Keti Nzambi Kesila Nge Kimvwama?

‘Nzambi kezola nde nge vanda mvwama​—bavwatire mingi mpi kisalu ya kepesa mbongo mingi. Kwikila kaka na yandi, kangula potumone na nge mpi pesa yandi yonso ya nge lenda pesa.’

YAI kele nsangu yina mabundu yankaka kelongaka na Brésil, na kutadila zulunalu mosi ya bo kenyemaka kuna. Yo kele nsangu yina bantu mingi ketudilaka ntima. Na kutadila nsosa mosi ya bo salaka na États-Unis na bantu yina ketubaka nde bo kele Bakristu, zulunalu Time ketuba nde: “Bantu 61 na kati ya nkama kekwikilaka nde Nzambi kezolaka nde bantu kuvanda bamvwama. Mpi bantu 31 na kati ya nkama . . . kendimaka nde kana nge pesa Nzambi mbongo, yandi tasakumuna nge na kupesaka nge mbongo mingi kuluta.”

Bangindu ya mutindu yai, ya bo kebingaka mbala mingi nde malongi ya kimvwama ke na kumwangana nswalu mingimingi na bansi ya Amerika ya Sudi, bonso Brésil, mpi bantu kefulukaka na mabundu yina kesilaka bo nde Nzambi tapesa bo balusakumunu ya kinsuni. Kansi, keti Nzambi kesila mpenza kimvwama na bantu yina kesadila yandi? Keti bansadi yonso ya Nzambi ya ntangu ya ntama kuvandaka bamvwama?

Yo kele kyeleka nde na Masonuku ya Kiebreo, beto ketangaka mbala mingi nde bantu yina Nzambi kusakumunaka kuvandaka ti kimvwama ya kinsuni. Mu mbandu, na Kulonga 8:18, beto ketanga nde: “Beno fweti zaba nde Mfumu Nzambi, Nzambi na beno, muntu ke kumisaka beno bamvwama.” Mambu yai kundimisaka bantu ya Izraele nde kana bo lemfukaka na Nzambi, yandi zolaka kukumisa bo dikanda ya kutoma.

Inki beto lenda tuba sambu na konso nsadi ya Nzambi? Yobi, muntu ya kwikama, kuvandaka na kimvwama mingi mpenza, mpi na nima ya ntangu yina Satana kukumisaka yandi nsukami, Yehowa kuvutulaka “mbala zole” kimvwama na yandi. (Yobi 1:3; 42:10) Abrahami mpi kuvandaka mvwama. Kuyantika 13:2 ketuba nde yandi vandaka “mvwama ya nene mpenza. Yandi vandaka na mameme, bankombo ti bangombe, yandi vandaka mpi na arza ti wolo mingi.” Ntangu bimvuka ya basoda ya bantotila iya ya Esti kukangaka Loti, mwana-mpangi ya Abrahami, Abrahami “bingaka bantu na yandi nkama tatu kumi na nana, bayina ya yandi zabaka mbote-mbote, bayina mpi butukaka na nzo na yandi.” (Kuyantika 14:14) Sambu Abrahami vandaka ti bantu 318 yina zabaka kusadila binwaninu, yo fwete vanda nde nzo ya Abrahami kuvandaka ti bantu mingi. Mutindu yandi vandaka kukuka kusansa dibuta ya nene ya mutindu yai kemonisa nde yandi vandaka mpenza mvwama, mpi yandi vandaka ti kibuka ya nene ya bitwisi.

Ya kyeleka, bansadi mingi ya Nzambi ya ntangu ya ntama​—Abrahami, Izaki, Yakobi, Davidi, Salomo, kana beto tanga bo mpamba—​kuvandaka bamvwama. Kansi, keti yo ketendula nde Nzambi takumisa konso muntu yina kesadila yandi mvwama? Dyaka, keti kana muntu kele nsukami yo ketendula nde yandi kele ve ti lusakumunu ya Nzambi? Disolo ya kelanda tatubila bangyufula yai.