro ya filiale ya Wallkill nene, na New York. Bo bingaka mpi bampangi yina bamvula ya kusala na Betele me lutaka. Cesar ti Rocio ke tuba nde: “Sambu beto lutisaka dezia bamvula ya kusala na Betele, beto monaka nde dibaku yina vandaka dibaku mosi ya mbote yina beto lendaka kulutisa ve!” Na mbala mosi, bankwelani yai fulusaka formilere.

Mvula mosi ti ndambu lutaka, kansi bo bingaka bo ve na Betele. Ata mpidina, bo salaka bitambi ya nkaka na kukumisa luzingu na bo pete sambu na kulungisa lukanu na bo. Cesar ke tuba nde: “Beto yidikaka garage na beto sambu na kuzinga kuna, na mpila nde bantu ya nkaka kufutila nzo na beto. Beto basikaka na nzo ya nene yina beto vandaka kuzola mingi mpi ya beto tungaka bamvula kiteso ya zole na ntwala, beto kwendaka kuzinga na nzo ya fioti. Nsoba yina sadisaka beto na kuvanda ya kuyilama na kukwenda na Betele kana bo me binga beto.” Inki salamaka na nima? Rocio ke tuba nde: “Ngonda mosi na nima ya kukota na nzo yina ya fioti, bo bingaka beto na Betele sambu na kupesa maboko na ntangu fioti na Wallkill. Beto bakisaka nde, sambu beto kumisaka luzingu na beto pete, beto pesaka Yehowa dibaku ya kusakumuna beto.”

Bonso Cesar ti Rocio, bampangi mingi me salaka bibansa sambu na kukwenda kupesa maboko na kisalu ya kutunga yina ke salama na provense ya New York. Bankaka na kati na bo ke pesaka maboko na bisalu ya kutunga na Wallkill; bankaka diaka ke pesaka maboko na kisika bo ke tunga biro ya ke  twadisaka kisalu na ntoto ya mvimba na Warwick. * Bankwelani mingi me yambulaka banzo na bo ya kitoko, bisalu na bo ya ke futaka mbote, mpi bisalu ya nkaka ya mabuta na bo sambu na kusadila Yehowa kisalu ya ntangu yonso. Keti Yehowa ke sakumunaka bampangi yina ke monisaka mpeve yai ya kuditambika? Ee!

Mu mbandu na mbanza Kansas, mpangi Way, yina ke salaka bisalu ya kura, ti nkento na yandi Debra, bankwelani yina me lutisa dezia bamvula 50, tekaka nzo na bo ti bima na bo ya nkaka mpi bo kwendaka kusala na Wallkill, bonso bampangi ya ke pesaka maboko na Betele yina ke zingaka ve na Betele. * Ata kusala mpidina lombaka bibansa mingi, bo me monaka nde bibansa yina vandaka mfunu. Debra ke tuba sambu na kisalu na yandi na Betele nde: “Bantangu ya nkaka mono ke kudiwaka bonso nde mono kele na kati ya bantu yina bo ke monisaka na Paladisu na mikanda na beto.”

Melvin ti Sharon yina ke zingaka na Caroline du Sud, tekaka nzo na bo mpi bima na bo ya nkaka sambu na kukwenda kupesa maboko na bisalu yina ke salama na Warwick. Ata yo vandaka mpasi na kusala bibansa yina, bankwelani yai ke sepelaka na kupesa maboko na kisalu yai ya mfunu na disolo ya bansadi ya Yehowa. Bo ke tuba nde: “Kuzaba nde kisalu yai ya beto ke sala ta natila bampangi ya ntoto ya mvimba mambote ke pesaka beto kiese mingi.”

Kenneth, yina me bakaka pansio na kisalu ya kutunga banzo ti Maureen, bankwelani yina kele ti bamvula 50 ti ndambu, yina ke zingaka na Californie, kwendaka kusala na Warwick. Na ntwala ya kukwenda, bo wakanaka ti mpangi-nkento mosi ya dibundu na kubikala na nzo na bo. Bo lombaka mpi bantu ya dibuta na bo na kupesa lusadisu na tata ya Kenneth yina me kumaka mununu. Keti bo ke waka mpasi na ntima na bibansa yina bo salaka sambu na kukwenda na Betele? Ve! Kenneth ke tuba nde: “Yo me natilaka beto balusakumunu mingi. Ata beto ke kutanaka ti mambu ya mpasi, beto ke vandaka ti luzingu ya mbote, mpi beto ke siamisa na masonga yonso bampangi ya nkaka na kusala kisalu yai.”

Bampangi mingi yina me kudipesaka na luzolo yonso ke kutanaka ti mambu ya mpasi yina bo ke nungaka. Mu mbandu, William ti Sandra, bankwelani yina me lungisa bamvula 60, vandaka kuzinga mbote na Pennsylvanie. Bo vandaka ti kompani mosi yina vandaka kusala bamasini, mpi bantu 17 vandaka kusala na kompani yango. Banda bo vandaka baleke, bo ke vandaka kaka na dibundu yina, mpi bantu ya mabuta na bo mingi ke zingaka kaka na mbanza yina. Ntangu bo zwaka dibaku ya kukwenda kusala na Wallkill bonso bampangi ya dibuta ya Betele yina ke zingaka ve na Betele, bo bakisaka nde bo fwete kabwana  ti bampangi mpi banduku na bo yonso. William ke tuba nde: “Kukatuka na kisika yina beto vandaka kuzinga mbote vandaka diambu ya kuluta mpasi.” Bo sambaka mingi mpi na nima, bo bakaka lukanu ya kukwenda, lukanu mosi yina ke pesaka bo ve mpasi na ntima. William ke yika nde: “Kiese ya kusala na Betele kumosi ti bampangi, lenda fwanana ve ata ti kima mosi. Mono ti Sandra kele na kiese ya mingi kuluta kiese yina beto vandaka ti yo ntete!”

Bo bingisaka Ricky, mpangi mosi ya Hawaï, ya ke twadisaka kisalu ya kutunga banzo, na kupesa maboko na bisalu yina ke salama na Warwick. Kuna yandi ta pesaka maboko na Betele, kansi yandi ta zingaka ve na Betele. Nkento na yandi Kendra, siamisaka yandi na kukwenda. Kansi, bo vandaka kudiyangisa sambu na mwana na bo Jacob, yina kele ti bamvula 11. Bo vandaka kudiyula kana yo kele mbote na kunata dibuta na bo yonso na New York, mpi kana mwana na bo ta yikana ti kisika yina ya mpa.

Ricky ke tuba nde: “Lukanu na beto mosi vandaka ya kusosa dibundu mosi yina kele ti batoko ya ke yela mbote na kimpeve. Beto vandaka kuzola nde Jacob kuzwa banduku ya mbote.” Dibundu yina bo kwendaka vandaka ti batoko fioti; kansi, yo vandaka ti bampangi mingi ya dibuta ya Betele. Ricky ke yika nde: “Na nima ya lukutakanu na beto ya ntete na dibundu yina, mono yulaka Jacob dibanza na yandi sambu na dibundu yina ya mpa, sambu yo vandaka ve kibeni ti batoko ya mvula mosi ti yandi. Yandi tubaka nde, ‘Papa kudiyangisa ve. Banduku na mono ta vanda batoko ya dibuta ya Betele.’”

Ya kieleka, Jacob kumaka nduku ya batoko ya dibuta ya Betele, mpi yo vandaka ti bupusi ya mbote na luzingu na yandi. Ricky ke tuba nde: “Kilumbu mosi na mpimpa, mono kwendaka na suku ya Jacob; mwinda vandaka kupela, mono yindulaka nde yandi ke sala bansaka ya video. Kansi, yandi vandaka kutanga Biblia! Ntangu mono yulaka yandi nki yandi vandaka kusala, yandi tubaka nde: ‘Mu me kuma mpangi ya dibuta ya Betele, mpi mu ke tanga Biblia ya mvimba na mvula mosi.’” Ya kieleka, Ricky ti Kendra kele na kiese na mutindu Ricky ke pesa maboko na kisalu yina ke salama na Warwick, mpi sambu mwana na bo ke yela mbote na kimpeve na kisika yina.—Bing. 22:6.

Nsuka-nsuka, bisalu ya kutunga yina ke salama na Wallkill ti na Warwick ta mana. Yo ke monisa nde kisalu ya bampangi yina ke pesa maboko na Betele kele sambu na ntangu fioti. Keti bampangi yai ke kudiyangisa mingi sambu na kisika yina bo ta kwenda kuzinga mpi kisalu yina bo ta sala na nima? Ata fioti ve! Mingi na kati na bo ke vandaka ti mawi ya bankwelani 4 yina katukaka na Florida, ya kele na bamvula kiteso ya 50. John, yina ke twadisaka bisalu ya  kutunga, mpi Carmen, bankwelani yina ke pesa maboko na Warwick ke tuba nde: “Beto ke monaka mutindu Yehowa ke lungisaka bampusa na beto. Beto ke ndimaka nde Yehowa me nataka beto ve awa sambu na kuyambula beto na nima.” (Nk. 119:116) Luis, yina ke tulaka bamasini yina ke fwaka tiya na nzo, mpi nkento na yandi Quenia, ke pesaka maboko na Wallkill. Bo ke tuba nde: “Beto me monaka mutindu Yehowa ke pesaka beto bima ya kinsuni yina beto ke vandaka na yo mfunu. Ata beto ke zaba ve mutindu beto ta zinga na nima ya kisalu yai, beto ke tulaka ntima nde Yehowa ta landa na kulungisa bampusa na beto.”—Nk. 34:10; 37:25.

Bampangi mingi yina me pesaka maboko na kisalu ya kutunga na New York lendaka mpi kupesa bikuma sambu na kubuya kukwenda. Kansi, bo mekaka Yehowa, kaka mutindu yandi ke lombaka beto yonso nde: “Pardo, beno meka mono . . . sambu na kutala kana mono ta kangudila beno ve bakielo ya masa ya zulu mpi kana mono ta tiamunina beno ve lusakumunu tii kuna kima mosi ve ta konda.”—Mal. 3:10, NW.

Keti nge mpi ta meka Yehowa sambu na kubaka balusakumunu mingi? Tadila na kisambu mambu yina nge lenda sala sambu na kupesa maboko na bisalu yai ya mfunu mingi, ya ke salama na New York to na bisika ya nkaka; ebuna, nge ta mona nge mosi mutindu Yehowa ta sakumuna nge.—Mar. 10:29, 30.

Dale, yina kele enzeniere ya bisalu ya kutunga, ti nkento na yandi Cathy, yina katukaka na Alabama, ke siamisa bantu na kusala kisalu yai. Bo ke tuba nde: “Kana nge me sala bikesa ya kukumisa luzingu na nge pete sambu na kukwenda kupesa maboko na bisalu ya Wallkill, nge ta vanda ti dibaku ya kumona mutindu mpeve ya Yehowa ke salaka kisalu.” Kansi, inki lenda sadisa nge na kusala yo? Dale ke tuba nde: “Sosa kibeni kukumisa luzingu na nge pete. Na nima, nge ta wa ve ata fioti mawa na ntima!” Gary, yina katukaka na Caroline du Nord, me salaka kisalu ya kutunga bamvula 30. Yandi ti nkento na yandi Maureen, ke tuba nde bo me bakaka balusakumunu mingi na Warwick, mu mbandu, “kukutana mpi kusala ti bampangi mingi yina me sadilaka Yehowa bamvula mingi na Betele.” Gary ke yika nde: “Sambu na kusala na Betele, yo ke lombaka nde muntu kukumisa luzingu na yandi pete, mpi yo kele luzingu mosi ya mbote na bilumbu yai ya nsuka.” Jason, yina vandaka kusala na kompani mosi ya ke tudilaka bantu kura, ti nkento na yandi Jennifer, yina katukaka na Illinois, ke tuba nde kisalu ya Wallkill kele “kisalu mosi ya kitoko yina lenda sadisa nge na kumona mutindu luzingu ta vanda na ntoto ya mpa.” Jennifer ke yika nde: “Yo kele kiese mingi na kuzaba nde bisalu yonso ya nge ke sala ke sepedisa Yehowa mpi nde yo ta landa na kuvanda na mbalu na meso ya Yehowa. Sambu Yehowa ke mona bisalu yina, yandi ta konda ve kusakumuna nge.”