Zola ke tendula kumonisa mawi ya mudindu sambu na ba nkaka. Muntu ya zola ke monisaka na bangogo mpi na bisalu mutindu yina yandi ke kudiwaka sambu na bantu yina yandi ke zolaka, ata kusala mpidina ke lombaka bibansa.

Moize vandaka kuzola Nzambi. Na nki mutindu? Yibuka bangogo yina kele na 1 Yoane 5:3: “Yai kele ntendula ya zola ya Nzambi, nde beto zitisa bansiku na yandi.” Sambu Moize vandaka kuzola Nzambi, yandi lemfukilaka bantuma na yandi. Moize lemfukaka na mambu yonso yina Nzambi lombaka yandi na kusala, mu mbandu kutelamina Farao, ntotila ya ngolo mpi kubula nti na yandi na Nzadi-Mungwa ya Mbwaki. Yo vanda nsiku yina Nzambi pesaka yandi vandaka pete to mpasi na kulungisa, Moize lemfukaka. Yandi “salaka mambu yonso kaka mutindu Mfumu Nzambi songaka yandi.”​—Kubasika 40:16.

Moize vandaka mpi kuzola bampangi na yandi bantu ya Izraele. Bo bakisaka nde Yehowa sadilaka Moize sambu na kutwadisa bansadi na yandi, yo yina bo vandaka kukwenda na Moize sambu na kuzabisa yandi mambu na bo. Biblia ke tuba nde: ‘Katuka suka tii na mpimpa bantu vandaka kukwisa kusamba mambu na bo na ntwala ya Moize.’ (Kubasika 18:13-16) Yo fwete vanda nde, Moize vandaka kulemba ngolo na nima ya kuwidikila bantu ya Izraele kilumbu ya mvimba ntangu bo vandaka kukwisa kuzabisa yandi bampasi na bo! Ata mpidina, Moize vandaka na kiese ya kusadisa bantu yina yandi vandaka kuzola.

Katula kuwidikila bo, Moize vandaka mpi kusamba sambu na bo. Nkutu, yandi sambaka mpi sambu na bayina vandaka kusadila yandi mambu ya mbi! Mu mbandu, ntangu Miriami, mpangi na yandi ya nkento bokutaka sambu na Moize, Yehowa pesaka Miriami ndola ya maladi ya lepre. Na kisika ya kusepela na ndola ya Miriami, kukonda kusukinina Moize sambaka sambu na yandi nde: “Pardo Nzambi, belula yandi.” (Kutanga 12:13) Zola pusaka Moize na kusala kisambu yina ya kukonda bwimi.

Beto lenda landa mbandu ya Moize na kumonisaka zola ya mudindu sambu na Nzambi. Zola ya mutindu yina ke pusaka beto na kulemfukila bansiku na yandi “na ntima ya mvimba.” (Baroma 6:17) Ntangu beto ke lemfukilaka Yehowa na ntima ya mvimba, beto ke sepedisaka ntima na yandi. (Bingana 27:11) Beto mosi mpi ke bakilaka yo mambote. Nkutu, ntangu zola ya kieleka ke pusaka beto na kusadila Nzambi, beto ke salaka mambu ya mbote mpi ke vandaka na kiese ya kusala yo!​—Nkunga 100:2.

Mutindu ya nkaka yina beto lenda landa mbandu ya Moize kele ya kumonisa zola ya kuditambika sambu na ba nkaka. Ntangu banduku na beto to bantu ya dibuta ke kwisa kuzabisa beto mambu yina ke yangisa bo, zola ke pusaka beto na (1) kuwidikila bo na dikebi yonso, (2) kuditula na kisika na bo, to kubakisa mutindu bo ke kudiwa, mpi (3) kuzabisa bo nde beto ke kudibanza-banzaka sambu na bo.

Bonso Moize, beto lenda samba sambu na bantu yina beto ke zolaka. Bantangu ya nkaka, beto lenda mona bonso nde beto kele ve ti makuki ya kusadisa bantu yina me zabisa beto bampasi na bo. Nkutu, beto lenda tuba ti mawa yonso nde: “Mono me wa mpasi mpenza, kansi kima mosi kaka yina mono lenda sala kele kusamba sambu na nge.” Kansi kuvila ve nde: “Ntangu muntu ya lunungu ke sambaka, kisambu yina ke vandaka ngolo mingi.” (Yakobo 5:16, The Kingdom New Testament) Nkutu, bisambu na beto lenda pusa Yehowa na kusala diambu mosi yina mbala ya nkaka yandi lendaka ve kusala yo. Yo yina, kele ve ti kima ya nkaka ya kuluta mbote ya beto lenda sala sambu na bantu yina beto ke zolaka kuluta kusamba sambu na bo. *

Keti nge me ndima ve nde beto lenda longuka mambu mingi na mbandu ya Moize? Ata yandi vandaka bonso beto, yandi bikaka mbandu ya kuluta mbote ya lukwikilu, ya kudikulumusa mpi ya zola. Kana beto ke sala yonso sambu na kulanda mbandu na yandi, yo ta natila beto mpi bantu ya nkaka mambote mingi.​—Baroma 15:4.