Batangi na Beto Keyula . . .

Paladisu Yina Biblia Ketubilaka Ke na Wapi?

▪ Yezu kusilaka muntu mosi yina vandaka kulakana mpi yina kumonisaka lukwikilu na yandi na kikesa yonso nde: “Nge ta vandaka ti mono na Paladiso.” (Luka 23:43) Muntu yina zolaka kuvanda na wapi? Keti Paladisu zolaka kuvanda na zulu, na ntoto, to na kisika mosi ya kele na katikati ya zulu mpi ntoto kisika bantu kevingilaka lusambisu?

Ba-nkaka na beto kuzingaka na Paladisu na ntangu mosi buna. Biblia kezabisa beto nde: “Mfumu Nzambi salaka kilanga na ntoto ya Edeni, na ndambu ya este ya nsi ya Kanana. Muna yandi tulaka muntu ya yandi salaka. . . . Ntangu yai Mfumu Nzambi bakaka muntu, yandi tulaka yandi na kilanga na ntoto ya nsi ya Edeni sambu na kusalaka muna ti kutalaka yo mbote-mbote.” (Kuyantika 2:8, 15) Ntangu bo balulaka bangogo yai na Kigreki, bo balulaka ngogo “kilanga” nde pa·raʹdei·sos, kisika ngogo ya Kikongo “paladisu” mekatukaka.

Kaka mutindu bankwelani kekumisaka nzo na bo nene ntangu bo kekumaka ti bana mingi, mutindu mosi Nzambi vandaka kuvingila nde bibuti na beto ya ntete kuyalumuna Paladisu sambu yo luta bandilu ya Edeni ntangu dibuta ya bantu zolaka kukuma nene. Nzambi kuzabisaka bo nde: “Beno fulusa ntoto mpi beno yala yo.”​—Kuyantika 1:28, NW.

Yo yina, lukanu ya Ngangi na beto kuvandaka nde bantu kuzinga mpi kubuta bana na Paladisu awa na ntoto. Bo zolaka kuzinga kimakulu na kilanga yina ya vandaka na ntoto mpi bo zolaka ve kuvanda ti mfunu ya mazyamu. Yo lombaka nde ntoto kukuma nzo na bo ya kimakulu. Yo keyitukisa ve na kumona nde bima ya Nzambi mesalaka na planete na beto kepesaka beto kyese mingi! Nzambi kugangaka beto sambu na kuzinga na ntoto ya kitoko.

Keti lukanu ya Nzambi mesobaka? Ve. Sambu Yehowa kendimisa beto nde: “Mambu yina ke katukaka na munoko na mono, yo ke vutuka ve mpamba na mono kana yo me sala ve ntete luzolo na mono, kana yo me lungisa ve bangindu na mono.” (Yezaya 55:10, 11) Bamvula kuluta 3 000 na nima ya kuganga muntu, Biblia kutubaka mutindu yai na yina metala Muntu yina ‘kuyidikaka ntoto ti kukumisaka yo ngolo’ nde yandi “salaka yo ve nde yo kuvanda ya mpamba, kansi yandi yidikaka yo sambu bantu kuzinga muna.” (Yezaya 45:18) Luzolo ya Nzambi mesobaka ve. Ntoto takuma dyaka paladisu.

Dyambu ya kebenda dikebi kele nde, baverse mingi ya Biblia yina ketubila Paladisu ketendulaka kaka luzingu na ntoto. Mu mbandu, mbikudulu mosi ya Yezaya ketuba nde: “Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo.” (Yezaya 65:21) Inki kisika bantu ketungaka banzo mpi kekunaka bilanga ya vinu? Inki kisika bantu kedyaka bambuma? Na ntoto. Bingana 2:21 ketuba na pwelele yonso nde: “Bantu ya mbote . . . ta zinga na ntoto na beto yai.”

Yezu mpi kutubilaka paladisu ya ntoto. Yo ke kyeleka nde, yandi silaka mpi paladisu ya zulu, kansi yandi silaka yo kaka sambu na bantu fyoti ya meponamaka. (Luka 12:32) Na nima ya lufwa, bantu yai kefutumukaka na Paladisu ya zulu mpi bo kevukanaka ti Kristu sambu na kuyala Paladisu ya ntoto. (Kusonga 5:10; 14:1-3) Bantu yai ya tayala na zulu ti Yezu tasala yonso sambu Paladisu ya ntoto kuyalama mpi kutaninama mbote na kuwakana ti minsiku ya Nzambi.

Yezu kuzabaka nde yai vandaka luzolo ya Nzambi sambu na ntoto. Ya kyeleka, yandi vandaka na zulu ti Tata na yandi ntangu Nzambi kugangaka kilanga ya Edeni. Bantu yonso yina kemonisaka lukwikilu bubu yai lenda zinga na paladisu ya ntoto na bilumbu kekwisa. (Yoane 3:16) Sambu na bantu ya mutindu yai, Yezu kesila nde: “Nge ta vandaka ti mono na Paladiso.”​—Luka 23:43.

[Kifwanisu/bangogo ya kemonisa kisina ya foto ya kele na lutiti 10]

© FORGET Patrick/SAGAPHOTO.COM/Alamy