Keti Mbongo Kele Nto ya Kyese ya Kyeleka?

SONIA kubutukaka na Espania. Ntangu yandi vandaka mwana-fyoti, yandi vandaka kukwenda na balukutakanu ya Bambangi ya Yehowa ti mama na yandi. Kansi ntangu yandi yelaka, yandi kwendaka kuzinga na Londres, na Angleterre, mpi nsukansuka yandi yantikaka kusala kisalu ya kusadisa bantu na kusala bakontra ya mbongo mingi.

Sonia kuzolaka kisalu na yandi. Yandi vandaka kuzwa mbongo mingi mpi kutanina mbongo mingi mpenza ya bakiliya na yandi. Kisalu yina vandaka kupesa yandi kyese, mpi yandi vandaka kununga. Sonia vandaka kusala mbala na mbala bangunga 18 konso kilumbu mpi bampimpa yankaka yandi vandaka kulala kaka bangunga zole to tatu. Kisalu na yandi kuvandaka kima ya kuluta mfunu na luzingu na yandi. Na nima, na mbala mosi, mambu yonso kubebaka. Sonia kubelaka maladi ya ngolo ya ntu​—ziku sambu basusi vandaka kuyangisa mingi mabanza na yandi. Yandi vandaka kaka ti bamvula 30.

Ndambu mosi ya nitu ya Sonia vandaka kusala dyaka ve, mpi badoktere vandaka kuzaba ve kana yandi takuka dyaka kutuba to ve. Mama na yandi kwendaka kukonda kusukinina na Angleterre sambu na kukeba yandi. Ntangu Sonia yantikaka kutambula dyaka, mama na yandi kuzabisaka yandi nde, “Mu kekwenda na balukutakanu ya dibundu, mpi nge fwete kwenda ti mono sambu mono lenda yambula nge ve nge mosi.” Sonia kundimaka na kukwenda ti yandi. Inki kusalamaka?

Sonia keyibuka nde: “Mambu yonso ya mu waka kuvandaka kyeleka. Yo vandaka kitoko mpenza. Mu vandaka na kyese ya kundima kulonguka Biblia ti muntu mosi na kati ya bantu mingi yina kupesaka mono mbote na mbala ya ntete ya mu kwendaka na Nzo ya Kimfumu. Banduku na mono ya ntama yambulaka kukwisa kutala mono, kansi banduku na mono ya mpa vandaka kuzola mpi kukeba mono.”

Malembe-malembe, Sonia yantikaka kutuba dyaka, mpi yandi yelaka nswalu na kimpeve. Mvula mosi kulungaka ve, yandi bakaka mbotika. Banduku na yandi mingi ya mpa vandaka baministre ya Bukristu ya ntangu yonso, mpi yandi vandaka kumona mutindu bo vandaka na kyese ya mingi. Sonia kuyindulaka mutindu yai: ‘Mu kezola mpi kuvanda mutindu yina. Mu kezola kupesa Yehowa Nzambi yonso yina mu lenda!’ Ntangu yai Sonia kesalaka kisalu ya ministre ya ntangu yonso.

Inki Sonia kulongukaka na mambu yina kukuminaka yandi? Yandi ketuba nde: “Ata mu vandaka kuzwa mbongo mingi, basusi mpi kukonda lutaninu na kisalu kusalaka nde mu kuma kudiyangisa mpi mu konda kyese. Mu mebakisaka nde kima ya kuluta mfunu na luzingu kele kuvanda ti bangwisana ya mbote ti Yehowa, Tata na mono ya zulu. Ntangu yai mu kele mpenza na kyese.”

Ntumwa Polo kusonikaka nde: “Kuzola mbongo mingi ke bendaka mambu ya mbi ya mutindu na mutindu. Bantu ya nkaka vandaka na nzala mingi ya mbongo; yo yina nzala yango vidisaka lukwikilu na bo, yo pesaka bo mpasi mingi na ntima.” (1 Timoteo 6:10) Sonia lenda ndimisa bukyeleka ya bangogo yai.