Longuka na Ndinga ya Nzambi

Sambu na Nki Nzambi Kevandaka ti Organizasio?

Disolo yai kepesaka bamvutu na bangyufula yina ziku nge mekudiyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Sambu na nki Nzambi twadisaka bantu ya Izraele?

Nzambi kumisaka bana ya Abrahami tata ya mabuta dikanda mpi pesaka bo bansiku. Yandi bingaka dikanda yango na zina Izraele mpi yandi kumisaka yo dikanda yina vandaka kupesa mbandu na yina metala lusambu ya kyeleka mpi kutanina Ndinga na yandi, Masonuku na yandi ya Santu. (Nkunga 147:19, 20) Yo yina, bantu ya makanda yonso bakaka mambote.​—Tanga Kuyantika 22:18.

Nzambi solaka bantu ya Izraele sambu na kuvanda bambangi na yandi. Ntangu bo vandaka kulemfukila yandi, bansiku ya Nzambi vandaka kunatila bo mambote. (Kulonga 4:6) Ntangu beto kelonguka disolo ya bantu ya Izraele, beto lenda bakisa mambu mingi na yina metala Nzambi ya kyeleka.​—Tanga Yezaya 43:10, 12.

2. Sambu na nki Nzambi ketwadisaka Bakristu ya kyeleka?

Na ntangu mosi buna, Yehowa ndimaka dyaka ve bantu ya Izraele mpi yandi yingisaka dikanda yina na dibundu ya Bukristu. (Matayo 21:43; 23:37, 38) Ntete-ntete, bantu ya Izraele vandaka bambangi ya Nzambi. Bubu yai, bambangi ya Yehowa kele Bakristu ya kyeleka.​—Tanga Bisalu 15:14, 17.

Yezu longaka balongoki na yandi sambu bo ta kimbangi na yina metala Yehowa mpi kukumisa bantu ya bansi yonso balongoki. (Matayo 10:7, 11; 24:14; 28:19, 20) Kisalu yai kele na kukuma na nsuka. Yai mbala ya ntete yina Yehowa kevukisa bamilio ya bantu ya bansi yonso na lusambu ya kyeleka. (Kusonga 7:9, 10) Yezu kelonga mpi Bakristu ya kyeleka sambu bo baka kikesa mpi bo kudisadisana. Na nsi-ntoto ya mvimba Bambangi ya Yehowa kevandaka ti manaka ya kiteso mosi sambu na kulonguka Biblia na balukutakanu na bo.​—Tanga Baebreo 10:24, 25.

  3. Inki mutindu kimvuka ya Bambangi ya Yehowa yantikaka?

Na ntangu na beto, kimvuka ya Bambangi ya Yehowa yantikaka na mvu 1870. Kimvuka mosi ya fyoti ya balongoki ya Biblia sengumunaka dyaka bakyeleka ya Biblia yina vilaka tuka ntama. Bo zabaka nde Yezu twadisaka dibundu ya Bukristu sambu na kusamuna. Yo yina, bo yantikaka kisalu ya kulonga Kimfumu na ntoto ya mvimba. Na mvu 1931, bo bakaka zina ya Bambangi ya Yehowa.​—Tanga Bisalu 1:8; 2:1, 4; 5:42.

4. Inki mutindu Bambangi ya Yehowa ketwadisamaka bubu yai?

Na mvu-nkama ya ntete, mabundu ya Bukristu na bansi mingi vandaka kulanda lutwadisu ya nto-kimvuka yina bakisaka nde Yezu vandaka Mfumu ya dibundu. (Bisalu 16:4, 5) Bubu yai mpi Bambangi ya Yehowa kebakisaka nde Yezu kele Ntwadisi na bo. (Matayo 23:9, 10) Bo kelandaka lutwadisu ya bankuluntu ya mayele yina kele na Nto-Kimvuka yina kepesaka kikesa mpi ketwadisaka mabundu kuluta 100 000 na nsadisa ya Masonuku. Na konso dibundu, babakala yina mefwana kele bankuluntu to bankengi. Na zola yonso babakala yai kekebaka mameme ya Nzambi.​—Tanga 1 Piere 5:2, 3.

Yehowa ketwadisaka Bambangi na yandi sambu na kulonga nsangu ya mbote mpi kukumisa bantu balongoki. Sambu na kusadisa bantu ya bisika yonso, bo kebalulaka, kenyemaka, mpi kekabulaka mikanda yina kesadisaka sambu na kulonguka Biblia na bandinga kuluta 500. Bo kesamunaka nzo na nzo bonso bantumwa. (Bisalu 20:20) Bo kelongukaka Biblia ti bantu ya masonga yina kezolaka kyeleka. Sambu Bambangi ya Yehowa ketulaka dikebi na kusepedisa Nzambi mpi kusadisa bantu yankaka, bo kesala kimvuka ya bantu ya kyese.​—Tanga Nkunga 33:12; Bisalu 20:35.

Sambu na kuzaba mambu mingi, tala kapu 19 ya mukanda yai, yina Bambangi ya Yehowa mebasisaka, Inki Biblia Kelongaka Mpenza?