Keti Nge Lenda Zaba Nzambi na Zina na Yandi?

Yo kele lukumu ya nene kana bo lomba nge na kupesa muntu mosi ya mfunu mbote na zina na yandi mpi kusolula ti yandi. Mbala mingi bo kebingaka bantu ya mfunu na batitre bonso “Prezida,” “Mfumu,” to “Ntotila.” Yo yina, kana muntu mosi ya kele ti kiyeka mingi mesonga nge nde, “Nge lenda binga mono na zina na mono,” ntembe kele ve nde nge tamona nde yandi mepesa nge lukumu.

NZAMBI ya kyeleka kesonga beto na Ndinga na yandi ya kusonama, Biblia nde: “Mono kele Yehowa. Yina zina na mono.” (Yezaya 42:8, NW) Ata yandi kele mpi ti batitre mingi, mu mbandu “Ngangi,” “Nkwa-Ngolo Yonso,” mpi “Nkwa Kimfumu,” konso ntangu yandi kepesaka bansadi na yandi ya kwikama lukumu na kupesaka bo nswa ya kubinga yandi na zina na yandi.

Mu mbandu, kilumbu mosi profete Moize kuyantikaka na kubondila Nzambi na bangogo yai: “Pardo [Yehowa].” (Kubasika 4:10) * Na ntangu ya kukangula tempelo na Yeruzalemi, Ntotila Salomo kuyantikaka kisambu na yandi ti bangogo yai: “[Yehowa].” (1 Bantotila 8:22, 23) Mpi ntangu profete Yezaya kusolulaka ti Nzambi sambu na mambote ya bantu ya Izraele, yandi tubaka nde: “Nge [Yehowa], nge kele tata na beto.” (Yezaya 63:16) Yo ke pwelele nde, Tata na beto ya zulu kelomba beto na kubinga yandi na zina na yandi.

Ata kubinga Yehowa na zina na yandi kele mfunu, kuzaba yandi mpenza na zina na yandi ketendula mambu mingi. Sambu na yina metala bantu yina kezolaka yandi mpi ketudilaka yandi ntima, Yehowa kesila nde: “Mono ta taninaka bayina kuzaba” zina na mono. (Nkunga 91:14) Yo ke pwelele nde, kuzaba zina ya Nzambi fwete vanda ti ntendula mingi, sambu yo kele dyambu ya mfunu yina tasadisa beto na kubaka lutaninu na yandi. Yo yina, kuzaba Yehowa na zina na yandi kelomba nki sambu na nge?

[Noti na Nsi ya Lutiti]