NTANGU bo nikisaka Kingsley na dipeka, yandi yantikaka lutangu na yandi ya Biblia, yo vandaka disolo na yandi ya ntete na Nzo-Nkanda ya Kisalu ya Teokrasi. Yandi tangaka bangogo yonso mbote. Kansi, sambu na nki yandi vandaka ve kutala na Biblia?

Kingsley zingaka na Sri Lanka, yandi vandaka kifwa-meso, vandaka kuwa mbote ve, mpi vandaka kutambula na velo ya bikata. Inki mutindu bakala yai longukaka mambu ya me tala Yehowa mpi lungisaka malombo sambu na kusonikisa zina na Nzo-Nkanda ya Kisalu ya Teokrasi? Bika mono tendudila beno.

Ntangu mono kutanaka ti Kingsley na mbala ya ntete, nzala na yandi ya ngolo ya kuzaba kieleka ya Biblia yitukisaka mono mingi. Yandi longukaka dezia Biblia ti Bambangi ya Yehowa mingi, mpi mukanda na yandi Nzayilu ya Kenataka na Luzingu ya Mvula na Mvula ya bisono ya bifwa-meso kumaka ya kununa. * Mono lombaka yandi na kulonguka diaka mpi yandi ndimaka, kansi mambu zole vandaka kuyangisa beto.

Diambu ya ntete, Kingsley vandaka kuzinga ti bantu mingi na nzo ya minunu mpi ya bantu yina kele ti bifu na nitu. Mono vandaka kutuba ngolo sambu makelele vandaka mingi mpi sambu Kingsley vandaka kuwa mbote ve. Yo yina, konso muntu yina vandaka na nzo yina vandaka kuwa mutindu beto vandaka kulonguka!

Diambu ya zole, Kingsley vandaka kutanga mpi kubakisa mambu fioti mpamba ntangu beto vandaka kulonguka. Ntangu Kingsley kumaka  kudibongisa mbote na ntwala, beto kumaka kulonguka mbote. Ntangu yandi vandaka kudibongisa, Kingsley vandaka kutanga mbala na mbala mambu yina beto ta longuka, kusosa baverse na Biblia na yandi ya Bisono ya Bifwa-Meso, mpi na nima yandi vandaka kuyidika bamvutu na mabanza na yandi. Metode yai sadisaka yandi mingi kibeni. Ntangu beto vandaka kulonguka, yandi vandaka kuvanda na tapis, makulu ya kukanga, mpi yandi vandaka kubula diboko na ntoto ntangu yandi vandaka kutendula na ndinga ya ngolo mambu yina yandi me longuka. Ntete, beto vandaka kulonguka mbala zole na mposo mosi, mpi beto vandaka kusala bangunga zole!

Kingsley vandaka na mpusa ya ngolo ya kukwenda na balukutakanu, kansi yo vandaka pete ve. Yandi vandaka ti mfunu ya muntu yina ta sadisaka yandi na kumata mpi kukita na velo na yandi, kukota na kamio, mpi kukota na Nzo ya Kimfumu. Bampangi mingi na dibundu vandaka kusadisa yandi mpi vandaka kumona yo dibaku mosi ya mbote. Ntangu lukutakanu vandaka kusalama, Kingsley vandaka kutula haut-parleur pene-pene ya dikutu na yandi, mpi vandaka kuwidikila na dikebi yonso; nkutu, yandi vandaka kupesa bakomantere!

Na nima ya kulonguka na nsungi ya mwa ntangu, Kingsley bakaka lukanu ya kusonikisa zina na Nzo-Nkanda ya Kisalu ya Teokrasi. Bamposo zole na ntwala ya kusala lutangu na yandi ya ntete ya Biblia na Nzo-Nkanda ya Kisalu ya Teokrasi, mono yulaka yandi kana yandi ke kudibongisa mbote. Yandi tubaka na kikesa yonso nde: “Ee, mono ke tanga mbala 30.” Mono sikisaka yandi sambu na bikesa na yandi mpi mono lombaka yandi na kutanga sambu mono widikila. Yandi kangulaka Biblia na yandi, tulaka misapi na yandi na zulu ya Bisono ya Bifwa-Meso, mpi yantikaka kutanga. Kansi, mono bakisaka nde misapi na yandi vandaka ve kukwenda nzila mosi ti mutindu yandi vandaka kutanga. Yandi kangaka na ntu kitini yonso yina bo lombaka yandi na kutanga!

Mansanga kulumukaka mono, mpi mono vandaka kundima ve. Mono yulaka Kingsley nki mutindu yandi kangaka kitini yina ya mvimba na ntu na nima ya kutanga mbala 30 mpamba. Yandi vutulaka nde: “Ve, mono vandaka kutanga mbala 30 na kilumbu mosi.” Na nsungi ya ngonda mosi, mbala na mbala Kingsley vandaka kufonga na tapis sambu na kutanga, ebuna yandi kangaka na ntu kitini yonso yina bo lombaka yandi na kutanga.

Ebuna, kilumbu ya kusala disolo na yandi lungaka. Ntangu Kingsley manisaka kutanga, bampangi yonso na dibundu landaka na kubula maboko na kiese yonso, mpi bampangi ya nkaka dilaka sambu na lukanu ya mwana ya nzo-nkanda yai ya mpa. Nsamuni mosi ya nkento yina yambulaka kusala masolo na nzo-nkanda sambu yandi vandaka kubela maladi ya ntu, lombaka nde bo sonika diaka zina na yandi na Nzo-Nkanda ya Kisalu ya Teokrasi. Sambu na nki? Yandi tubaka nde: “Sambu Kingsley me sala yo, mono mpi ta kuka!”

Na Septembri 6, 2008, na nima ya kulonguka Biblia bamvula tatu, Kingsley bakaka mbotika, sambu na kumonisa kudipesa na yandi na Yehowa. Na Mayi 13, 2014, yandi fwaka ya kwikama na Yehowa. Kingsley vandaka ti kivuvu nde na Paladisu, yandi ta landa na kusala kisalu ya Yehowa na kikesa yonso mpi na mavimpi ya kukuka. (Yez. 35:5, 6)—Disolo ya Paul McManus.