Keti Kele ti Muntu Yina Kewaka Bisambu?

“Mu vandaka kukwikila ve nde Nzambi kele. Kansi, bantangu yankaka mono vandaka kusamba. Mu vandaka kuzaba ve kana kele ti muntu yina vandaka kuwa bisambu na mono, kansi mono vandaka kukwikila nde muntu mosi vandaka kuwa yo. Mu vandaka na kyese ve mpi luzingu na mono vandaka ve ti lukanu. Mu vandaka kuwa boma na kukwikila na Nzambi sambu mono vandaka kuyindula nde kaka bantu ya kukonda mfunu kekwikilaka na Nzambi.”​—PATRICIA, * IRELAND.

KETI nge mpi kekudiwaka bonso Patricia? Keti nge kesambaka ata nkutu nge kekwikilaka ve nde Nzambi kele? Kana yo kele mpidina, nge kele ve nge mosi. Tala mambu yai melanda.

◼ Ntangu bo yulaka bantu 2 200 ya insi Angleterre kana bo kekwikilaka nde kele ti Nzambi yina megangaka nsi-ntoto mpi ya kewaka bisambu, kaka bantu 22 na kati ya nkama ndimaka. Ata mpidina, bantu 55 na kati ya nkama tubaka nde bo kesambaka na bantangu yankaka.

◼ Ntangu bo yulaka bangyufula na bantu 10 000 ya bakontina iya, na kati ya bantu yina ketubaka nde Nzambi kele ve, 30 na kati ya nkama tubaka nde bo kesambaka.

Sambu na Nki Bo Kekwikilaka Ve?

Allan muntu ya insi Angleterre ketuba nde: “Na luyantiku mono vandaka kutuba nde mono kekwikilaka ve na Nzambi sambu mono vandaka kuyindula nde mabundu mesalamaka sambu na kuyala bantu mpi kuzwa mbongo. Mu vandaka kuyindula mpi nde, kana Nzambi kele, kukonda lunungu zolaka kuvanda mingi ve. Kansi, bantangu yankaka mono vandaka kuyindulula mpi kusamba ‘muntu mosi yina mono zabaka ve.’ Dyaka, mono vandaka kudiyula nde: ‘Mono mekatukaka na wapi?’”

Muntu yonso yina keyindulaka mutindu yai kele ti bikuma yina kepusaka yandi na kuvanda ti keti-keti kana kele ti muntu yina kewaka bisambu. Bantu mingi kekwikilaka ve sambu bo mezwaka ntete ve bamvutu na bangyufula bonso yai:

◼ Keti Ngangi kevandaka?

◼ Sambu na nki mbala mingi mabundu kepusaka bantu na mambi?

◼ Sambu na nki Nzambi mepesaka nzila na bampasi?

Kana nge zwa bamvutu na bangyufula yai, keti nge tayantika kusamba na ntima ya mvimba?

[Noti na nsi ya lutiti]